Падалі і ўставалі: студэнты БДУ здалі апошні іспыт на схілах у Лагойску [+cлайды]

31 Jan, 2019.

Заканчэнне зімовай сесіі і Таццянін дзень студэнты і супрацоўнікі БДУ традыцыйна адзначылі на спартыўна-аздараўленчым мерапрыемстве "Вакацыі ў Лагойску", якое арганізуе Пярвічная прафсаюзная арганізацыя студэнтаў БДУ.

Пажадаў студэнтам актыўнага адпачынку прарэктар па выхаваўчай рабоце і сацыяльных пытаннях Іван ЯНУШЭВІЧ. Павіталі ўдзельнікаў мерапрыемства таксама першы прарэктар Інстытута тэалогіі імя святых Мяфодзія і Кірыла  протаіерэй Сергій Гордун, старшыня пярвічнай прафсаюзнай арганізацыі студэнтаў Вольга ЛОКЦЕВА.

Змянілі сцены навучальных карпусоў на зімовы пейзаж не толькі навучэнцы, але і супрацоўнікі БДУ, якія ў складзе каманд "Рэктарат", "Дэканат", "Работнікі" пазмагаліся са "Студэнтамі" ў лыжнай гонцы. У Таццянін дзень поспех быў на боку студэнцкай зборнай – яны атрымалі перамогу. Серабро ўзялі спартсмены з каманды "Работнікі", а трэцім фінішаваў "Рэктарат".

- Як спартсмена мяне вельмі радуе, што студэнтаў і супрацоўнікаў універсітэта прылучаюць да спорту, – дзеліцца эмоцыямі пяцікурснік фізічнага факультэта Яраслаў ПАДРЭЗ. – Было прыемна, што падчас эстафеты студэнты шчыра падтрымлівалі ўдзельнікаў. Пасля гонкі ў чарзе па рыштунак я пачуў, як дзве дзяўчыны абмяркоўвалі лыжную гонку, яны былі ўражаны ўзроўнем лыжнага ходу студэнтаў і захацелі таксама паспрабаваць бегавыя лыжы, гэта не можа не цешыць. Ёсць ідэя прапанаваць прафкаму ў наступным годзе зрабіць змяшаныя каманды для эстафеты, мне здаецца, тады за ходам гонкі будзе цікавей назіраць.

Падарункам для гасцей свята стала сустрэча з беларускім лыжнікам, пераможцам этапу Кубка свету, удзельнікам сямі Алімпійскіх гульняў Сяргеем ДАЛІДОВІЧАМ. Чэмпіён адказаў на пытанні студэнтаў, распавёў пра першую алімпіяду, матывацыю да перамог.

- Пачынаю кожны год, як быццам я нуль, – падзяліўся сакрэтам свайго прафесійнага поспеху спартсмен і даў параду студэнтам: – Не распыляйцеся, абярыце для сябе нейкі шлях і будзьце найлепшымі ў сваёй справе.

Падчас свята ўсе ахвотнікі правяралі сілы ў ціры, сумо, атракцыёне "вялікі футбол" у зонах актывацыі, а галоўнае – пераадольвалі схілы на горных лыжах ці сноўбордзе. Адны ўпэўнена праходзілі трасы горналыжнага комплексу, іншыя – знаёміліся з рыштункам і рабілі першыя крокі на вучэбным схіле, але станоўчыя эмоцыі, мяркуючы па водгуках, атрымалі ўсё.

Аляксандра ДРАЖДЗЯНЮК, студэнтка 4 курса хімічнага факультэта:

- Калі я вучылася ў школе, мы з сям'ёй увесь час ездзілі катацца на лыжах, але ў апошні час усё ніяк не атрымлівалася выбрацца. А тут у сацыяльных сетках убачыла запіс, што арганізуецца паездка ў Лагойск. Не кожны студэнт можа сабе дазволіць з'ездзіць пакатацца ў горналыжны цэнтр, а тут такая магчымасць: па спецыяльным кошце і рыштунак, і пад'ёмнік, яшчэ і прывезлі-адвезлі бясплатна. Усё было добра арганізавана, я выдатна правяла час! Я ездзіла з аднакурсніцай, яна да гэтага ніколі не каталася на лыжах са схілу, так што для яе гэта было сапраўднае адкрыццё.

Міхаіл ЗЯНЕВІЧ, студэнт 4 курса ФФСН:

- Для мяне "Вакацыі ў Лагойску" сталі ўжо традыцыйным мерапрыемствам: адзначаю заканчэнне сесіі катаннем на лыжах з першага курса. Дарэчы, калі я ездзіў на мерапрыемства ў першы раз, уразіўся лыжнай эстафетай паміж студэнтамі і супрацоўнікамі БДУ, падумаў: "А чаму б і мне ў ёй не паўдзельнічаць?" На наступны год я ўжо змагаўся за першае месца ў складзе студэнцкай каманды, і мы выйгралі. Штогод арганізатары запрашаюць розных гасцей: музыкаў, вядомых спартсменаў, імкнуцца ствараць пазітыўную атмасферу. Гэта сапраўды вельмі яркае, дынамічнае, вясёлае свята, на якое хочацца патрапіць ізноў.

Вераніка САКАЛОЎСКАЯ, студэнтка 3 курса ФРКТ

- Я езджу на "Вакацыі ў Лагойску" ўжо трэці год і заўсёды атрымліваю мора задавальнення ад мерапрыемства. Памятаю, як ездзіла ў першы раз: купіла флаер, прыехала да галоўнага корпуса, сустрэлася там не толькі са сваёй кампаніяй, але і са знаёмымі, якія вучацца на іншых факультэтах, гэта было прыемнай нечаканасцю. Калі ўжо даехалі на месца, нас сустракалі зараджаныя, вясёлыя актывісты прафкама. І вось мы атрымалі рыштунак, пайшлі на вучэбны схіл, усталі на лыжы... І тут я зразумела, што яны моцна адрозніваюцца ад звычайных лыжаў, на якіх я каталася даволі добра. Сяк-так я ўсё-такі забралася на пад'ёмніку на верх. Глядзела, як інструктары тлумачылі іншым, і паўтарала, хоць з'ехаць у першы раз было дужа страшна, але пасля я адчула неверагоднае захапленне, радавалася як маленькае дзіця ад таго, што ўсё ж змагла гэта зрабіць і нават не ўпала. У папярэднія паездкі я добра натрэніравалася, і ў гэты раз страху не было зусім. Я лічу, што такія мерапрыемствы проста неабходныя, таму што яны дазваляюць студэнтам спрабаваць штосьці новае.

Анастасія ДЫШЛЕВІЧ, студэнтка 2 курса філалагічнага факультэта:

- "Вакацыі ў Лагойску" – гэта для студэнта класнае завяршэнне сесіі! Мы адправіліся на мерапрыемства адразу пасля іспыту, і магу сказаць, што конкурсы, лыжная эстафета, танцы, і вядома, катанне на горных лыжах – гэта выдатны спосаб зняць напружанне пасля цэлага месяца зацятай працы. На горных лыжах я каталася ўпершыню, а ў наступным годзе планую скарыць схіл на сноўбордзе.

Валерыя БАНДАРЧЫК
Фота Васіля Кузьмічкіна
Яшчэ больш фота у лічбавым фотаархіве БДУ
print

Вам таксама можа спадабацца: