Гран-пры, 6 залатых і 13 сярэбраных медалёў, а таксама 2 дыпломы заваявалі распрацоўкі комплексу БДУ на Х Пецярбургскім тэхнічным кірмашы, які праходзіў з 12 па 14 сакавіка.
Спецыяльны прыз – Гран-пры ў намінацыі «Паспяховае прасоўванне тавара на рынак» – на конкурсе «Найлепшы інавацыйны праект і найлепшая навукова-тэхнічная распрацоўка года» заваявала «Тэхналогія электрахімічнага і хімічнага асаджэння функцыянальных пакрыццяў нікель-бор» НДІ фізіка-хімічных праблем БДУ. Яна прызначаная для надання дэталям з розных металічных матэрыялаў ахоўных функцыянальных уласцівасцяў, а таксама для атрымання ахоўных галаграфічных знакаў. Цяпер прадстаўлена некалькі новых варыянтаў гэтай тэхналогіі, як полікрышталічных, так і аморфных пакрыццяў нікель-бор. Акупляльнасць дадзенага праекта пры рэнтабельнасці 25 % і наяўнасці на прадпрыемстве гальванічнага ўчастка з абсталяванай лініяй гальванічнага нікелявання складае меней за 12 месяцаў. Як паказвае практыка, укараненне такога тэхналагічнага працэсу не патрабуе кардынальнага пераабсталявання гальванічных участкаў. На аснове ўласных распрацовак НДІ ФХП стварыў малатанажную і дробнасерыйную вытворчасць. Акрамя таго, прамысловы выпуск наладжаны на двух дзясятках прадпрыемстваў Беларусі, Расіі і Карэі.
Апроч галоўнай узнагароды пецярбургскага кірмашу, сёлета ў скарбонцы БДУ 6 залатых медалёў за: 1) шматфункцыянальны вымяральны комплекс Alma Meter; 2) універсальныя рабатызаваныя комплексы для нанясення ўшчыльняльных контураў па класе IP-65 з поліўрэтанавых і сіліконавых кампазіцый; 3) імпульсныя крыніцы сілкавання для магутных энергаўстановак 1–10 кВт штучныя органы пачуццяў; 4) распрацоўку і выкарыстанне шматэлементных пераламляльных рэнтгенаўскіх лінз; 5) лекавы сродак на аснове нанасамальнага сенсібілізатара новага пакалення для фотадынамічнай тэрапіі новаўтварэнняў з актывацыяй святлом блізкага ІЧ дыяпазону; 6) сумесі для вытворчасці дыетычных узбагачаных макаронных вырабаў для харчавання дзяцей з парушэннем бялковага абмену.
Экспазіцыя БДУ была разгорнутая ў складзе калектыўнага стэнда Міністэрства адукацыі Рэспублікі Беларусь.
На адкрыцці выставы з экспазіцыяй Белдзяржуніверсітэта азнаёміўся губернатар Санкт-Пецярбурга Георгій Палтаўчанка.
Падчас працы Пецярбургскага тэхнічнага кірмашу прадстаўнікі БДУ правялі больш за 30 перамоў і падпісалі 2 пратаколы аб намерах:
– з НВФ «Плазмацэнтр» (г. Санкт-Пецярбург) супрацоўніцтва па праекце распрацоўкі крыніц сілкавання для ўстановак плазменнага напылення;
– з ААТ «Расійскі інстытут магутнага радыёбудавання» (г. Санкт-Пецярбург) супрацоўніцтва па адаптацыі і пастаўцы імпульсных крыніц электрасілкавання з убудаваным мікрапрацэсарам.
За ўнёсак у развіццё навукова-прамысловага комплексу Расіі і актыўны ўдзел у выставе-кангрэсе БДУ ўзнагароджаны дыпломам X юбілейнага Пецярбургскага тэхнічнага кірмашу.
Паводле інфармацыі ГУН
