З 14 па 17 жніўня на вяслярным канале ў Заслаўі адбыўся VI чэмпіянат свету сярод студэнтаў па веславанні на байдарках і каноэ, арганізатарамі якога сталі Міністэрства адукацыі Рэспублікі Беларусь, Беларуская асацыяцыя студэнцкага спорту, Рэспубліканскі цэнтр фізічнага выхавання і спорту вучняў і студэнтаў,
а таксама больш за 20 міністэрстваў і ўстаноў, у тым ліку і БДУ.
У правядзенні спартыўных спаборніцтваў міжнароднага ўзроўню наша краіна зарэкамендавала сябе настолькі добра, што віцэ-прэзідэнт міжнароднай федэрацыі студэнцкага спорту (FISU) Алег Матыцын прапанаваў Беларусі змагацца за права правесці Універсіяду–2021. Аднак галоўным дасягненнем сёлетняга чэмпіянату стала тое, што беларуская зборная выйшла чэмпіёнам. Нашы спартсмены заваявалі 13 залатых медалёў з 24 магчымых. Беларускія весляры адзначалі, што ім дапамаглі родныя сцены, падтрымка заўзятараў і … валанцёраў!
Валанцёры любога мерапрыемства заўсёды застаюцца ў цені. Яны беспярэчна выконваюць даручэнні арганізатараў і працуюць «на падхопе» ў спартсменаў. Здаецца, занятак бескарысны, аднак тое нябачнае, што атрымліваюць валанцёры, – неацэнна. Вопыт у прафесіі, знаёмства з кіраўнікамі спартыўных арганізацый і чыноўнікамі, а таксама новыя сябры і ўражанні на ўсё жыццё. Дзеля гэтага варта не спаць начамі і аддаваць сябе цалкам чэмпіянату.
На VI чэмпіянаце свету працавалі 300 валанцёраў. 80 з іх – студэнты БДУ. Кіравала ўсімі валанцёрамі Надзея Ельсукова – старшы выкладчык кафедры тэорыі і практыкі перакладу гуманітарнага факультэта БДУ. Кожны валанцёр атрымліваў заданні па профілі ВНУ і спецыяльнасці. Студэнты займаліся сустрэчай спартсменаў у аэрапорце, засяленнем у 11 інтэрнат БДУ, дзе жылі спартсмены з 22 краін, а таксама рыхтавалі творчыя нумары на адкрыцці і закрыцці чэмпіянату, працавалі ахоўнікамі, ратавальнікамі, лекарамі, журналістамі, перакладчыкамі і праграмістамі.
Сваімі ўражаннямі падзяліліся студэнты БДУ, валанцёры студэнцкага прэс-цэнтра чэмпіянату:
Стэфанія Мамайка, гуманітарны факультэт (перакладчык):
«Я вельмі рада, што стала часткай гэтага чэмпіянату! У нас быў згуртаваны калектыў, выдатны кіраўнік і проста шыкоўная атмасфера! Спадзяюся, што гэта студэнцкая ўніверсіяда стане пачаткам шматлікіх спаборніцтваў міжнароднага ўзроўню, якія будуць праводзіцца ў Беларусі!»
Юлія Ішмуратава, Інстытут журналістыкі БДУ (фатограф, журналіст):
«Студэнцкі чэмпіянат па веславанні стаў самай яркай падзеяй гэтага лета для мяне. Падчас спаборніцтваў я працавала фатографам. Здымала заезды, узнагароджанні, гледачоў і спартсменаў пасля стартаў і падчас адпачынку. Я атрымлівала неверагоднае задавальненне. І, канешне ж, досвед. Дзякуючы гэтаму чэмпіянату маё партфоліа папоўніцца яркімі і прыгожымі фотаздымкамі…»
Аліна Ганчыеўская, Інстытут журналістыкі (журналіст):
«Праца падчас чэмпіянату дала мне зразумець: я люблю Беларусь і ганаруся сваёй краінай! Мне вельмі прыемна, што мы так гасцінна сустрэлі спартсменаў з 22 краін! Усмешкі, эмоцыі, яркія ўражанні застануцца ў маёй памяці назаўсёды. Зараз сур’ёзна задумваюся, што мне не хапае цудоўнага калектыву прэс-цэнтра і прафесійных журналістаў, дзелавых стасункаў арганізатараў і валанцёраў ад самае раніцы і да позняга вечара ў Заслаўі, хуткасці і драйву, якія прысутнічалі на чэмпіянаце. Адчуваю «лёгкі голад» ад таго, што ўжо магу пісаць матэрыялы не з хуткасцю святла, а павольна, удумваючыся ў кожнае слова. Але ўсё добрае калісьці заканчваецца. І гэта значыць, што пачынаецца пара новых адкрыццяў, новай працы».
Аляксандр Шэлегаў, гуманітарны факультэт (фатограф):
«Вельмі рады таму, што мне давялося пабываць на цікавым і відовішчным мерапрыемстве такога маштабу. Асабліва хачу адзначыць працу калектыву, у якім мы працавалі. Нягледзячы на напружаную і стрэсавую атмасферу, кожны гатовы быў прыйсці на дапамогу калегам ці даць каштоўную параду. Вельмі спадзяюся, што нам у хуткім часе зноў выпадзе магчымасць папрацаваць разам на падобным мерапрыемстве і атрымаць такі каштоўны досвед».
Азіраючыся назад, можна смела сказаць, што чэмпіянат атрымаўся. Супрацоўнікі Рэспубліканскага цэнтра фізічнага выхавання і спорту навучэнцаў і студэнтаў, якія выступілі ў ролі адказных арганізатараў чэмпіянату, пільна назіралі за працай валанцёраў. Самым актыўным і старанным студэнтам прапанавалі працаваць у дзяржаўных установах, звязаць сваю будучую кар’еру з арганізацыяй спартыўных мерапрыемстваў.
Пра тое, як прайшоў чэмпіянат, можна даведацца ў сацыяльных сетках:
www.vk.com/club_canoesprint
www.twitter.com/canoesprint14
www.instagram.com/Canoe_sprint_2014
www.facebook.com/6canoesprint2014
Ксенія КАРАВАЯ
Відэасюжэт пра падрыхтоўку да студэнцкага Чэмпіянату свету па веславанні 
