Каманда «БелСат» Ліцэя БДУ зноў выйшла ў фінал Вышэйшай лігі конкурсу «CanSat у Расіі» і ўлетку ў Дубне запусціць другі спадарожнік.
Гэты папулярны касмічны конкурс для юніёраў праходзіў у студзені ў МДУ імя М. В. Ламаносава. У адборачнай сесіі прынялі ўдзел 30 расійскіх каманд. Беларусь прадстаўляла толькі 1 каманда – якраз ліцэісты БДУ: Дзмітрый Раманавец, Іван Саечнікаў, Уладзіслаў Паўловіч і Мікіта Мішчанка. Нашы хлопцы паспяхова абаранілі сваю навуковую працу на адборачнай сесіі Вышэйшай лігі чэмпіянату праекта «CanSat у Расіі» і атрымалі званні лаўрэатаў, а таксама дыплом 3 ступені.
Нагадаем, запуск свайго першага спадарожніка ліцэісты БДУ ажыццявілі ў маі 2012 г. Аднак сёлета для ўдзельнікаў Вышэйшай лігі прадугледжаныя новыя тэхнічныя патрабаванні. Напрыклад, у хуткім часе камандам будзе прапанавана распрацаваць свой уласны касмічны апарат вагой да 1 кг для запуску ракетай-носьбітам на вышыню ўжо 6 кіламетраў. У найбліжэйшай будучыні не выключаецца і варыянт запуску арыгінальнага спадарожніка з Міжнароднай касмічнай станцыі.
Падкрэслім, па ўмовах праекта 2012 г. каманды дэманстравалі сканструяваныя макеты сапраўднага спадарожніка і станцыю прыёму. Пры гэтым спадарожнік абавязаны мець такія тэхнічныя характарыстыкі, якія забяспечылі б яму паспяховыя запуск, вымярэнне, перадачу інфармацыі і прызямленне на парашуце. Акрамя таго, асноўныя кампаненты касмічнага апарата – сістэма электрасілкавання і перадачы тэлеметрычнай інфармацыі, разнастайныя датчыкі – павінны змяшчацца ў бляшанцы з-пад колы. У прыватнасці, у экспертную камісію конкурсу хлопцы павінны былі прадставіць тлумачальную запіску праекта, віртуальную прэзентацыю і сканструяваны імі навучальны спадарожнік. Назва конкурсу невыпадкова складаецца з англійскіх слоў «сan» – бляшаны слоік і «sat» – скарачэнні ад слова «satellite», што азначае спадарожнік.
Даведка
Першы конкурс «CanSat» адбыўся ў 1999 г. у ЗША і накіраваны на развіццё цікавасці школьнікаў і студэнтаў да касмічных даследаванняў. У Расіі конкурс стартаваў у 2012 г., кіраўніком праекта стаў касманаўт герой Расіі Аляксандр Лазуткін. У рэалізацыі праекта асноўную ролю іграюць Навукова-даследчы інстытут ядзернай фізікі імя Д. У. Скобельцына МДУ імя М. В. Ламаносава і Мемарыяльны музей касманаўтыкі. Дадзеныя спаборніцтвы вельмі папулярныя таксама ў Еўропе і Японіі.
Ірына МІРОНАВА
На фота: Ліцэісты БДУ Дзмітрый Раманавец і Іван Саечнікаў падчас абароны касмічнага праекта ў МДУ імя М. В. Ламаносава
