Студэнты БДУ заваявалі залаты і два бронзавыя медалі на Еўрапейскіх гульнях у Баку і тым самым зрабілі важкі ўнёсак у скарбонку нацыянальнай зборнай.
Першакурсніца юрыдычнага факультэта Алена Амялюсік стала пераможцай у жаночай шасейнай гонцы і прынесла другое «золата» беларускай велакамандзе пасля «пачыну» Васіля Кірыенкі у «раздзелцы».
Дыстанцыю працягласцю 120,7 км новаспечаная чэмпіёнка пераадолела за 3 гадзіны 20 мін. 36 сек. Другой да фінішу з такім жа часам прыйшла полька Катаржына Невядома, а трэцяе месца ў Ганны ван дэр Брэген з Нідэрландаў. Алена Амялюсік вырвала перамогу на апошніх сантыметрах дыстанцыі. Яшчэ дзве беларускі Вольга Антонава і Таццяна Шаракава фінішавалі ў другой групе з вынікам 3 гадзіны 25 мін. 53 сек.
Таксама на рахунку студэнтаў БДУ два бронзавыя медалі па грэка-рымскай барацьбе, заваяваныя прадстаўнікамі таго ж юрыдычнага факультэта пяцікурснікам Віктарам Сасуноўскім і першакурснікам Іосіфам Чугашвілі.
Падчас турніру ў катэгорыі да 80 кг Віктар Сасуноўскі быў мацнейшы за грузіна Лашы Габадзэ, наступным зрынутым супернікам стаў немец Фларыян Ноймаер.
У 1/2 фіналу беларус не змог выйграць у расіяніна Яўгена Салеева, будучага чэмпіёна, і правёў паядынак за бронзавы медаль.У суцяшальным паядынку ён апынуўся мацнейшым за ўкраінца Аляксандра Шышмана. Паядынак за бронзу беларус правёў з відавочнай перавагай. Віктар Сасуноўскі ўжо на старце зарабіў два балы за выкананы накат, а затым яму ўдаўся яшчэ адзін прыём, які практычна забяспечыў перамогу.
Першакурснік юрфака Іосіф Чугашвілі заваяваў бронзу ў вагавай катэгорыі 130 кг.
Падчас турніру ён перамог грэка Аляксандраса Пападатаса, у чвэрцьфінале – вядомага нямецкага атлета Эдуарда Попа, але ў паўфінале саступіў азербайджанцу Сабахі Шарыяці. У паядынку за бронзавую ўзнагароду Іосіф Чугашвілі сустрэўся з грузінскім атлетам Якабі Каджая і змог правесці вырашальны накат.
Трэнерам студэнтаў БДУ выступае старшы выкладчык кафедры фізічнага выхавання і спорту ВНУ Мікалай Прусаў.
У складзе беларускай зборнай выступіў яшчэ адзін студэнт юрфака чацвёртакурснік Джавід Гамзатаў (грэка-рымская барацьба).
Аліна ДАШКЕВІЧ
