Адкрытыя ўсяму свету

Ва ўніверсітэце вызначаны найлепшыя вэб-рэсурсы факультэтаў (інстытутаў) і іншых падраздзяленняў 2015 г.

Праводзіўся конкурс па трох намінацыях. У наміна­цыі «Адкрытыя адукацыйныя і навуковыя рэсурсы факультэтаў (інстытутаў)» першае месца падзя­лілі фізічны факультэт і ФПМІ. На другім месцы хімічны і біялагічны факультэты. На трэцім месцы – гістарычны  і юрыдычны факультэты.
У намінацыі «Адкрытыя адукацыйныя і навуковыя рэсурсы іншых падраздзяленняў» на першым месцы размясцілася Фундаментальная бібліятэка. На другім месцы – Галоўнае ўпраўленне навукі.
У адпаведнай намінацыі сярод навукова-даследчых устаноў першае месца дасталася НДІ фізіка-хімічных праблем.
Да кожнага пункта былі свае па­трабаванні і ўмовы.
«У першай намінацыі конкурс пра­водзіўся па трох групах пара­метраў: вэбаметрычных (займае палову вагавога каэфіцыенту), навукаметрычных і статыстычных да­дзеных (па студэнтах і выкладчыках). А для астатніх дзвюх намiна­цыях – толькі па вэбаметрычных», – тлумачыць Уладзімір ГАЛЫНСКІ, намеснiк начальніка ГУВНМР.
Группа вэбаметрычных пара­метраў самая важная. Па-першае, з дапамогай тэматычнага індэкса цытавання – тэхналогіі пошукавай сістэмы «Яндэкс» – вызначаецца аўтарытэтнасць інтэрнэт-рэ­сурсу праз колькасць спасылак з іншых сайтаў. Па-другое, у вэбаметрычны параметр уваходзiць колькасць праіндэксаваных старонак інтэр­нэт-рэсурсу ў пошукавых сіс­тэмах Google і «Яндэкс». Па-трэ­цяе, улiчваецца колькасць даку­ментаў, размешчаных у электроннай біб­ліятэцы БДУ, паколькі 90% даку­ментаў з ЭБ БДУ трапляе ў Google Scholar і тым самым па­дымае рэйтынг БДУ. Такім чынам, можна прааналізаваць уклад фа­куль­тэтаў у рэйтынг БДУ.
«Першае месца падзялілі паміж сабой фізічны факультэт і ФПМІ. Але гэта не значыць, што па ўсіх па­раметрах яны былі найлепшымі. Так, самы вялікі індэкс тэматыч­нага цытавання мае юрфак, а гіс­т­фак можа ганарыцца самай вялі­кай колькасцю пра­індэксава­ных старонак. Аднак толькі пры сумяш­чэнні ўсіх склад­нікаў вызначаецца самы лепшы факультэт», – расказвае Уладзі­мір Галынскі.
Група навукаметрычных пара­метраў галоўным чынам дапама­гае сачыць за колькасцю навуковых артыкулаў у Scopus, якія апу­б­лікавалі супрацоўнiкi факуль­тэтаў, а таксама за колькасцю штатных работнікаў з высокім h-­індэксам у розных рэфератыўных базах да­дзеных. H-індэкс (iндэкс Хiрша) з’яўляецца адным з паказ­чыкаў навуковай працы вучонага.

З дапамогай статыстычных да­дзеных вылічваецца працэнт вы­клад­чыкаў з вучонай ступенню, працэнт замежных студэнтаў і коль­касць выкладчыкаў, запрошаных у БДУ з іншых краін. «Большасць міжнародных рэй­тынгаў улічваюць гэты параметр. Чым больш замежных студэн­таў вучыцца ва ўніверсітэце, тым больш папулярным лічыцца сама ВНУ, тым больш высокія ступені ў рэйтынгах яна можа займаць», – сцвярджае Уладзімір Галынскі.

У дзвюх іншых намінацых улiч­валi толькі групу вэбаметрычных параметраў. Між іншым, каб удзельнічаць у конкурсе, не трэба было падаваць аніякіх заяў. Усе інтэрнэт-рэсурсы аўтаматычна пры­­­­малі ўдзел у спаборніцтве.

«Для таго, каб падняцца ў рэйтынгах, патрэбна мець як мага больш спасылак i на свой сайт, i на апублікаваныя навуковыя працы. Рабіць новы карыстальны кантэнт, цiкавыя матэрыялы, размяшчаць іх на сваiм рэсурсе; праводзiць мерапрыемствы, пра якiя будуць гаварыць у сецiве. Чым больш будзе ўнiкальнай інфармацыі, тым лепей», – раіць Уладзімір Міхай­лавіч.
Наогул, гэты конкурс праходзіць з 2012 года. Але ў такім шырокім фармаце першы раз. Раней яго праводзілі выключна па вэбаметрычных параметрах у адпавед­насцi з алгарытмам Webometrics.
Для таго, каб пашырыць прад­стаў­ле­насць БДУ ў міжнародных рэй­тынгах, вядзецца супрацоў­ніц­тва з Расійскім індэксам навуко­вага цытавання. Апошні будзе аналізаваць не толькі патэнцыял БДУ як цэлага комплексу, але і асобных яго падраздзяленняў. Ак­рамя таго, абмяркоўваецца магчымасць разгорнутай падпіскі на рэфера­тыўныя базы Scopus i Web of Science для навукоўцаў БДУ.
Таццяна МОРАВА

З падрабязнымі вынікамі конкурса можна пазнаёміцца тут:
Презентация