“Будзе шоу, мы абяцаем.” У студэнцкім гарадку БДУ абралі зорную пару (+слайды)

23 Apr, 2018.

5 красавіка ў Ліцэі БДУ абралі найлепшую пару студэнцкага гарадка. Пра тое, як рыхтаваліся ўдзельнікі, і як былі прыдуманы самыя вар’яцкія строі, распавядзе вам газета "Універсітэт".

Конкурс "Зорная пара" не праводзіўся ўжо два гады, таму ўсім не цярпелася абраць найлепшую пару студэнцкага гарадка. Маладыя людзі пачалі рыхтавацца да шоу ўжо ў лютым. Канкурсанты праходзілі анкетаванне, пабывалі на трэнінгу ад Псіхалагічнай службы БДУ, вучыліся дэфіляваць і рыхтавалі творчыя нумары. Амаль 2 месяцы пары разам з куратарамі і групамі падтрымкі днямі і начамі прадумвалі вобразы для фотасесій і дэфіле, шукалі ў суседзяў рэквізіт, сшывалі і склейвалі мноства дэталяў для вобразаў.

Удзельнікі прынялі ўдзел у фотасесіі, тэмай якой стаў кінематограф. Кожнай з пар трэба было стварыць вобраз герояў аднаго з жанраў кіно. Канкурсанты пераўвасабляліся ў акцёраў Балівуда, у герояў фільма "Гарачыя танцы", у небяспечных разбойнікаў з вестэрна, у чароўных Артура Мілера і Мэрылін Манро, у жудасных персанажаў з фільма "ЯНО", у забаўных Сямёна Гарбункова і яго жонку Надзю з камедыі "Брыльянтавая рука", высакародных Канстанцыю і д'Артаньяна, у мілых герояў м’юзікла. Больш за ўсіх здзівіла пара з інтэрната № 11, якія пераўвасобіліся ў Джэйка і Нэйціры з фільма "Аватар", для гэтага ім прыйшлося некалькі гадзін наносіць на сябе сінюю фарбу.

Грамадская інфармацыйная служба знаёміла студэнтаў з удзельнікамі на старонцы конкурсу "Укантакце" і вяла відэадзённік мерапрыемства. Усе ахвотнікі маглі даведацца, як рыхтуюцца студэнты. Кожная пара дала інтэрв'ю карэспандэнтам ГІС і распавяла, што яны даведаліся адзін пра аднаго і пра сябе падчас падрыхтоўкі да конкурсу. Таксама ўсе інтэрнаты запусцілі флэшмоб у падтрымку сваіх пар. Студэнты знялі і змантавалі відэа. Ва ўсіх яны атрымаліся розныя: вясёлыя і смешныя, лірычныя і рамантычныя. На старонцы мерапрыемства "Укантакце" было запушчана анлайн-галасаванне. Больш за 10 тысяч чалавек аддалі свой голас за ўпадабаную імі пару. Пераможцаў намінацыі абвясцілі на конкурсе.

Нарэшце, надышоў дзень шоу, якога так баяліся і чакалі ўдзельнікі і іх сябры. У Ліцэі БДУ ўжо за некалькі гадзін да пачатку конкурсу было шумна і шматлюдна. Пары прыхарошваліся, пераапраналіся і спрабавалі хоць бы ўяўна паўтарыць творчы нумар. Раз-пораз былі чутныя ўказанні, куды пераставіць святло і дзе павінен быць рэквізіт. Вакол дзяўчат заўсёды былі сяброўкі, гатовыя ў любы момант у чатыры рукі перарабіць прычоску, расправіць сукенку, дапамагчы візажыстам і, калі спатрэбіцца, дастаць з неба зорку. Хлопцы, як правіла, перажывалі сваё хваляванне ў адзіноце. Падтрымаць многіх удзельнікаў з розных гарадоў з'ехаліся бацькі.

Конкурс пачаўся з відэадзённіка, дзе можна было ўбачыць, як праходзіла падрыхтоўка пар. Вядучым шоу выступіў тэле- і радыёвядучы Дзмітрый Новік. У склад журы ўвайшлі: “Суперфотамадэль–2006” у рамках фэсту "Млын моды", “Супермадэль Беларусі–2007”, фіналістка конкурсу “Супермадэль свету–2012”, дырэктар мадэльнага агенцтва сучаснай моды і прыгажосці "Бі Джу" Юлія Багук, найлепшы клубны вядучы краіны па версіі Vklybe.TV Awards, акцёр і шоумен Дзмітрый Нікалайзен, “Супермадэль Беларусі–2007”, тэле- і радыёвядучы, шоумен Дзмітрый Губіч, выканаўца абавязкаў старшыні каардынацыйнага савета органаў студэнцкага самакіравання Студэнцкага гарадка БДУ Алеся Фаміна і намеснік дырэктара радыёстанцыі "Мінская хваля", вядучы тэлеканала “Беларусь 5” Дзмітрый Анісавец.

Гледачы пазнаёміліся з парамі падчас дэфіле ў вячэрніх сукенках. Дзяўчаты прадэманстравалі сваю прыгажосць і элегантнасць, а хлопцы выявілі сябе галантнымі джэнтльменамі.

Пакуль пары рыхтаваліся да самага хвалюючага – творчага конкурсу, гледачам не даў засумаваць беларускі спявак Alen Hit. У гэты дзень ён святкаваў свой дзень нараджэння, студэнты "шасцёркі" і ўся глядзельная зала павіншавалі яго са святам.

Творчы конкурс адкрыла пара з інтэрната № 6 Дзмітрый Лабачэўскі і Анастасія Селіванава. Яны пагрузілі гледачоў у атмасферу халоднай дажджлівай вуліцы, на якой развівалася прыгожая гісторыя кахання. Сцэны для выканання танца пары здалося мала, і яны выйшлі ў глядзельную залу. Дзмітрыя і Анастасію актыўна падтрымлівалі іх сябры з інтэрната, танцуючы з парасонамі. Зона заўзятараў "шасцёркі" ў зале стала адзінай, у якой раптам пайшоў дождж, пажартаваў вядучы.

Пары з інтэрната № 11 Дзмітрый Каліта і Ангеліна Куневіч перанеслі гледачоў у лета і лагер “Артэк”. Пад песню "Шлепки" яны зладзілі запальнае шоу з красунямі ў какошніках і… канямі.

Самая незвычайная пара конкурсу жыве ў інтэрнаце № 2. Цімафей Роўда і Цзо Лулу вельмі розныя і нават размаўляюць на розных мовах, але гэта не перашкодзіла ім падрыхтаваць прыгожы творчы нумар. Яны станцавалі пачуццёвы танец у вобразах рускага волата і кітайскай прынцэсы.

Ілья Пратасевіч і Юлія Рагойша з інтэрната № 5 распавялі гарачую гісторыю кахання паміж двума шпіёнамі. Яны станцавалі яркі танец з трагічным фіналам.

"Вось гэта нечаканы паварот", – ахарактарызавала нумар дзяўчына ў зале. Здзівіла гледачоў пара з інтэрната № 10 Аляксей Цярэшчанка і Дар'я Лобач. Аляксей граў на гітары, а Дар'я спявала, але раптам на сцэне з'явілася… яшчэ адна Дар'я. Гледачы, відавочна, не чакалі такога, бо нямногія ведалі, што ў Дар'і ёсць сястра-блізня Маша, якая праспявала з канкурсанткай дуэтам. А вы пазнаеце, хто ёсць хто? (фота)

Наступныя ўдзельнікі з інтэрната № 4 Павел Руцкі і Анастасія Рудзкая зладзілі на сцэне гарачыя танцы. Хутка змянялася музыка, танга змянялася сальсай, а танцоры як быццам не заўважалі і проста атрымлівалі асалоду ад танцаў і адзін ад аднаго.

Пары з інтэрната № 1 Аляксей Дзіковіч і Дар'я Свірская пацешылі гледачоў жывой музыкай. Яны разам са сваімі сябрамі выканалі песню Show must go on групы Queen. Аляксей сыграў на гітары, Дар'я на раялі, а таксама ім дапамаглі сябры з барабанамі і скрыпкай.

Мікіта Бобрык і Аляксандра Трыпуценка з інтэрната № 3 выканалі прыгожы нумар. Яны паказалі сябе як выдатных вакалістаў і танцораў.

Новым чытаннем творчасці Высоцкага стаў нумар Ягора Багдашова і Анастасіі Ярмак, якія пражываюць у інтэрнаце № 7. Яны выканалі танга з элементамі румбы пад легендарныя песні Высоцкага. На працягу ўсяго нумара пары не толькі танцавала, але і малявала рукамі на вялікіх лістах паперы. Да канца нумара незразумелыя мазкі склаліся ў партрэт вялікага паэта і акцёра.

Наступным у конкурсе ішло дэфіле ў парных вобразах. Пары пад № 1 інтэрнат № 6 Дзмітрый Лабачэўскі і Анастасія Селіванава выйшлі ў вобразе чароўнай Алісы і вар'яцкага Капялюшніка з кнігі "Аліса ў краіне цудаў".

У Меліфісенту і яе адданага спадарожніка Крумкача пераўвасобілася пара з  інтэрната №11 Дзмітрый Каліта і Ангеліна Куневіч.

Вобраз Джона Ленана і Ёка Она прымерыла на сябе пара з інтэрната № 2 Цімафей Роўда і Цзо Лулу.

Пара з інтэрната № 5 Ілья Пратасевіч і Юлія Рагойша паўсталі перад гледачамі ў ролі ваяўнічых эльфаў.

Вобраз Маленькага прынца і выдатнай Ружы абрала пара з  інтэрната № 10 Аляксей Цярэшчанка і Дар'я Лобач.

Пары з інтэрната № 4 Павел Руцкі і Анастасія Рудзкая прадэфілявалі ў дзёрзкіх вобразах Бэтмена і Жанчыны-коткі.

У вобразе герояў м’юзікла "Здань оперы" выйшлі пара інтэрната № 1 Аляксей Дзіковіч і Дар'я Свірская.

У герояў любімага ўсімі мультыка "Брэменскія музыкі" выдатную Прынцэсу і Трубадура пераўвасобілася пара інтэрната № 3 Мікіта Бобрык і Аляксандра Трыпуценка.

Вобразы старажытнарымскіх скульптур прымерылі на сябе студэнты інтэрната № 7 Ягор Багдашоў і Анастасія Ярмак.

Наступнае дэфіле запатрабавала ад удзельнікаў вельмі шмат старанняў і фантазіі. Гэтым разам пары выходзілі ў строях, якія стваралі сваімі рукамі з падручных матэрыялаў. А каб гледачы маглі лепей разгледзець касцюмы, дэфіле пачыналася прама ў глядзельнай зале.

Першымі выйшлі адважны Пітэр Пэн і чароўная фея Дзінь-дзінь. У іх пераўвасобіліся Дзмітрый Лабачэўскі і Анастасія Селіванава з "шасцёркі".

У інтэрнаце № 11, як высветлілася, жывуць мушкецёры, вядомыя таксама пад імёнамі Дзмітрый Каліта і Ангеліна Куневіч.

Па зале пракралася Ліска (Цзо Лулу) і праляцеў Крумкач (Цімафей Роўда) з інтэрната № 2 – героі байкі Крылова.

Выдатнае квітнеючае дрэва ў выкананні пары з інтэрната № 5 Ільі Пратасевіча і Юліі Рагойшы.

Дзве паловы аднаго цэлага. У вобразе сэрца выйшлі Аляксей Цярэшчанка і Дар'я Лобач з інтэрната № 10.

Удзельнікі з інтэрната № 4 Павел Руцкі і Анастасія Рудзкая прайшліся ў ролі Майка Вазоўскі і Селія – вясёлых персанажаў з мультфільма “Карпарацыя монстраў” –  прайшліся па зале пад бурныя апладысменты.

Пары з "капейкі" Аляксей Дзіковіч і Дар'я Свірская сваім строем вырашылі нагадаць гледачам пра бестурботнае дзяцінства і вясёлыя гульні з шарыкамі.

А ў інтэрнаце № 3 нават стварылі чароўную вясельную сукенку. У вобразах нявесты і хулігана выйшлі  Аляксандра Трыпуценка і Мікіта Бобрык.

Пары з інтэрната № 7 Ягор Багдашоў і Анастасія Ярмак паабяцала "выбух", і яны выканалі сваё абяцанне. Пад нарастанне апладысментаў у залу выйшлі велізарны заварнік і багата прыбраны стол. Цікава, ці можна з такога заварніка напаіць чаем усю глядзельную залу?

На гэтай пазітыўнай ноце дэфіле было скончана, і ўдзельнікі журы сышлі на нараду. А гледачы ўбачылі модны паказ і паслухалі песні ў выкананні Яўгеніі Кетко, Аляксандры Шаюк і Дар'і Квірэль.

Нарэшце, надышоў час абвясціць вынікі. Пары і іх групы падтрымкі стаіліся ў чаканні.

Першымі абвясцілі вынікі анлайн-галасавання. Больш за ўсё галасоў атрымалі студэнты інтэрната № 4 Павел і Анастасія.

Таксама арганізатары ўзнагародзілі самую актыўную групу падтрымкі. Прыз атрымалі студэнты з пятага інтэрната. Дарэчы, гэты самы маленькі інтэрнат студэнцкага гарадка і ў ім нават няма студэнцкага савета. Аднак дзеці змаглі самаарганізавацца і годна падтрымаць сваю пару – Юлію Рагойшу і Ілью Пратасевіча.

У намінацыі "Музыка" перамаглі Цімафей Роўда і Цзо Лулу, ім уручылі спецыяльны прыз ад спонсараў – сертыфікат на навучанне ў студыі Microfon.

У намінацыі "Тэатр" перамаглі Юлія Рагойша і Ілья Пратасевіч. Яны атрымалі падарунак ад спонсараў – школы мастацтваў "Пуанты".

Дыпломы ўдзельнікаў і падарункі ад студэнцкага гарадка атрымалі ўсе пары.

Трэцяе месца занялі ўлюбёнцы гледачоў Анастасія Рудзкая і Павел Руцкі.

Другога месца была ганаравана яркая пара, якая здзіўляла сваімі пераўвасабленнямі на працягу ўсяго конкурсу Дзмітрый Каліта і Ангеліна Куневіч.

Першае месца занялі Анастасія Ярмак і Ягор Багдашоў. Яны атрымалі ў падарунак сертыфікат на спатканне і фотасесію ў канцэптуальным бары "На дне".

Мы пагаварылі з пераможцамі пасля конкурсу:

"Адчуванне перамогі было неверагоднае, мы разумелі, што ўся наша працы прароблена нездарма. "Нам з Ягорам было лёгка знайсці агульную мову, бо мы абодва пазітыўныя і крэатыўныя", – распавядае Анастасія. Нам вельмі дапамагала наша каманда: студэнцкі савет і, вядома ж, педагог-арганізатар нашага інтэрната Наталля Іванаўна Шчарбакова! Дзякуй ім за гэта", – дадае Ягор.

Фота і відэасправаздачу можна паглядзець у групе мерапрыемства "Укантакце"

Дар'я КОЎЗА

print

Вам таксама можа спадабацца: