Уладзімір Красоўскі
З 1 верасня Міжнародны дзяржаўны экалагічны ўніверсітэт імя А. Д. Сахарава паўстаў перад студэнтамі ў новым абліччы. Зараз гэта інстытут у складзе БДУ ў якасці юрыдычнай асобы. Далучэнне і ўзаемадзеянне з абодвух бакоў ужо прынесла шмат цікавага. Пра сумесныя праекты мы пагутарылі з Уладзімірам КРАСОЎСКІМ, намеснікам дырэктара па вучэбна-выхаваўчай і ідэалагічнай рабоце.
Прайшло зусім мала часу, але планаў і праектаў ужо шмат. Нават першы восеньскі дзень прайшоў незвычайна. Акрамя традыцыйнай дэгустацыі цукру (даўняя звычка «сахараўцаў»), першакурснікі пабывалі на ўрачыстай лінейцы БДУ і нават у кабінеце рэктара. Наведалі яны і Палац спорту, дзе ўдзельнічалі ў праграме «Віват, студэнт!».
Цяпер моладзь будзе атрымліваць дыпломы БДУ, і не толькі тыя, хто толькі пачынае вучыцца, але і тыя, хто амаль скончыў адукацыю. Акрамя гэтага, МДЭІ атрымаў моцную матэрыяльную падтрымку.
– У нас тут заўсёды быў недахоп памяшканняў, што стрымлівала рост. Цяпер свае аўдыторыі нам прапанаваў факультэт філасофіі і сацыяльных навук, студэнты будуць займацца на Кальварыйскай два дні на тыдзень, – адзначыў Уладзімір Іванавіч. – Вельмі парадавала, што цяпер мы зможам адкрыць і новы вучэбны корпус. Памяшканне будавалася больш за 10 гадоў. Акрамя гэтага, істотна палепшыліся ўмовы пражывання іншагародніх студэнтаў. Колькасць месцаў у студгарадку павялічылася.
Вядома, кожная вышэйшая навучальная ўстанова займаецца не толькі вучэбным працэсам. Зараз студэнты факультэтаў БДУ могуць пазнаёміцца з арганізацыямі МДЭІ, а сахараўцы – ацаніць спартыўны комплекс, гурткі і секцыі.
– Мы зрабілі заяўку на басейн, пакуль яшчэ не атрымалі адказу, але думаем, што студэнты будуць ім карыстацца. І паспяваць на заняткі таксама – комплекс знаходзіцца ад нас зусім недалёка, за 2 станцыі на метро, – распавядае Уладзімір Іванавіч. – Цяпер мы будзем даследаваць магчымасці працы студэнцкага самакіравання. Увогуле, тое, што вырашаецца і даступна для ўсяго БДУ, стала магчымым і для экалагічнага інстытута.
У структуру МДЭІ БДУ ўваходзяць факультэт маніторынгу навакольнага асяроддзя і факультэт экалагічнай медыцыны, НДІ экалагічных праблем.
Мае ён і вучэбна-навуковы комплекс «Волма». Энергапарк дэманструе ўсе магчымасці альтэрнатыўнай энергетыкі: гідра-, бія-, з дапамогай цяпла зямлі і сонечнай энергіі. Акрамя даследчых работ, ВНК «Волма» выкарыстоўваюць як месца практыкі і адпачынку студэнтаў.
– Хлопцы і дзяўчаты з задавальненнем бавяць там час. А хто ўваходзіць у склад нейкай суполкі, што праводзіць там мерапрыемства, пражывае ўвогуле бясплатна, – расказвае намеснік дырэктара.
І дадае: «Калі жадаеце выехаць з начлегам, пабыць на прыродзе, можна заўсёды аплаціць пуцёўку. Ёсць адна праблема, якая таксама будзе вырашацца ў гэтым годзе, – адсутнасць пункта харчавання. Гэта значыць, гатаваць ежу трэба самому, на плітках. Тым не менш у парку ідуць навучальныя заняткі і праводзяцца студэнцкія канферэнцыі».
Дарэчы, традыцыйна ў канцы кастрычніка – пачатку лістапада МДЭІ праводзіць канферэнцыю на англійскай мове, што яшчэ раз пацвярджае міжнародны статус. Сёлета яна будзе сумеснай з БДУ.
– Канферэнцыя ахоплівае вялікую колькасць спецыяльнасцяў. Планы пачалі складаць яшчэ ўвесну. Запрашаем усіх да нас!
Усяго ў Міжнародным дзяржаўным экалагічным інстытуце навучаюцца 1861 студэнт і 33 магістранты.
У Міжнародным дзяржаўным экалагічным інстытуце навучаюцца 1861 студэнт і 33 магістранты.
МДЭІ імя А. Д. Сахарава зараз насычаны новымі падзеямі. Але разам з тым ён захаваў сваю ўнікальнасць і традыцыі. Мы вылучылі 5 самых значных асаблівасцяў установы.
1. Міжнароднасць
Такі статус інстытут атрымаў не выпадкова. Ён мае добрыя сувязі і праекты з рознымі краінамі, арганізацыямі і ўніверсітэтамі. Моладзь МДЭІ паглыблена вывучае некалькі замежных моў, удзельнічае ў міжнародных канферэнцыях.
2. Установа СНД
Міжнародны дзяржаўны экалагічны інстытут з’яўляецца базавай арганізацыяй у галіне экалагічнай адукацыі дзяржаў-удзельніц СНД. 25 лістапада 2005 года ён атрымаў гэты статус.
3. Набор спецыяльнасцяў
Сахараўскі інстытут ганарыцца сваімі факультэтамі. Вядзецца падрыхтоўка спецыялістаў у галіне ядзернай бяспекі, а гэта значыць, выконваецца дзяржаўная ўрадавая праграма падрыхтоўкі спецыялістаў беларускай атамнай станцыі. Тут хочацца адзначыць і групу спецыяльнасцяў, якіх, мабыць, няма ў іншых ВНУ: медыцынская экалогія, энергаэфектыўныя тэхналогіі і энергетычны менеджмент, медыцынская фізіка. Апошняя спецыяльнасць, дарэчы, сёння новая і запатрабаваная.
4. «Гільдыя студэнтаў»
Нешта накшталт БРСМ, але ўтварылася раней, у 90-я. Гільдыя аб’ядноўвае абсалютна ўсіх асоб экалагічнага інстытута. Гільдыйцамі лічацца нават тыя, хто ўжо даўно скончыў вучыцца. Гэты саюз дапамагае кожнаму сахараўцу знайсці сабе сябра, удзельнічаць у самых цікавых мерапрыемствах.
5. Роля ў грамадстве
Не трэба забываць, што сахараўскі інстытут займаецца экалагічнай праблематыкай. Кожны разумее, што яна адна з самых актуальных для нашага грамадства. Кожны спецыяліст імкнецца як мага лепш раскрыць яе і зрабіць так, каб наша развіццё было ўстойлівым, а нашчадкам засталася здаровая планета.
Гутарыла
Таццяна МОРАВА
Відэа:
