Студэнты БДУ ў першы дзень ва ўніверсітэце весяліліся з Nizkiz, частаваліся ласункамі і… чысцілі бульбу! (слайды + відэа)

6 Sep, 2019.

Віват студэнт! Віват БДУ! Менавіта гэтыя словы далі старт штогадовай канцэртнай праграме для першакурснікаў, якая прайшла 1 верасня ў Палацы спорту.

Знаёмства нашых новых студэнтаў з будучай альма-матар пачалося з яркага захапляючага лазернага шоу, парада дэканаў пад гербамі факультэтаў і вітальнай прамовы рэктара Беларускага дзяржаўнага ўніверсітэта Андрэя Караля.

Андрэй Дзмітрыевіч пажадаў кожнаму з першакурснікаў пражыць час навучання ў найлепшай ВНУ краіны як адзіны ўздых і знайсці тут саміх сябе, навучыцца выходзіць за ўласныя межы і глядзець на сябе вачыма іншых людзей, навучыцца чуць і слухаць суразмоўцу, каб тыя веды, якія будуць выпрацоўвацца разам з выкладчыкам, зрабілі кожнага шчаслівым на ўсё наступнае жыццё.

Пасля вітальнага слова кіраўніка ўніверсітэта на сцэну запрасілі студэнтку першага курса Валянціну Хмялеўскую, якая набрала 398 балаў і паступіла на факультэт міжнародных адносін. Ёй выпаў гонар прамовіць урачыстую клятву першакурснікаў і атрымаць сімвалічны студэнцкі квіток пад акампанемент універсітэцкага гімна, які выканала група "Галант".

У другім блоку канцэртнай праграмы вядучыя прадстаўлялі найлепшыя творчыя калектывы нашай ВНУ, а ў трэцяй частцы свята новых студэнтаў віншавалі сваімі выступленнямі зоркі БДУ і беларуская рок-група NIZKIZ.

Саліст групы Аляксандр Ільін распавёў, што яны ўжо другі год запар выступаюць на "Віват студэнт!" і што першакурснікі з цеплынёй прымаюць іх творчасць. "Усе вельмі бадзёрыя, прыгожыя і вясёлыя. Хочацца ім пажадаць заставацца самімі сабой, старацца, і ўсё будзе добра. Ніякіх звышнатуральных рэчаў, проста рабіць тое, што ім падабаецца, сумленна, шчыра, і ўсё атрымаецца!" – такія цёплыя словы перадаў Аляксандр нашым дарагім першакурснікам праз газету "Універсітэт".

Але канцэртная праграма – гэта далёка не ўсё, з чаго складалася мерапрыемства "Віват студэнт!". У холе Палаца спорту размясціліся грамадскія арганізацыі БДУ са сваімі пляцоўкамі. Кожная з іх падрыхтавала для студэнтаў непаўторную забаўляльную праграму.

Так, творчы саюз танчыў разам з першакурснікамі ў гульні Just dance і спяваў караоке, прафкам развіваў у пачаткоўцах трапнасць, хуткасць і кемлівасць у спартыўных актыўнасцях, а потым раздаваў гарантаваныя салодкія прызы. Як выказаўся Максім Цюцянькоў, адзін з арганізатараў пляцоўкі прафкама: "Мы падрыхтавалі менавіта салодкія прызы, каб падсаладзіць нашых студэнтаў, каб яны сталі яшчэ дабрэйшымі, яшчэ весялейшымі. Салодкае заўсёды робіць людзей радаснымі. І наша арганізацыя вырашыла зрабіць іх больш шчаслівымі". Студэнцкі саюз і БРСМ заваблівалі першакурснікаў напоямі, бо на вуліцы стаяла спякота, а ў палацы віравала жыццё. А савет старастаў БДУ наогул зладзіў "Восеньскі прызыў", дзе дзеці змаглі навучыцца ўсяму, што неабходна ўмець сапраўдным старастам.

"Стараста павінен быць акуратным і хуткім, – запэўніў старшыня савета старастаў эканамічнага факультэта Арцём Латышаў, – менавіта таму мы навучаем іх афарбоўцы травы. На наступнай кропцы дзеці вучацца дакладнасці: там яны чысцяць бульбу – таксама вельмі важны занятак. Дзяўчатам, можа, гэта не так актуальна, аднак хлопцам надзвычай актуальна. Але мы імкнёмся, каб кожны чалавек прайшоў гэту школу і стаў нармальным чалавекам і нармальным старастам, і годным студэнтам найлепшай ВНУ нашай краіны".

Кожная грамадская арганізацыя Беларускага дзяржаўнага ўніверсітэта вельмі чакае ў новым навучальным годзе актыўных, пазітыўных і годных студэнтаў, каб заяўляць пра сябе, развівацца, пашырацца і разам скараць усе вяршыні. Бо БДУ – гэта не толькі адукацыя. БДУ – гэта адна вялікая сям'я.

Анастасія БАЛТОЎСКАЯ

print

Вам таксама можа спадабацца: