Традыцыйна ў канцы лютага абнаўляецца Дошка гонару БДУ. Надоечы на ёй змясцілі новыя імёны і фотаздымкі 32 супрацоўнікаў і 32 студэнтаў, якія дасягнулі значных поспехаў у адукацыйнай, навуковай, метадычнай, інавацыйнай, кіраўніцкай і спартыўнай дзейнасці ў мінулым годзе.
У цырымоніі адкрыцця абноўленай Дошкі гонару прыняў удзел рэктар БДУ акадэмік Сяргей Абламейка. Ён адзначыў, што добрая традыцыя існуе ўжо цягам шасці гадоў.
– Сапраўды, гэта самыя лепшыя супрацоўнікі. Мы на рэктараце бачым, колькі добрых кандыдатур вылучаецца ў нас ва ўніверсітэце, і нам заўсёды складана выбраць найлепшых, – адзначыў Сяргей Уладзіміравіч. – Аднак колькасць месцаў на Дошцы гонару абмежавана, і мы не можам размясціць на ёй усіх, хто гэтага варты.
Кіраўнік універсітэта падзякаваў тым, чые фотаздымкі ўпрыгожылі абноўленую Дошку гонару.
Пасля слова ўзялі лаўрэаты – супрацоўнікі і студэнты. Загадчык кафедры дыпламатычнай і консульскай службы ФМА Андрэй Русаковіч адзначыў, што такая традыцыйная форма ўшанавання была неад’емным складнікам нашага жыцця. Ён пажадаў усім лаўрэатам дасягнуць новых вышынь у сваім развіцці, педагагічнай працы і навуковых даследаваннях. А студэнтка 4 курса хімічнага факультэта Яна Дыба заўважыла, што Дошка гонару ў чарговы раз падкрэслівае важнасць асабістага ўкладу кожнага з нас у росквіт нашага ўніверсітэта.
