У 2017 годзе даследчыкі БДУ адзначыліся істотнымі дасягненнямі і навукаёмістымі распрацоўкамі, якія дэманстраваліся на шматлікіх выставах.
Распрацоўка – НДЛ інфармацыйна-вымяральных сістэм кафедры інфарматыкі і камп’ютарных сістэм ФРКТ.
Навуковы кіраўнік – С. М. Семяновіч, вядучы навуковы супрацоўнік, кандыдат тэхнічных навук.
Суаўтар – Рэспубліканскі навукова-практычны цэнтр анкалогіі і медыцынскай радыялогіі імя М. М. Аляксандрава.
Пра праект
Камп’ютарызаваная медыцынская ўстаноўка агульнай гіпертэрміі «Пціч-М» прызначана для шматкампанентнага лячэння распаўсюджаных і генералізаваных формаў злаякасных пухлін шляхам правядзення сеансаў агульнай гіпертэрміі пацыента.
Сутнасць лячэбнай методыкі: правядзенне пад агульным наркозам сеанса (працягласцю 2–3 гадзіны) плаўнага нагрэву цела пацыента да крытычных (40–42°С) тэмператур пры адначасовым уздзеянні на яго пэўным комплексам хіміятэрапіі. Магчымасць правядзення хіміятэрапіі ва ўмовах агульнай гіпертэрміі мае шэраг пераваг у параўнанні са звычайнай хіміятэрапіяй, у тым ліку: прамая гібель пухлінных клетак пры награванні ў паказаных тэмпературных інтэрвалах; магчымасць памяншэння дозы цытастатыкаў; узмацненне супрацьпухліннага эфекту і зніжэнне нефратаксічнага, кардыятаксічнага, гепататаксічнага дзеяння хіміяпрэпаратаў; пры мясцовараспаўсюджаных пухлінах правядзенне 1–2 сеансаў агульнай гіпертэрміі дазваляе паменшыць іх памеры і ажыццявіць аператыўнае лячэнне.
Працэдурны модуль устаноўкі выкананы ў выглядзе спецыяльнага стала, абсталяванага сістэмамі падтрымкі тэмпературы ў зададзеных экспазіцыйных рэжымах (ад +20°С да +42°С з дакладнасцю не менш за 0,2°С) з дапамогай камп’ютарызаваных вымяральна– рэгуляцыйных сродкаў і прымусовага тэрмагідраўлічнага астуджэння самых крытычных участкаў цела пацыента (галава, спінны мозг). Нагрэў цела пацыента забяспечваецца за кошт уздзеяння высокачастотнай (13,56 МГц) электрамагнітнай энергіі.
Спецыялізаванае праграмна-матэматычнае забеспячэнне ажыццяўляе агульнае кіраванне працай медыцынскай устаноўкі ў ручным ці аўтаматычным рэжымах; надзейны двухступеньчаты кантроль усіх рэжымаў працы; разнастайнае інфарматыўнае адлюстраванне ў графічнай і тэкставай форме ўсіх параметраў працэдуры і іх рэгістрацыю ў памяці камп’ютара.
Вытворца ўстаноўкі «Пціч-М» – Беларускі дзяржаўны ўніверсітэт.
Уведзена ў эксплуатацыю ў РНПЦ анкалогіі і медыцынскай радыялогіі імя М. М. Аляксандрава. У наш час на ёй праведзена больш за 200 лячэбных сеансаў. Зацікаўленасць у набыцці ўстаноўкі выявілі медыцынскія ўстановы Рэспублікі Казахстан.
Паводле інфармацыі
Галоўнага ўпраўлення навукі
