БДУ ўвайшоў у топ-25 надзейных партнёраў Міністэрства адукацыі Кітая

Спіс уключае аўтарытэтныя ВНУ свету, адзначаныя дадзеным статусам і высокай ацэнкай дзейнасці. Усяго кітайскае ведамства вылучыла 25 давераных універсітэтаў для заключэння пагадненняў аб сумеснай падрыхтоўцы спецыялістаў, запатрабаваных у прыярытэтных галінах кітайскай эканомікі. Сімвалічна гэты топліст адлюстраваны на тэматычнай Сцяне даверу ў Міністэрстве адукацыі КНР, куды БДУ занесены першым.

Статус БДУ як надзейнага партнёра замацаваны ў пагадненні аб стратэгічным супрацоўніцтве з Кітайскім цэнтрам адукацыйных абменаў Міністэрства адукацыі КНР. Цырымонія падпісання адбылася 6 лістапада падчас афіцыйнага візіту дэлегацыі беларускай ВНУ на чале з рэктарам Андрэем Каралём у Кітай.

– Уваходжанне ў спіс 25 ВНУ-партнёраў Міністэрства адукацыі КНР – гэта прызнанне на высокім узроўні якасці і аўтарытэту БДУ, адлюстраванне высокага рэйтынгу даверу да беларускага ўніверсітэта і адукацыі, – пракаментаваў Андрэй Кароль ацэнку кітайскіх калег.

Пагадненне аб стратэгічным супрацоўніцтве, са слоў рэктара, прадугледжвае ўзаемадзеянне двух бакоў у галіне міжнароднага адукацыйнага абмену. Гаворка ідзе пра рэалізацыю сумесных праектаў у сферы акадэмічнай мабільнасці студэнтаў і выкладчыкаў. Гэта распрацоўка праграм па падрыхтоўцы кітайскіх грамадзян да навучання ў БДУ, правядзенне для іх кансультацый, адаптацыйных мерапрыемстваў. Таксама ў дакуменце разглядаюцца магчымасці абмену інфармацыяй і вопытам, работы з выпускнікамі, павышэння іх канкурэнтаздольнасці на рынку працы і інш.

Першым крокам да рэалізацыі вызначаных мэт стала адкрыццё сэрвіснага цэнтра БДУ на базе Кітайскага цэнтра адукацыйных абменаў.

– Гэта наша афіцыйнае прадстаўніцтва ў Кітаі, – падкрэсліў Андрэй Кароль значнасць дзейнасці новай структуры. Яна дазволіць кітайскім грамадзянам лепш даведацца пра БДУ, пашырыць іх кантынгент ва ўніверсітэце, а таксама ўмацаваць партнёрскія сувязі дзвюх краін. У прыватнасці, плануецца правядзенне прафарыентацыйных мерапрыемстваў для кітайскіх абітурыентаў па пытаннях паступлення і навучання ў беларускай ВНУ. Дарэчы, сёння, са слоў Андрэя Караля, асаблівая цікавасць да БДУ адзначана з боку кітайскай моладзі. Ва ўніверсітэце навучаюцца каля 3,8 тысяч грамадзян Паднябеснай. Актыўна вядзецца праца па рэалізацыі новых сумесных адукацыйных праграм, навуковых даследаванняў і канферэнцый.

Яшчэ адной важнай падзеяй візіту дэлегацыі БДУ ў Кітай стаў удзел у Пекінскім форуме «Гармонія цывілізацый і росквіт для ўсіх». Маштабнае навуковае мерапрыемства прысвечана тэме суіснавання цывілізацый у эпоху лічбавага інтэлекту. Яно арганізавана ў 22 раз і прайшло пад эгідай Пекінскага ўніверсітэта, Пекінскай муніцыпальнай камісіі па адукацыі і Інстытута перспектыўных даследаванняў Чэя. Традыцыйна форум збірае каля 500 навукоўцаў, вядучых экспертаў у галіне адукацыі, эканомікі, палітыкі, гісторыі прыблізна з 60 краін і з’яўляецца ўнікальнай пляцоўкай для дыялогу па сучасным трэндзе развіцця чалавецтва. Сёлета міжнародная сустрэча накіравана на абмеркаванне тэхналагічных інавацый, выкарыстанне лічбавых інструментаў для паляпшэння супрацоўніцтва ў эпоху хуткіх змен.

Усяго працавалі 13 секцый форуму. На секцыі «Адукацыя праз 10 гадоў: практыкі і рэфлексіі ў эпоху лічбавага інтэлекту» з тэматычным дакладам «Штучны інтэлект у люстэрку адукацыі: праблема дыялогу» выступіў Андрэй Кароль. Кіраўнік беларускай ВНУ адзначыў актуальнасць і своечасовасць заяўленай тэматыкі. З пазіцыі педагогікі, на думку навукоўца, нейрасеткі маюць розныя наступствы для чалавека і сістэмы адукацыі ў цэлым. Шмат у чым штучны інтэлект з’яўляецца сур’ёзным бар’ерам для развіцця інтэлектуальных і фізічных здольнасцяў, творчых навыкаў, умення весці дыялог і ўзаемадзейнічаць.

– Лічбавыя тэхналогіі працуюць на эканомію часу, але на шкоду комплекснаму фарміраванню асобы, – растлумачыў прафесар.

Пры гэтым правільны педагагічны падыход укаранення штучнага інтэлекту ў навучальны працэс адкрывае вялікія магчымасці. Для гэтага важна сфарміраваць у выкладчыка патрэбныя кампетэнцыі, якія дазволяць яму быць своеасаблівым арганізатарам дыялогу студэнта са штучным інтэлектам. Выкладчыку важна «перазапусціць» навучальныя праграмы з акцэнтам на інтэрактыўны адукацыйны кантэнт і ўкараненне ШІ. У БДУ, як растлумачыў Андрэй Кароль, на рашэнне дадзеных задач накіравана сістэма эўрыстычнага навучання на аснове дыялогу. Адным з яе прызначэнняў з’яўляецца фарміраванне эўрыстычных кампетэнцый, якія дазваляюць быць «адкрытым» да інавацый, іх укаранення і стварэння ўмоў для ўсебаковага развіцця студэнта.

– Вельмі важна навучыць выкладчыка гэтаму. У БДУ мы гэта робім на пастаяннай аснове, праводзім навучальныя семінары, курсы, – зрабіў акцэнт Андрэй Кароль.

Таксама ў рамках візіту ў Кітай для пашырэння міжнародных сувязяў, узмацнення экспартнай лініі, стварэння дадатковых сэрвісаў для замежных студэнтаў кіраўніцтва БДУ правяло шэраг двухбаковых сустрэч з кітайскімі партнёрамі, сярод якіх Кітайскі цэнтр адукацыйных абменаў Міністэрства адукацыі Кітая, Пекінскі цэнтр замежных талентаў пры Міністэрстве працоўных рэсурсаў і сацыяльнага забеспячэння, сталічны педагагічны ўніверсітэт, Наньчанскі авіяцыйны ўніверсітэт, Хайнанскі інстытут праграмных тэхналогій, Пекінскі ўніверсітэт.

Паводле інфармацыі прэс-службы БДУ