Калядны дабрачынны баль разгарнуўся напярэдадні ў холе філалагічнага факультэта Беларускага дзяржаўнага факультэта.
Як распавяла карэспандэнту агенцтва “Мінск-навіны” арганізатар мерапрыемства Анастасія Нікіціна, калядны баль праводзіўся ўжо ў пяты раз. Сёлета ён меў адкрыты фармат – удзельнікам мог стаць студэнт любой сталічнай ВНУ.
— Галоўная ўмова – наяўнасць запрашальнага квітка. Дзякуючы іх рэалізацыі мы зможам аказаць фінансавую падтрымку выхаванцам Асіповіцкай дзяржаўнай спецыяльнай агульнаадукацыйнай школы-інтэрната для дзяцей з парушэннем функцый апорна-рухальнага апарата, – адзначыла суразмоўніца.
Праграму адкрылі вальсам дэбютантак. Ружовашчокія першакурсніцы філфака і курсанты Беларускай дзяржаўнай акадэміі авіяцыі прадэманстравалі сваё танцавальнае майстэрства. Да выступлення яны рыхтаваліся цэлы месяц.
Падтрымалі святочную атмасферу ансамбль скрыпачоў, саксафаніст і саліст групы HURMA Мікіта Найдзёнаў.
Прыйшлі павіншаваць дзяцей Вясёлы Капялюшнік з казкі “Аліса ў Краіне цудаў” і Леанід Ільіч Брэжнеў.
Усе дзяўчаты і хлопцы на балі прытрымаліся дрэс-коду: прыйшлі ў вячэрніх сукенках і строях. У топ-5 самых цікавых пар вечара, на наш погляд, патрапілі наступныя ўдзельнікі.
Яраслаў і Юлія
— Яраслаў мім цяпер, таму не можа размаўляць. Калі мы пазнаёміліся, ён таксама быў мімам, – з усмешкай распавядае Юлія. – Гэта было на Хэлоўін. Мы часта ўдзельнічаем у дабрачынных мерапрыемствах.
— У дзіцячы дом ездзілі ў Івянцы, – не вытрымлівае хлопец. – Яшчэ нядаўна былі ў лофт-праекце “Бэлькі” на адкрыцці фотавыставы “Сонечная прафесія”. На ёй выстаўлены фатаграфіі дзяцей з сіндромам Даўна, якіх захавалі ў амплуа тых, кім яны хацелі б быць, калі будуць дарослымі.
Кірыл, Юлія і Ксюша
Кірыл і Юлія – першыя Кароль і Каралева каляднага балю. Сёння яны вырашылі ўспомніць мінулае і прыйшлі на імпрэзу ўжо разам з двухгадовай дачкой Ксюшай.
— У нас доўга не было магчымасці патрапіць на баль, але сёння вырашылі аднавіць традыцыю, – кажа Юлія.
— Пазнаёміліся ў Смалявічах. Тады ў Юлі быў хлопец, ды і ў мяне была дзяўчына, – успамінае Кірыл. – Пераглянуліся і… лёсы нашы спляліся. У дабрачыннасці ўдзельнічаем увесь час. У нас няма мэты дапамагчы камусьці адрасна – ахвяруем сродкі царкве, якая размяркоўвае іх туды, куды неабходна.
Яўген і Вольга
Наступная пара выпраменьвала пачуццёвасць і запал, гэтым яны і прыцягнулі ўвагу. Ды і шыкоўная сіняя пышная сукенка дзяўчыны прыкоўвала погляд. Маладыя людзі распавялі сваю гісторыю.
— Мы знаёмыя ўсяго два тыдні, – збянтэжана сказаў Яўген.
— А я распавяду! – бойка заяўляе дзяўчына. – Стаяла неяк на платформе ў метро і ўбачыла прыгожага хлопца. Паглядзела і забылася, не думала зусім пра яго. Ведаеце, бывае такі мімалётны погляд… А потым Жэня падышоў да мяне ўжо ў вагоне і папрасіў нумар тэлефона. Сходзілі ў кавярню, пагутарылі, зразумелі, што падабаемся адзін аднаму. А на баль вырашылі прыйсці, таму што я заўсёды за дабрачыннасць. І Жэню паклікала з сабой.
Аляксандр і Дыяна
— Мы стаялі на аўтобусным прыпынку, – наперабой пачынаюць распавядаць яны.
— І ў нас адначасова зазванілі тэлефоны, – з усмешкай працягвае Саша. – А яшчэ стаялі аднолькавыя рынгтоны. Падумалі, што гэта лёс. На баль прыйшлі, каб патанчыць. Думаем, гэта нас аб’яднае яшчэ больш.
Наступная пара стала Каралём і Каралевай балю, а яшчэ дзяўчыну ў гэты вечар чакала рамантычная неспадзеўка.
Мікалай і Юлія
— Мы пазнаёміліся на “Візітоўках першакурснікаў–2013” філалагічнага факультэта. Я была адным з арганізатараў мерапрыемства, а Колю разам з яго сябрам запрасілі выступіць з танцам. Сталі сустракацца. Потым пачалася падрыхтоўка да балю, і Коля нечакана запрасіў мяне туды. Да гэтага ў мяне яшчэ ніколі не было партнёра на балі, таму што падчас мерапрыемства арганізатарам зусім не да танцаў. Той вечар мы правялі разам… Сёння, дарэчы, роўна два гады, як мы разам, – падзяляецца Юлія. – Ідэя гэтага мерапрыемства нарадзілася пяць гадоў назад. З першага балю я заўсёды дапамагала, прыдумляла ідэі, рэалізоўвала іх разам з выдатнай камандай. Два балі запар была галоўным арганізатарам. Летась перадала паўнамоцтвы Анастасіі Нікіцінай. У нас з Колем не стаяла пытанне, ісці ці не. Такое немагчыма было прапусціць!
Мікалай зрабіў Юлі прапанова рукі і сэрцы на Калядным балі.
— Я ведала, што аднойчы гэта адбудзецца, але не магла прадбачыць, у які менавіта момант. Як толькі Коля пачаў прамаўляць, адразу здагадалася, што цяпер штосьці адбудзецца, таму што не кожны раз пры яго словах спрацоўвае дым-машына і выходзіць скрыпачка. Мяне ўразіла тое, што прыйшлі яшчэ і нашы сябры. Яны хавалі ад мяне такую таямніцу некалькі месяцаў, уяўляеце? Але мне гэта вельмі прыемна, таму што я люблю быць у курсе ўсіх падзей і мяне складана здзівіць. Гэта была найлепшая неспадзеўка ў маім жыцці! Пачуваюся самым шчаслівым чалавекам у свеце! – падзялілася ўражаннямі дзяўчына.
Вольга ДЗЯЖНЁВА
Фота Марыі Рольскітэ
