Фінал шоу і ўрачыстае ўзнагароджанне ўдзельніц адбыліся 15 сакавіка ў Ліцэі БДУ. Усяго ў адборачным універсітэцкім этапе конкурсу ўдзельнічалі больш за 30 студэнтак БДУ, але за галоўны тытул змагаліся толькі 11 дзяўчат. Яны прадстаўлялі розныя факультэты: біялагічны, філалагічны, юрыдычны, журналістыкі, сацыякультурных камунікацый, а таксама Інстытут бізнесу і Інстытут тэалогіі імя св. Мяфодзія і Кірыла.
Вечар каралеў
Конкурс прайшоў пад слоганам «Краса беларускага краю». Сярод арганізатараў – БРСМ, упраўленні па выхаваўчай рабоце і па справах культуры БДУ.
Нагадаем, удзельніцамі маглі стаць студэнткі ўсіх курсаў БДУ ва ўзросце 18–25 гадоў і ростам ад 165 см, якія:
– займаюцца студэнцкай творчасцю;
– не знаходзяцца ў шлюбе і не выхоўваюць дзяцей;
– не маюць акадэмічнай запазычанасці па выніках папярэдняй экзаменацыйнай сесіі.
Будучыя каралевы, калі вы падыходзіце пад гэтыя крытэрыі, нагадваем вам, што конкурс адбудзецца і ў наступным годзе!
А мы пераносімся ў дзень 15 сакавіка, каб апісаць тое, што адбывалася. Святочную атмасферу вечара падтрымлівалі вакальныя нумары Веранікі Цубікавай, Хелены Мерааі і Віталя Дроба.
У складзе журы былі вядомыя беларускія артысты і прадстаўнікі індустрыі прыгажосці. Членамі судзейскай камісіі сталі: «Міс топ-мадэль Беларусь – 2021» Дар’я Шыбко, першы сакратар Цэнтральнага камітэта БРСМ Аляксандр Лук’янаў, начальнік упраўлення дзяржаўных, афіцыйных і культурных мерапрыемстваў Нацыянальнай школы прыгажосці Лілія Альхоўская, сакратар пярвічнай арганізацыі БРСМ БДУ Міхаіл Дзегцярэнка, начальнік упраўлення па выхаваўчай працы з моладдзю Кацярына Зуева, начальнік аддзела моды і дызайну Нацыянальнага цэнтра мастацкай творчасці дзяцей і моладзі Міністэрства адукацыі Беларусі Ігар Іваноў. Узначаліў журы прарэктар па выхаваўчай рабоце і сацыяльных пытаннях БДУ Іван Янушэвіч.
Удзельніцы выступілі ў трох тэматычных дэфіле: нацыянальных і дзелавых касцюмах, вячэрніх сукенках. Ад сцэны было не адарваць вачэй. Таксама дзяўчаты спаборнічалі ў аратарскім майстэрстве, а пра свае захапленні распавялі ў крэатыўных відэавізітоўках. Ролікі можна паглядзець у суполцы «Каралева студэнцтва БДУ – 2022» «Укантакце».
Каралеўскія вынікі
Хаця галоўных тытулаў усяго два, кожная ўдзельніца конкурсу праявіла сябе на найвышэйшым узроўні. Колькі каралеў з’явілася ў той дзень дзякуючы БДУ!
«Каралевай грацыі» стала другакурсніца юрфака Ангеліна Кароль, «Каралевай таленту» прызнана першакурсніца ФСК Валерыя Слесарчук, у намінацыях «Каралева інтэлекту» і «Каралева фота» перамаглі студэнткі журфака – чацвёртакурсніца Анастасія Феданянкова і першакурсніца Ганна Чарняўская адпаведна. Па выніках анлайн-галасавання ў намінацыі «Каралева глядацкіх сімпатый» выбрана трэцякурсніца юрфака Вераніка Шатрун.
Віншуем дзяўчат і жадаем не страціць натхнення ад конкурсу яшчэ доўгі-доўгі час.
Падбіраемся да галоўных намінацый: другое месца ў конкурсе і званне «Віцэ-каралева студэнцтва БДУ – 2022» атрымала першакурсніца ФСК Паліна Мазынская. Дзяўчына скарыла журы сваім жыццялюбствам і энергічнасцю.
А тытул «Каралева студэнцтва БДУ – 2022» заваявала першакурсніца Інстытута бізнесу Анастасія Сіротка. Што тут сказаць, сама грацыя з чароўнай усмешкай!
Дзяўчаты таксама займелі права прадстаўляць універсітэт на гарадскім этапе Рэспубліканскага міжуніверсітэцкага конкурсу грацыі і артыстычнага майстэрства «Каралева студэнцтва».
Анастасія Сіротка – пра насычаны графік і сяброўства з канкурэнткамі
«Каралева студэнцтва» падзялілася з намі ўражаннямі пра важнае для сябе выпрабаванне. Не кожны дзень перажываеш трыумф на сцэне!
– Калі шчыра, я патрапіла на конкурс выпадкова. Я працую на шматлікіх мерапрыемствах, бо з’яўляюся мадэллю Нацыянальнай школы прыгажосці. Аднойчы мяне заўважыў рэжысёр і параіў паўдзельнічаць у конкурсе БДУ. Так я і стала адной з канкурсантак.
Першы этап кастынгу праходзіў анлайн. Трэба было запоўніць форму і расказаць пра сябе, свае дасягненні і хобі. Таксама форма ўключала ў сябе матывацыйны ліст з адказам на пытанне, чаму менавіта ты павінна стаць «Каралевай студэнцтва БДУ – 2022».
– Што для цябе было самым складаным у падрыхтоўцы да конкурсу?
– Нічога, з чым бы я не змагла справіцца, не было. У нас праходзілі рэпетыцыі дэфіле і творчых нумароў, мы ездзілі на прымеркі касцюмаў для выхаду на сцэну, удзельнічалі ў неверагодных фотасесіях і відэаздымках. Так, графік быў вельмі насычаны, мы крыху стаміліся, але гэта таго было варта.
Атмасфера на конкурсе склалася сяброўская. Нягледзячы на тое што ўсе дзяўчаты былі канкурэнткамі і кожная з нас хацела стаць пераможцай, на працягу ўсёй падрыхтоўкі мы адчувалі сябе адзінай камандай, заўсёды былі рады дапамагчы адна адной. Дзякуючы гэтаму конкурсу я набыла не толькі пазітыўныя эмоцыі, але і новых сяброў.
Само мерапрыемства прайшло гладка. Адзінае, за што я крыху перажывала, – гэта творчы нумар, бо ставіла яго ў сціслыя тэрміны. Але ўсё атрымалася.
– За час удзелу ты, мусіць, пастаянна чула кампліменты. Магчыма, былі словы, якія табе асабліва адгукнуліся?
– Так, было шмат прыемных слоў у мой адрас, але мне запомніўся адзін каментар. Пасля конкурсу мы размаўлялі з адной удзельніцай, і яна сказала такую фразу: «Для мяне было гонарам стаяць з табой на адной сцэне і нават складаць канкурэнцыю. Дзякуй табе вялікі, ты стала для мяне арыенцірам у мадэльнай сферы».
Гэтыя словы кранулі мяне да глыбіні душы. Я зразумела, што рухаюся ў правільным напрамку.
Цяпер я адчуваю сум, таму што падрыхтоўка да такога цудоўнага конкурсу, як «Каралева студэнцтва БДУ», была суцэльным задавальненнем. Мне будзе не хапаць дзяўчат, станоўчых эмоцый і ўсяго, што пражывала на працягу месяца.
Я буду ўдзельнічаць на гарадскім этапе «Каралевы студэнцтва». Для мяне гонар прадстаўляць наш універсітэт.
Паліна Мазынская – пра чалавечую суперсілу і казусы на сцэне
Уражаннямі з намі падзялілася і віцэ-каралева студэнцтва Паліна Мазынская. Пасля «Каралевы студэнцтва БДУ» ў яе засталося шмат пацешных гісторый.
– Гучыць дзіўна, але я ніколі не марыла паўдзельнічаць у падобным конкурсе. Не таму, што мне не падабаюцца такія мерапрыемствы, а таму, што я сябе ў іх не бачыла: нядосыць прыгожая, нядосыць худая… Так, комплекс з-за знешнасці ў мяне быў заўсёды. Асабліва калі ты самая высокая сярод іншых дзяцей у школе. Да нейкага моманту нават вышэй за хлопчыкаў! І даволі буйная па целаскладу.
Але з часам я навучылася ператвараць свае недахопы ў добрыя якасці. Паглядзела на сябе пад зусім іншым вуглом і вырашыла, што трэба спрабаваць нешта новае. Так у мяне ўзнікла жаданне паўдзельнічаць у конкурсе «Каралева студэнцтва БДУ – 2022».
– Як прайшлі кастынг і падрыхтоўка да конкурсу?
– Мне было лёгка праходзіць кастынг у анлайн-фармаце. Калі б я прыйшла і ўбачыла ўсіх дзяўчат ужывую, падумала б: «О, маці, а ты што тут забыла сярод гэтых прыгажунь-мадэляў?»
Я б разгубілася не ад няўпэўненасці, а ад вялікай колькасці прыгажосці. Наогул, я больш люблю жывыя зносіны: бачыць эмоцыі людзей, чуць іх словы, адчуваць энергетыку.
А ў падрыхтоўцы самае складанае – сабрацца маральна, бо вучобу ніхто не адмяняў, трэба ўсё паспяваць. Але я заўважыла, што чым больш у цябе спраў, тым больш прадуктыўнасці і рэсурсу. На кастынгу я казала: «Самая вартая суперсіла – кіраваць часам. Гэта не нешта неверагоднае, і кожны можа гэтым авалодаць».
– Ты пасябравала з іншымі ўдзельніцамі?
– На конкурсе мне трапілася пытанне: «Ці існуе сяброўства ва ўмовах канкурэнцыі?» Я адказала: «Так». Разам са мной была мая добрая знаёмая, з якой мы паспелі пабываць на шматлікіх мерапрыемствах БДУ. Пакуль усе спакойна сядзелі і вучыліся, мы з Лерай Слесарчук дзе толькі ні былі, амаль увесь Мінск вывучылі.
Даволі цёплыя адносіны склаліся ў нас з дзяўчатамі. Мы заўсёды падтрымлівалі адна адну. І дагэтуль можам сустрэцца і пагаварыць пра ўсё.
– А ці былі казусы на конкурсе?
– Мне здаецца, без іх не абыходзіцца любое мерапрыемства. Класіка жанру – гэта маленькія туфлі, у якіх трэба прайсці дэфіле і потым доўга стаяць. А калі больш важкае…
У маім творчым нумары ўдзельнічаў заслужаны аматарскі калектыў Рэспублікі Беларусь «Сярэбраная трэль» з шоў-балетам Extrime. Калектыў ехаў да мяне з іншага горада. Так выйшла, што яны не змаглі прыбыць раней. Мерапрыемства пачалося, а калектыву ў сценах ліцэя яшчэ не было. Рэжысёр сказаў, што калі яны не прыедуць, дык я буду сумна выступаць адна.
І вось ужо ідзе інтэлектуальны конкурс, і я за кулісамі бачу знаёмыя твары. Тады як камень з душы ўпаў!
– Пасля конкурсу ў цябе з’явілася натхненне на новыя здзяйсненні?
– Безумоўна, любое падобнае мерапрыемства надае табе сіл на дасягненне новых вышынь. Я не выключэнне. Таму іду наперад з высока паднятай галавой, ведаючы, што дарогі назад няма. Я не звярну з гэтага шляху.
За час конкурсу я пачула шмат кампліментаў у свой адрас. Маю групу падтрымкі чула ўся зала. Я вельмі люблю людзей, якія надаюць мне столькі ўвагі. Радасна было бачыць са сцэны эмоцыі, якія я выклікала на іх твары.
Я буду ўдзельнічаць у гарадскім этапе «Каралевы студэнцтва». Жадаю годна сябе падаць на больш маштабнай пляцоўцы. Так што да новых сустрэч!
Ксенія САСНІНА
