«Сістэма прафесійных кампетэнцый сучаснага лідара ў сферы навукі і адукацыі» – пад такой назвай стартавала навучальная праграма павышэння кваліфікацыі школы лідараў, якая прайшла з 3 па 7 лютага ў БДУ.
На гэты раз «яўка» для выкладчыкаў была «абавязковай», ды і арганізацыя праграмы спецыяльна была запланавана на канікулярны перыяд, калі тыя не загружаны лекцыямі і могуць заняцца сваім асабістым прафесійным ростам. Удзельнікі школы лідара ўпершыню атрымалі пасведчанне аб павышэнні кваліфікацыі дзяржаўнага ўзору.
Нагадаем, што ў чэрвені мінулага года ўпраўленне кадраў таксама выступала каардынатарам такога мерапрыемства і сабрала супрацоўнікаў, якія ўключаны ў рэзерв кіраўнічых кадраў БДУ. Наталля Няпеўная, начальнік упраўлення кадраў, патлумачыла, што навучальную праграму павышэння кваліфікацыі складалі, улічваючы пажаданні «рэзервістаў», выказаныя падчас працы мінулай школы лідараў. Было высветлена, што маладыя выкладчыкі хочуць у першую чаргу ўдасканаліць свае прафесійныя навыкі, а некаторыя з іх нават імкнуцца атрымаць новую кваліфікацыю. Большасць выступіла за асваенне новых метадаў, тэхналогій і элементаў прафесійнай дзейнасці.
Прафесійныя кампетэнцыі сучаснага навукоўца-лідара на пачатку працы школы лідара 2014 года акрэсліў у сваім выступленні першы прарэктар Міхаіл Жураўкоў.
Зразумела, што новае ў працы выкладчыка і навукоўца апошнім часам звязана з выкарыстаннем IT-тэхналогій і камп’ютарызацыяй навучальнага працэсу. Таму найбольшую цікавасць сёлета выклікала лекцыя-семінар, якая пазнаёміла прысутных з тэхналогіямі стварэння электроннага вучэбна-метадычнага комплексу (ЭВМК).
Да ўсяго «рэзервістам» расказалі пра такі новы сродак камунікацыі, як вэбінар, які можа стаць эфектыўным у навучанні і навукова-даследчай 
дзейнасці. Усяму гэтаму пастаралася навучыць дацэнт кафедры інфармацыйных тэхналогій Рэспубліканскага інстытута інавацыйных тэхналогій БНТУ Ірына Стралкова. Ствараць электроннае партфоліа і надаваць належную ўвагу навукаметрычным паказчыкам даў параду на сваіх практычных занятках намеснік начальніка аддзела інфармацыйна-аналітычнага і тэхналагічнага забеспячэння адукацыйнай дзейнасці БДУ Уладзімір Галынскі.
Асаблівасцю сёлетняга мерапрыемства стала відэалекцыя на тэму адкрытай адукацыі, якую правёў член праўлення Еўрапейскай асацыяцыі па якасці электроннай адукацыі (EFQUEL) Алістэр Крылман (Швецыя). Пра ролю вэб-сэрвісаў у працы выкладчыка расказаў начальнік медыяцэнтра БДУ дацэнт кафедры тэхналогій камунікацый факультэта журналістыкі Павел Салаўёў. Дарэчы, для таго, каб мець магчымасць працаваць з матэрыяламі, «рэзервісты» сёлета захапілі з сабой на заняткі партатыўныя камп’ютары і іншыя гаджэты.
Пытанні абароны аўтарства навуковых распрацовак турбавалі маладых выкладчыкаў і навукоўцаў яшчэ на мінулай школе лідара. Таму праблемам прававой аховы вынікаў навуковай дзейнасці быў прысвечаны круглы стол, на які былі запрошаны лектары прававых дысцыплін з БДУ, а таксама вядучы навуковы супрацоўнік Нацыянальнага цэнтра заканадаўства прававых даследаванняў Рэспублікі Беларусь Сяргей Лосеў і галоўны спецыяліст аддзела аўтарскіх і сумежных правоў упраўлення права і 
міжнародных дамоў Нацыянальнага цэнтра інтэлектуальнай уласнасці Кацярына Янцікава.
Усім удзельнікам школы лідара прыйшліся даспадобы трэнінгі. Яны якраз і рыхтавалі іх да кіраўнічых пасад. Спадабаўся семінар-трэнінг «Кейс-метад: як ствараць і эфектыўна выкарыстоўваць кейсы» дацэнта кафедры агульнай і клінічнай псіхалогіі БДУ Алега Радзюка, які выступаў перад такой аўдыторыяй у другі раз. Цёпла сустрэлі слухачы яшчэ аднаго знаёмага лектара, коўч-кансультанта Уладзіміра Глушакова, які працуе дацэнтам кафедры эканомікі прадпрымальніцтва і права ІПКПЭК БДЭУ. Яго семінар-трэнінг быў прысвечаны метадам кіравання канфліктамі, а таксама міжасабовым і прафесійным камунікацыям кіраўніка.
Сёлета ўпраўленне кадраў упершыню арганізавала комплексную псіхадыягностыку адміністратыўнага патэнцыялу «рэзервістаў», якая павінна дапамагчы ў будучыні правільна падабраць і рацыянальна расставіць кадры.
Апытанне сярод удзельнікаў мерапрыемства дало магчымасць арганізатарам высветліць, як тыя ацэньваюць пабудову навучальную праграму школы лідара. Больш за палову рэспандэнтаў ацанілі яе высока і адказалі, што змогуць выкарыстаць атрыманыя веды ў сваёй практычнай дзейнасці. Многім з іх спадабаўся вэбінар «Адкрытая адукацыя», а таксама трэнінг кіравання канфліктамі. Новую навучальную праграму «Сістэма прафесійных кампетэнцый сучаснага лідара ў сферы навукі і адукацыі» большасць «рэзервістаў» (38,3 %) ацаніла на «васьмёрку», некаторыя (25 %) паставілі складальнікам праграмы «дзявятку». Былі і тыя (3,33 %), хто паставіў «дзясятку». Арганізатараў гэта вельмі абнадзеіла. І яны засведчылі: «Школе лідара быць і надалей».
Ганна ЛАГУН
Фотарэпартаж пра школу лідара глядзіце тут
Відэасюжэт з месца падзеі пабачце ніжэй
