Студэнты і супрацоўнікі БДУ паставілі спектакль «Белы анёл Масквы»

15 Nov, 2019.

Выступленне сарвана! Рэжысёр-пастаноўшчык у выкананні Ірыны ІВАШКА кідаецца, хапаючыся то за тэлефон, то за галаву. Спакойна, так задумана «КЛУмБай»: пачатак пастаноўкі па аднайменнай п’есе Рымы Кашурнікавай чапляе. Актывісты аб’яднання разам з супрацоўнікамі ўніверсітэта паказалі на выставе «Жыццё як дарога, поўная святла», прысвечанай княгіні Елісавеце Фёдараўне Раманавай. Выставачнай залай і імправізаванай сцэнай стаў хол паверха на хімічным факультэце.

У БДУ гэта выстава праходзіць не першы раз. Увесну яна пабывала на шматлікіх факультэтах, кнігу водгукаў запоўнілі цёплыя каментарыі. А калі з’явілася магчымасць яшчэ раз прывесці ўпадабаную студэнтамі выставу, арганізатары задумаліся пра новы фармат да 155-годдзя з дня нараджэння Елісаветы. Упраўленне выхаваўчай работы з моладдзю прапанавала творчае супрацоўніцтва Фундаментальнай бібліятэцы БДУ.

Нават на хімфаку ёсць месца для духоўнасці і духоўнага развіцця, і гэтыя магчымасці такія ж, як і хімічныя, – усміхаецца намеснік дэкана па выхаваўчай рабоце Жанна ЦАБКАЛА, якая дапамагала з арганізацыяй выставы на хімічным факультэце.

За аснову ўзялі п’есу пісьменніцы Рымы Кашурнікавай «Белы анёл Масквы», якая распавядае пра жыццё Вялікай княгіні Лісаветы Фёдараўны. У пастаноўцы прынялі ўдзел студэнты і выпускнікі БДУ Кацярына Стройлава, Кацярына Роўда, Аляксандр Паршанкоў, Ала Валюк, Данііл Кляшторны, Ірына Івашка.

У стварэнні творчай часткі дапамагалі і сёстры міласэрнасці са Свята-Елісавецінскага манастыра. «Студэнты вельмі натхніліся гэтай ідэяй, яны жывуць сваімі героямі, п’есай, за час яе падрыхтоўкі і пастаноўкі яны нават крыху памяняліся, сталі мудрэйшымі», – гаворыць сястра міласэрнасці Зінаіда ЛОБАСАВА. Нядаўна група студэнтаў з сястрой Марынай ЯСКЕВІЧ ездзілі ў паломніцкую паездку і дакрануліся да мошчаў Елісаветы Фёдараўны. «Мы былі ў Наваспаскім манастыры, дзе пахаваны яе муж, вялікі князь Сяргей Аляксандравіч – так замілавальна: на яго пахаванні аналойчык з партрэтам матухны Елісаветы», – гаворыць яна.

Пра пастаноўку распавяла вядучы бібліятэкар Ірына ШКІРОНАК:

– Прадстаўленне складаецца з дзвюх частак. Тэкст для першай часткі – калектыўная праца фундаментальнай бібліятэкі і «КЛУмБы». Гэта паэтычная кампазіцыя з вершаў духоўна-маральнай тэматыкі, галоўным чынам клумбаўцаў. А вось другая частка пастаноўкі – урывак з п’есы «Белы анёл Масквы».

Дзеянне першай часткі адбываецца ў наш час: бедны рэжысёр, у якога заўтра спектакль «Белы анёл Масквы», а акцёры затрымаліся за мяжой, у парку сустракае клумбаўцаў. Яны чытаюць свае вершы, паказваючы талент дэкламавання, чым пераконваюць рэжысёра ўзяць іх на заўтрашнюю пастаноўку. Тут, на другой частцы пастаноўкі, глядач пераносіцца ў Пецярбург, дзе Елісавета піша ліст бацьку пра тое, што збіраецца прыняць праваслаўе, а муж вялікі князь Сяргей радуецца гэтай навіне.

Пра сваю гераіню Алікс (сястру Елісаветы, будучую імператрыцу Расійскай імперыі Аляксандру Фёдараўну) распавяла студэнтка філалагічнага факультэта Ала ВАЛЮК

– На выставе я была ўвесну, а праз паўгода, калі я больш даведалася пра яе лёс, адчула праз ролю – гэта невымоўныя эмоцыі. Алікс, мая гераіня, родная сястра княгіні Елісаветы – гэта шчырая наіўнасць, вера ў тое, што ўсё выдатна, светлы праменьчык у п’есе на кантрасце рэзкіх вобразаў іншых.

А кніга водгукаў папоўнілася новымі рэплікамі. Вось як выставу ўбачылі студэнты 3 курса факультэта журналістыкі: «Унікальныя фатаграфіі, інтэр’ер, які нібы вяртае нас на сто гадоў назад у той складаны час, у якім жыла і дапамагала людзям святая вялікапакутніца Елісавета».

Надзея МАРХЕЛЬ

print

Вам таксама можа спадабацца: