БДУ падпісаў чатыры буйныя кантракты з Інстытутам нафтахіміі Хэйлунцзянскай акадэміі навук (г. Харбін, Кітай).
Такі вынік паспяховых перамоў кіраўнікоў навуковых падраздзяленняў БДУ з кітайскай дэлегацыяй, якія прайшлі ў Мінску 20 сакавіка.
Да выканання гэтых дарагіх кантрактаў з нашага боку будуць прыцягнутыя навукоўцы НДІ фізіка-хімічных праблем, хімічнага факультэта і НДІ прыкладных фізічных праблем імя А. Н. Сеўчанкі.
Такое міжнароднае навукова-тэхнічнае супрацоўніцтва будзе спрыяць распрацоўцы кампазіцыйных матэрыялаў, узмоцненых вугляроднымі валокнамі, стварэнню тэрмаўстойлівага матэрыялу на аснове фасфатаў, мадыфікаванага арганічнымі смоламі, і сілікатных кампазіцый, мадыфікаваных крэмній-арганічнымі смоламі. Таксама, абапіраючыся на навуковыя распрацоўкі, атрыманыя ў лабараторыі оптыкі кандэнсаваных асяроддзяў НДІ ПФП, будзе ажыццёўлены сінтэз новых вадкакрышталічных матэрыялаў і арганічных злучэнняў.
Арганізацыйнае суправаджэнне і кантроль за выкананнем прац, прадугледжаных афіцыйнымі дакументамі, будзе здзяйсняць Беларуска-кітайскі інавацыйны цэнтр БДУ.
Падкрэслім, харбінскі Інстытут нафтахіміі з’яўляецца даўнім і асноўным дзелавым партнёрам БДУ ў Кітаі. Першая сумесная навуковая лабараторыя была створана ў 2006 г. менавіта ў Інстытуце нафтахіміі. Летась тут адбылося адкрыццё вытворчай базы высокіх тэхналогій па стварэнні хімічных матэрыялаў з выкарыстаннем распрацовак навукоўцаў БДУ.
Акрамя таго, на рахунак БДУ дадалося пагадненне аб супрацоўніцтве паміж нашым НДІ ФХП і Інстытутам нафтахіміі Хэйлунцзянскай акадэміі навук у даследаваннях у галіне каталізу, вывучэння сумяшчальнасці арганічных і неарганічных матэрыялаў з наступным падпісаннем кантракта.
Паводле інфармацыі Беларуска-кітайскага інавацыйнага цэнтра БДУ
