“Газеты – не згінуць!” БДУ на выставе “СМІ ў Беларусі” [+cлайды]

3 мая, 2018.

БДУ прымае ўдзел у XХII Міжнароднай спецыялізаванай выставе "СМІ ў Беларусі". Праходзіць яна з 3 па 5 мая ў Мінску. Інфармацыйную дзейнасць універсітэта прэзентуюць факультэт журналістыкі і газета "Універсітэт". У прыватнасці, для абітурыентаў падрыхтаваны спецыялізаваны выпуск універсітэцкага выдання. Ён знаёміць будучых студэнтаў з факультэтамі і ўстановамі адукацыі БДУ, а таксама спецыяльнасцямі, па якіх ажыццяўляецца падрыхтоўка ў ВНУ.
Акрамя таго, на стэндзе ўніверсітэта прадстаўлены студэнцкія друкаваныя і электронныя СМІ, фотапрацы навучэнцаў, праекты "PR-кветка" і "Акадэмія PR", навучальная і навуковая літаратура выкладчыкаў факультэта журналістыкі. Таксама адбываецца трансляцыя Студэнцкага тэлебачання БДУ.
У рамках экспазіцыі БДУ праходзіць прэзентацыя спецыяльнасцяў факультэтаў журналістыкі, павышэння кваліфікацыі і перападрыхтоўкі.
У завяршальны дзень выставы, 5 мая, будзе арганізаваны дыялог-дыскусія"Газеты – не згінуць!", прысвечаны Дню друку. Мадэратарамі выступяць студэнты спецыяльнасці "Журналістыка (друкаваныя СМІ)", а для іх калегаў-першакурснікаў правядуць экскурсію "У пошуках месца практыкі" па выставачных пляцоўках.
Выстава "СМI ў Беларусі" штогод збірае найбуйнейшыя айчынныя і замежныя медыя. Сёлета на ёй прадставяць каля 400 сродкаў масавай інфармацыі Беларусі, Расіі, Украіны, Казахстана, Латвіі, Літвы, Польшчы, Кітая, Турцыі і інш.
У рамках мерапрыемства 4 мая ўпершыню адбудзецца Дзень рэгіянальнай прэсы, пройдзе круглы стол, прысвечаны году малой радзімы ў Беларусі.
Арганізатарам выставы выступіла Міністэрства інфармацыі Беларусі пры падтрымцы Міністэрства замежных спраў нашай краіны, Мінскага гарадскога выканаўчага камітэта, "Нацыянальнага выставачнага цэнтра "БелЭкспа".
 
Алена МАРЦУЛЕВІЧ
Фота Васіля Кузьмічкіна і Паўла Пятрышчава
print

Вам таксама можа спадабацца: