Сардэчна віншую ўсіх – выкладчыкаў, супрацоўнікаў, студэнтаў і аспірантаў – з Калядамі і Новым годам!
Навагоднія святы заўсёды напоўнены самымі светлымі пачуццямі і надзеямі, аптымістычнымі памкненнямі ў будучыню. Мы ўспамінаем усё добрае, што падарыў нам год, які сыходзіць, і чакаем ажыццяўлення новых распачынанняў і планаў.
Я шчыра дзякую ўсёй універсітэцкай супольнасці за прафесійныя поспехі і вынікі, адданасць і падтрымку БДУ, актыўнасць у захаванні і прымнажэнні назапашанага інтэлектуальнага і навуковага патэнцыялу нашага ўніверсітэта!
БДУ ўпэўнена сустракае 2015 год! Пацвярджэннем таму з’яўляюцца шматлікія значныя падзеі мінулага года. На рахунку нашага ўніверсітэта рэгулярныя перамогі ліцэістаў і студэнтаў на розных міжнародных алімпіядах. Прыемна адзначыць, што навуковы патэнцыял моладзі БДУ шматгранны. Выхаванцы ВНУ скараюць пастаменты спаборніцтваў па матэматычных, фізічных, біялагічных дысцыплінах. Студэнты БДУ прызнаны наймацнейшымі на Міжнародным чэмпіянаце студэнтаў па карпаратыўных фінансах, Міжнародным студэнцкім форуме ChemCamp; яны сталі абсалютнымі пераможцамі на X Міжнароднай студэнцкай алімпіядзе па тэарэтычнай механіцы. І гэты спіс славы можна працягваць бясконца. Заваяванне гэтых вяршыняў адбылося толькі дзякуючы вашай, шаноўныя выкладчыкі, прафесійнай датычнасці, энергіі і запалу. Дасягненні нашых студэнтаў – гэта высокая ацэнка штодзённай і працаёмкай дзейнасці настаўнікаў БДУ!
Асаблівую падзяку хачу выказаць навукоўцам БДУ. Вашы адважныя амбіцыі ў мінулым годзе былі паспяхова рэалізаваны. Чарговым навуковым прызнаннем стаў запуск на Міжнароднай касмічнай станцыі відэаспектральнай сістэмы, распрацаванай у БДУ. Немагчыма не адзначыць і навуковае дасягненне нашых фізікаў, дзякуючы якому Беларусь можа быць годна прадстаўлена ў міжнародным праекце па будаўніцтве Міжнароднага лінейнага калайдара.
Несумнеўна, што росквіт БДУ з’яўляецца вынікам згуртаванай калектыўнай працы студэнтаў, выкладчыкаў, навукоўцаў і кіраўніцтва ВНУ. Дзякуючы вашай самааддачы, зацятасці і працавітасці ўніверсітэт годна прадстаўлены ў ліку сусветных ВНУ найвышэйшай лігі.
Яшчэ шмат чаго трэба зрабіць для далейшага развіцця БДУ. Я ўпэўнены, што нам падуладна рашэнне любых задач і наперадзе ў нас уражлівыя вынікі ў навукова-адукацыйнай дзейнасці!
Жадаю ўсім дужага здароўя, дабрабыту, міру, дабра, спакою вам і вашым сем’ям! Няхай новы 2015 год апраўдае нашы чаканні і спадзяванні!
З Новым годам!
З павагай, рэктар БДУ акадэмік Сяргей АБЛАМЕЙКА
