Кемлівасць, спрыт і майстар-клас па джамп-стайле на турзлёце БДУ [+cлайды]

5 Jun, 2018.

У маляўнічым месцы, на малой радзіме Якуба Коласа, у дзясяты раз прайшоў студэнцкі турыстычны злёт "Высокі бераг". 15 каманд правялі тры насычаныя дні пад Стоўбцамі.

На турзлёце былі не толькі каманды ад факультэтаў, але і арганізацый БДУ: творчая студыя "МіМ-БДУ", савет стараст і каардынацыйны савет студэнцкага гарадка падужаліся за званне найлепшай каманды. Студэнты змагаліся не толькі ў спорце, але і ў творчасці. Конкурс візітовак, песні ля вогнішча, творчы нумар і агляд лагераў паказалі, якія таленавітыя і крэатыўныя хлопцы і дзяўчаты вучацца ў нашым універсітэце. Тэма гэтага года – "Дзяржаўныя органы". Каманды на некалькі дзён сталі міністэрствамі адукацыі, сельскай гаспадаркі, інфармацыі і г. д. Яны распрацавалі свае інфармацыйны плакат, відэа пра здачу гадавой справаздачы, афармленне лагера і карпаратыўны стыль. Апошняе, дарэчы, ацэньвалася на аглядзе лагераў і "Каша-Battle". У гэтай намінацыі найлепшымі сталі лагеры юрыдычнага і біялагічнага факультэтаў. У конкурсе ваеннай песні перамогу атрымаў хімічны факультэт. Лідар у конкурсе візітовак і творчым нумары – факультэт прыкладной матэматыкі і інфарматыкі.

Спартыўныя спаборніцтвы – неад'емная частка турыстычнага злёту. Каманды змагаліся ў лазертагу, тэхніцы пешаходнага і воднага турызму, спартыўным арыентаванні. Студэнтам трэба было прадэманстраваць сваю кемлівасць, спрыт і навыкі для таго, каб пераадолець складаную мясцовасць і знайсці пікеты, ці прабрацца праз гразкую мясцовасць і праехацца на тросах. У тэхніцы пешаходнага турызму найлепшым стаў БРСМ юрыдычнага факультэта. У спартыўным арыентаванні і тэхніцы воднага турызму – каардынацыйны савет студэнцкага гарадка. 

На турзлёт прыехаў прарэктар па выхаваўчай рабоце і сацыяльных пытаннях Іван Янушэвіч.Ён пажадаў студэнтам добрага адпачынку, а ўвечар на дыскатэцы разам з начальнікам УВРМ Аляксеем Багамазавым прарэктар паказаў запальны майстар-клас па джамп-стайле.

Ужо які год пераможцам турзлёту становіцца біялагічны факультэт. Так адбылося і на гэты раз! На другім і трэціх месцах аказаліся каардынацыйны савет студгарадка і БРСМ ФРКТ. Сакратар БРСМ БДУ Канстанцін Андрусевіч павіншаваў усе каманды з перамогай і плённай працай на турзлёце.

Кацярына Кавалёва, сакратар БРСМ філфака, падзялілася ўражаннем:

"Дзякуй вам усім велізарнае за гэты турзлёт! Мне было прыемна ўбачыць, што каманды прыехалі не толькі адпачыць, але і паказаць сябе. Заўсёды прыемна бачыць, дружныя, пазітыўныя і яркія каманды! Шкада, што часу было так мала: тут ён ляціць непрыкметна".

Сустрэнемся на "Высокім беразе" ў наступным годзе!

Надзея МАРХЕЛЬ

print

Вам таксама можа спадабацца: