Пошук першага месца працы для многіх маладых спецыялістаў – сапраўднае выпрабаванне. Выяўляецца няўменне правільна скласці рэзюмэ, прэзентаваць сябе і, вядома, адсутнасць досведу. Як з сумам жартуюць выпускнікі, а дзе гэты досвед узяць, калі без яго на працу не бяруць. Знайсці выйсце прапануе цэнтр кар’еры БДУ, які праводзіць для студэнтаў практыкум «Пошук працы», дзе кожны ахвотнік можа не толькі атрымаць неабходныя для пабудовы кар’еры веды, але і прайсці рэальнае сумоўе, не выходзячы з аўдыторыі.
– Мы шукаем любыя шляхі ўзаемадзеяння з заказчыкамі кадраў, з працадаўцамі для таго, каб працаўладкаваць нашых студэнтаў, – распавядае намеснік начальніка ўпраўлення кадраў БДУ Вераніка Дабравольская. – Ідэя гэтага практыкума з’явілася дзякуючы начальніку нашага ўпраўлення Наталлі Няпеўнай, якая заўсёды глядзіць наперад і разумее, што выпускнікам трэба дапамагаць, у тым ліку паказваць, як выбудоўваць свае адносіны з будучымі працадаўцамі, з кампаніямі.
Практыкум складаецца з лекцыйных і практычных заняткаў, якія праводзіць запрошаны выкладчык Сяргей Бакулін, кіраўнік праекта kandidat.by, спецыяліст у галіне падбору персаналу. Ён дзеліцца з удзельнікамі актуальнай інфармацыяй пра рынак працы, распавядае пра каналы пошуку вакансій і нюансы таго, як скласці рэзюмэ, калі няма досведу працы:
– Працадаўца не заўсёды шукае чалавека з досведам, часта ён у пошуку супрацоўніка, які блізкі яму па духу, падыходзіць па нейкіх асабістых якасцях і гатовы працаваць над нейкай ідэяй ці праектам. Гэтым крытэрыям можа адпавядаць і студэнт, таму я раю выпускнікам адгукацца на вакансіі, нават калі няма адпаведнага досведу працы, бо нават у гэтым выпадку можна паказаць сябе, – тлумачыць спецыяліст. – На працягу вучобы ва ўніверсітэце студэнты выконваюць шэраг праектаў, прычым досыць паспяхова, у іх ёсць нейкія напрацоўкі, якія самі студэнты не заўсёды ўспрымаюць як дасягненне, але насамрэч яны могуць быць вельмі важныя для працадаўцы, галоўнае – пісьменна падаць гэту інфармацыю. Студэнтам, у якіх сапраўды ўжо ёсць некаторыя веды і кампетэнцыі, трэба вучыцца пахваліць сябе ў патрэбны момант, падкрэсліць свае перавагі.
Пасля тэорыі студэнтам прапануюць перайсці да самай важнай часткі заняткаў – практыкі. Бо можна актыўна высылаць кампаніям рэзюмэ і нават атрымліваць запрашэнні на сумоўі, але ўсё адно чуць фразу «мы вам ператэлефануем».
– Часцей за ўсё адмовы бываюць таму, што чалавек не ведае пэўных правілаў паводзін на сумоўі, не ўмее выгадна сябе прадставіць або не разумее, што існуюць вакансіі з нізкім парогам патрабаванняў, таму на іх адгукаецца вельмі вялікая колькасць людзей, і тут трэба ўмець вылучыцца на фоне іншых, – кажа Сяргей Бакулін.
На рэальных сумоўях, як правіла, ніхто не будзе тлумачыць прычыну адмовы і тым больш – разбіраць вашы памылкі. Таму, каб не набіваць гузоў раней часу, удзельнікам прапануюць падрыхтавацца: да практычных заняткаў, напрыклад, яны знаходзяць цікавыя для іх вакансіі і складаюць пад іх рэзюмэ, а наколькі яны адпавядаюць адзін аднаму, правярае выкладчык і паказвае на месцы, што патрабуюць карэкціроўкі.
Своеасаблівым іспытам для тых, хто засвоіў курс, з’яўляецца speed-meeting: HR-спецыяліст таго сегмента рынку працы, які адпавядае спецыяльнасці ўдзельнікаў, студэнт у якасці кандыдата, і пяць хвілін на самапрэзентацыю – умовы максімальна набліжаныя да рэальных. Унікальнасць такіх сумоўяў у тым, што ў выніку інтэрв’ю студэнт абавязкова атрымае зваротную сувязь ад спецыяліста. Даведацца, як гэта працуе, мы адправіліся на speed-meeting да студэнтаў факультэта радыёфізікі і камп’ютарных тэхналогій. Да іх, дарэчы, прыйшлі два рэкрутара – выдатная магчымасць пераканацца, што ў кожнага спецыяліста свае падыходы да правядзення інтэрв’ю, якія могуць залежаць нават ад карпаратыўнай культуры кампаніі. З аўдыторыі пасля сумоўя з адным з рэкрутараў выходзіць студэнт 4 курса ФРКТ Аляксандр Міско:
– Сумоўе прайшло даволі прадуктыўна. Мне паказалі моманты ў рэзюмэ, якія трэба дапрацаваць, далі рэкамендацыі, у якіх напрамках я магу атрымаць дадатковыя веды, каб вырасці як спецыяліст, параілі падняць свой узровень англійскай мовы. Мы з рэкрутарам абмяняліся кантактамі і дамовіліся, што праз чатыры месяцы ён даведаецца пра мае вынікі, – дзеліцца малады чалавек і займае чаргу на сумоўе да другога спецыяліста. У Аляксандра ёсць час, каб прааналізаваць досвед папярэдняга інтэрв’ю і падкарэкціраваць сваю прэзентацыю. Вынік уражлівы – спрабуючы прайсці сумоўе ў другі раз, ён робіць уражанне на рэкрутара, і той гатовы разгледзець яго як кандыдата на пазіцыю Junior у кампанію:
– У выпадку з Аляксандрам у мяне было адчуванне паўнавартаснага сумоўя, таму што чалавек прыйшоў падрыхтаваны ва ўсіх адносінах. Мне вельмі спадабалася, як было структуравана рэзюмэ, яго было камфортна праглядаць падчас сумоўя, што важна, калі ўлічваць, што азнаёміцца з інфармацыяй загадзя не было магчымасці. Яшчэ малады чалавек адразу ж абмаляваў свае моцныя і слабыя бакі, выказаў жаданне, як ён, уласна, хоча развівацца і якія ў яго для гэта ўжо ёсць навыкі, а таксама здольнасці, што ён ужо вывучыў і ўмее, – каментуе Ірына Аніскевіч, спецыяліст па падборы персаналу кампаніі «ТПК-Софт». – Насамрэч, я прыемна ўражана, таму што студэнты прыйшлі на сумоўе вель-мі падрыхтаваныя, упэўненыя, яны рознабакова развітыя, многія з іх разумеюць, куды хочуць рухацца, з чым хочуць працаваць, і ўжо маюць адпаведныя навыкі. Праўда, некаторыя дапускалі памылкі падчас інтэрв’ю, напэўна, блытала хваляванне: забывалі прадстаўляцца і адразу пачыналі казаць пра сябе, прыносілі з сабой рэзюмэ, але забывалі аддаць яго. Яшчэ адзначу такі момант, што не ўсе выпуск-нікі вызначыліся, на якую менавіта вакансію яны прэтэндуюць. Калі спрабуеш канкрэтызаваць, адказваюць, што ім і тое цікава, і гэта, чакаюць, калі ім штосьці прапануюць. На рэальным сумоўі такія рэчы ці наўрад ці спрацуюць, таму трэба выразна разумець, што ты шукаеш, чаго хочаш, што можаш для гэтага зрабіць і што можаш даць кампаніі.
Практыкум ужо прайшлі студэнты ФФСН, ФРКТ, эканамічнага і біялагічнага факультэтаў. І калі пакуль не ўсе з іх атрымалі прапановы ад працадаўцаў, то ўсе сапраўды ведаюць, з чаго пачынаць пошук працы і пабудову сваёй кар’еры. Неўзабаве заняткі па працаўладкаванні распачнуць студэнты гістарычнага факультэта і ФСК. Інфармацыю пра правядзенне практыкума на іншых факультэ-тах можна даведацца ў дэканатах.
Валерыя БАНДАРЧЫК
