Па выніках сусветнага вэбаметрычнага рэйтынгу ўніверсітэтаў Webometrics Ranking of World Universities БДУ заняў 612 месца! Такім чынам, наша ВНУ на працягу паўгода паднялася на 61 прыступку.
Адзначым, што сярод краін СНД БДУ саступіў толькі найстарэйшым ВНУ: Маскоўскаму дзяржаўнаму ўніверсітэту імя М. В. Ламаносава і Санкт-Пецярбургскаму дзяржаўнаму ўніверсітэту.
Прарэктар па вучэбнай рабоце БДУ Аляксей Толсцік адзначыў: «Наша ВНУ ўвесь час удзельнічае ў сусветных рэйтынгах, якія адлюстроўваюць прадстаўленасць універсітэта ў сусветнай навукова-адукацыйнай прасторы. У снежні 2013 г. па версіі расійскага агенцтва «Інтэрфакс» Белдзяржуніверсітэт заняў другое месца пасля МДУ ў рэйтынгу ВНУ краін СНД, Грузіі і Балтыі. У 2014 г. вядомае брытанскае агенцтва QS (QS World University Rankings) уключыла БДУ ў лік 500 найлепшых універсітэтаў свету. У снежні 2014 г. былі апублікаваны вынікі новага рэйтынгу найлепшых універсітэтаў краін у стадыі развіцця Еўропы і Цэнтральнай Азіі. Сярод 368 універсітэтаў з 30 краін Беларускі дзяржаўны ўніверсітэт увайшоў у топ-50 найлепшых ВНУ гэтага рэгіёна, заняўшы 38 месца.
І вось цяпер новы поспех у рэйтынгу Webometrics. Безумоўна, нам прыемна ўсведамляць, што мы чарговы раз трапляем у 2 % найлепшых універсітэтаў свету. Як вядома, арганізатары Webometrics Ranking of World Universities прааналізавалі 22000 вышэйшых навучальных устаноў (усяго ў свеце звыш 30000 ВНУ – заўв. рэд.). Атрыманыя вынікі на працягу адзінаццаці гадоў апрацоўвае іспанская даследчая лабараторыя Laboratorio de Internet. Дадзеныя абнаўляюцца два разы ў год: у студзені і ліпені. Вышэйшыя навучальныя ўстановы ранжыруюцца па чатырох паказчыках, якія характарызуюць узровень навуковых публікацый і прысутнасць універсітэтаў у сусветнай навукова-адукацыйнай інтэрнэт-прасторы: «уплыў» – цытаванасць сайта, «прысутнасць» – памер сайта, «адкрытасць» – колькасць файлаў па дадзеных пошукавай сістэмы Google і «якасць» – колькасць публікацый супрацоўнікаў універсітэта па дадзеных Scopus, што патрапілі ў 10 % найбольш цытаваных у свеце. У прыватнасці, у нас істотна палепшылася бачнасць у інтэрнэце (спасылкі), што тлумачыцца нашай актыўнай пазіцыяй па прасоўванні БДУ ў сетцы. Пры гэтым па параметры «адкрытасць», які характарызуе наяўнасць навучальных і навуковых матэрыялаў на сайце ўніверсітэта, БДУ займае 38 месца ў свеце.
І тут вялікі ўклад нашай фундаментальнай бібліятэкі. Яна адна з першых у Беларусі пачала працу па рэгістрацыі ў сусветных базах дадзеных паўнатэкставых навуковых публікацый, навучальных і метадычных матэрыялаў навукоўцаў і выкладчыкаў універсітэта, а таксама часопісаў, якія выдаюцца ў БДУ. Электронная бібліятэка Белдзяржуніверсітэта ўвайшла ў першую сотню найлепшых бібліятэк свету. Гэта першы ў Беларусі паказчык такога ўзроўню».
Акрамя таго, у студзені мінулага года БДУ ўзначаліў рэйтынг айчынных устаноў вышэйшай адукацыі па выніках прыёмнай кампаніі 2013 г. У гэтым даследаванні Міністэрства адукацыі нашай краіны ўдзельнічала 48 беларускіх ВНУ. Дарэчы, другое месца заняў БНТУ, а трэцяе – БДУІР.
Паводле інфармацыі прэс-службы БДУ
