Акцыю ўрачыста адкрылі рэктар Сяргей Абламейка, прарэктар па выхаваўчай рабоце і сацыяльных пытаннях Уладзімір Сувораў, сакратар ПА ГА «БРСМ» з правамі РК БДУ Яўген Харук і запрошаныя госці: міністр адукацыі Міхаіл Жураўкоў, першы сакратар ЦК ГА «БРСМ» Андрэй Белякоў. Госці адзначылі, што дадзеная акцыя з’яўляецца неад’емнай часткай жыцця арганізацыі і ўніверсітэта, бо скіравана на знаёмства моладзі з жыццём, мэтамі і задачамі адной з самых лепшых навучальных устаноў у краінах СНД, а таксама прыцягненне новых абітурыентаў у Беларускі дзяржаўны ўніверсітэт. Сімвалічна, што сярод удзельнікаў акцыі ёсць тыя студэнты, лёсы якіх вызначылі падобныя акцыі, што прайшлі ў папярэднія гады.
На ўрачыстым адкрыцці капітаны камандаў здалі рапарт сакратару БРСМ БДУ пра гатоўнасць каманд да рэалізацыі праекта, а ён у сваю чаргу прадставіў удзельнікаў рэктару. Па традыцыі капітаны камандаў павязалі высокім гасцям шалікі, якія з’яўляюцца атрыбутам дадзенага мерапрыемства і сёлета былі бірузовыя, бо гэты колер сімвалізуе чысціню і імкненне. Пасля ўрачыстага адкрыцця ўдзельнікі адправіліся ў Навагрудак.
Навагрудская адміністрацыя паставілася да арганізацыі праекта з поўнай аддачай. Камфортныя інтэрнаты, найсмачнейшая ежа і цёплыя адносіны – далёка не ўсе фактары, якія прыемна здзівілі студэнтаў. Галоўнае – дзеці, з якімі студэнты працавалі на працягу 3 дзён. Забягаючы троху наперад, хочацца сказаць, што абодва бакі атрымалі мноства пазітыўных эмоцый.
У першы дзень праца камандаў была арганізавана на базах гарадскіх школ, у якіх студэнты прэзентавалі Беларускі дзяржаўны ўніверсітэт, а таксама правялі трэнінгі, ролевую гульню «Сутычка» і спартыўныя спаборніцтвы са школьнікамі старэйшых класаў.
У другі дзень аналагічная праца была праведзена і ў сельскіх школах. Адміністрацыя Навагрудка арганізавала паездку студэнтаў з экскурсіяй на завод «Навагаз», а таксама прадстаўнікі паказалі памятныя гістарычныя месцы горада, распавёўшы пры гэтым шмат цікавай інфармацыі пра фарміраванне і развіццё горада.
Сімвалічна, што ў сёмы раз акцыя праходзіць у год моладзі. Знамянальнай падзеяй 13 сакавіка стала адкрыццё ў Навагрудскім ДК «Года моладзі», непасрэдны ўдзел у якім прымала і пярвічная арганізацыя БРСМ БДУ. Адміністрацыя горада ўручыла пашпарты самым адметным навагрудскім юнакам і юначкам, якія, нягледзячы на свой малады ўзрост, ужо маюць вялікія дасягненні ў сацыяльнакультурным жыцці горада. Таксама напярэдадні Дня Перамогі ветэранам Вялікай Айчыннай вайны былі ўрачыста ўручаны памятныя медалі «70 гадоў Перамогі» і «70 гадоў вызвалення Беларусі ад нямецка-фашысцкіх захопнікаў». Цырымонію ўзнагароджання працягнуў канцэрт, у якім прынялі ўдзел мясцовыя выканаўцы, а таксама народны ансамбль танца «Крыжачок».
У заключнай частцы акцыі камітэт БРСМ БДУ правёў круглы стол з актывістамі Навагрудскага раёна. Падчас ажыўленай размовы сакратары дамовіліся пра супрацоўніцтва ў розных кірунках дзейнасці арганізацый. Яўген Харук запрасіў навучэнцаў наведаць Беларускі дзяржаўны ўніверсітэт 28 сакавіка, калі пройдзе фэст факультэтаў: «Я думаю, што старшакласнікам неабходная жывая гутарка са студэнтамі, бо хто, калі не студэнты, распавядзе найбольш падрабязна пра ўсе без выключэння аспекты вучобы? Для навучэнцаў гэта будзе вельмі карысна, аднак я лічу, што на гэтым нашы зносіны толькі пачнуцца і прывядуць да доўгага і цікавага супрацоўніцтва».
Станіслаў ПІНЧУК
