Музычны драйв і прызнанне ў каханні: у БДУ адгрымеў “Віват, студэнт!” [+cлайды і відэа]

5 Sep, 2018.

У Палацы спорту 1 верасня было сапраўды горача, і не толькі таму, што першы дзень восені пацешыў надвор'ем – першакурснікі БДУ ярка адзначылі пачатак свайго студэнцкага жыцця. Традыцыйнае свята "Віват, студэнт!" наведала больш за 5000 чалавек. Як гэта было, глядзіце ў нашым фотарэпартажы.

Лекцыі, семінары і першая сесія – усё гэта будзе потым, а цяпер весялосць, фота на памяць пра першы дзень ва ўніверсітэце і шмат новых знаёмстваў: з аднагрупнікамі, студэнтамі з іншых факультэтаў і, вядома, студэнцкімі арганізацыямі, якія размясціліся ў холе Палаца спорту са сваімі стэндамі і фотазонамі.

Савет старастаў БДУ прапанаваў першакурснікам на вечар стаць піратамі Карыбскага мора. На стэндзе арганізацыі можна было паспаборнічаць у трапнасці: патрапіць у свой факультэт на карце.

Выявіць свае таленты ў першы дзень студэнцкага жыцця можна было ў зоне Творчага саюза БДУ. Тут актыўна спявалі караоке і імкнуліся паўтарыць танцавальныя рухі сімулятара JustDance.

Забаўляў і частаваў прысутных з навуковым падыходам студэнцкі савет па якасці адукацыі. На вачах першакурснікаў гатавалі марожанае з дапамогай вадкага азоту. А яшчэ кожны ахвотнік мог выцягнуць таемнае пасланне і "праявіць" яго з дапамогай хімічных рэчываў.

"Хочаш даведацца, што цябе чакае ў прафкаме? Даведайся ўжо зараз". Новаспечаным студэнтам прапанавалі надзець акуляры віртуальнай рэальнасці і перанесціся ў прафкам прама з хола Палаца спорту.

Тэатралізаваны гала-канцэрт пачаўся з захапляльнага лазернага шоу.

Студэнты бурна віталі дэканаў, у сакрэтным спаборніцтве, хто гучнейшы і лепшы, скандуючы назвы сваіх факультэтаў. Ужо праз некалькі хвілін яны дружна ўсталі і ва ўнісон прамовілі клятву студэнта БДУ. Кожны з іх – найлепшы, кожны з іх зараз – удзельнік вялікай сям'і БДУ.

З Днём ведаў першакурснікаў павіншаваў рэктар БДУ Андрэй Кароль, які пажадаў ім за час студэнцтва навучыцца бачыць навакольны свет сваімі, а не чужымі вачыма, глядзець на рэчы з розных бакоў і быць здольнымі да самазмяненняў.

Найлепшаму абітурыенту ўручылі сімвалічны студэнцкі квіток. Дарэчы, усе першакурснікі сёлета атрымаюць абноўленыя студэнцкія квіткі – інавацыйную распрацоўку БДУ, у якой сумясцілі функцыянал універсітэцкіх сістэм і банкаўскай аплатнай карткі.

Канцэртную праграму забаўляльнага шоу адкрылі заслужаны аматарскі калектыў Беларусі ансамбль танца "Крыжачок" і фальклорна-этнаграфічны ансамбль "Неруш". Студэнты падхапілі народныя матывы і, прытанцоўваючы, "папаўзлі" змейкай па танцпляцоўцы.

Павіншаваць першакурснікаў прыйшлі і выпускнікі, хто даказаў на сваім прыкладзе, што БДУ – гэта больш, чым універсітэт, бо тут сустракаюць сяброў і нават ствараюць сем'і. Пасля сумеснага выступлення прама са сцэны магістрант і выкладчык эканамфака Улад Макарэвіч зрабіў прапанову магістрантцы журфака Валерыі Казловай.

Ужо традыцыйнае для "Віват, студэнт!" сэлфі вядучых з першакурснікамі.

"Если мы горим, то, значит, ничего еще не поздно…" – для студэнтаў выступіла вядомая беларуская група J:МОРС.

Гэта быў выдатны пачатак універсітэцкага жыцця. Віват, студэнты!

Валерыя БАНДАРЧЫК
Фота Васіля Кузьмічкіна
Яшчэ больш фота ў лічбавым фотаархіве БДУ
Відэа:

print

Вам таксама можа спадабацца: