Зразумець, што такое БДУ. Першая зімовая школа па фізіцы і матэматыцы для кітайскіх студэнтаў [+cлайды і відэа]

8 Feb, 2019.

У нашу ВНУ прыязджалі 18 кітайскіх студэнтаў першага і другога курса Сумеснага інстытута Далянскага політэхнічнага ўніверсітэта і БДУ, дзе маладыя людзі навучаюцца па спецыяльнасцях «Прыкладная фізіка» і «Інжынерная механіка». З 15 да 25 студзеня на базе фізічнага і механіка-матэматычнага факультэтаў замежныя студэнты слухалі лекцыі выкладчыкаў, выконвалі заданні, пазнавалі краіну і ўніверсітэт.
Падобная школа ўжо прайшла ўлетку на базе Далянскага ўніверсітэта, тады 18 нашых студэнтаў выязджалі ў Далянь. Амаль праз паўгода – візіт у адказ. У гэтыя дні ў раскладзе гасцей БДУ былі і лекцыі, і лабараторныя працы, і міжнародны конкурс. Працоўная мова школы – англійская.
Падрабязней пра праграму школы распавяла Галіна Пусянкова, старшы выкладчык кафедры англійскай мовы прыродазнаўчых факультэтаў, каардынатар і выкладчык зімовай школы Сумеснага інстытута:
«Праграма зімовай школы распрацавана такім чынам, каб нашы кітайскія сябры наве­далі лекцыі і лабараторныя працы па англійскай мове, ядзернай фізіцы, па кіраванні ядзерным рэ­актарам, па матэматычных метадах апрацоўкі і аналізу экспе­рыментальных дадзеных, па геа­інфармацыйных сістэмах і геамеханіцы, мехатроніцы. Даведаліся пра сучасныя даследаванні па механіцы і трыбафатыцы, наведалі заняткі па адытыўнай тэхналогіі 3D-мадэлявання і друку ў меха­ніцы, а таксама па аналітычным мадэляванні ў біямеханіцы. Беларускія студэнты выступілі з прэ­зентацыямі пра нашу краіну, уні­версітэт, факультэты, такім чынам, разам са слухачамі параўналі дзве сістэмы навучання.
Для кітайскіх студэнтаў пад­рыхтавалі разнастайную экскур­сійную праграму (Мінск, Дудуткі, музеі БДУ, Парк высокіх тэхналогій, «Вялікі камень»).

Дапоўніць уражанні пра Беларусь, БДУ дапамаглі нашы студэнты, якія таксама працавалі над арганізацыяй і правядзеннем зімовай школы. Асабліва прыемна, што студэнты двух універсітэтаў пасябравалі. Паводле плана мерапрыемстваў школы, кітайскія студэнты ў супрацоўніцтве з нашымі студэнтамі падрых­тавалі і абаранілі праект, у якім падзяліліся сваімі ўражаннямі пра краіну, універсітэт, факультэты, заняткі, беларускіх сяброў.
Выніковым мерапрыемствам зімовай школы стала правядзенне міжнароднага конкурсу Internatio­nal Public Speaking Competition, у якім паўдзельнічалі найлепшыя кітайскія і беларускія студэнты. Яны расказвалі пра ўнёсак выбітных навукоўцаў сваёй краіны ў развіццё сусветнай навукі. Па выніках конкурснага мерапрыемства пераможцы ўзнагароджаны дып­ломамі 1, 2, 3 ступені».

Марыя Церахава, магіс­тран­т­ка фізфака: «Я вельмі рада пры­няць удзел у працы зімовай школы Сумеснага інсты­тута. Мы пас­прабавалі зрабіць усё так, каб нашы госці з Кітая абавязкова прыехалі да нас яшчэ. Асабіста для сябе бачу карысць удзелу ў зімовай школе ў тым, што магу наладзіць кантакты з кітайскімі сябрамі, а таксама развіць узро­вень гутарковай англійскай мовы».


Арцемій Юшкевіч, студэнт 3 курса фізфака:
«Думаю, абмен досведам – гэта важная частка навучання, таму што так з’яўляецца маг­чымасць не толькі ўбачыць сістэму адукацыі, але і ўключыцца ў яе. Гэтым летам я ўдзельнічаў у сумеснай летняй школе ў Далянскім уні­версітэце. Для мяне гэта быў зусім іншы свет: і Кітай, і летняя школа, і ў прынцыпе адукацыйная мадэль ва ўніверсітэце. Усё было настолькі дзівосна, што толькі на пяты дзень я зразумеў, што знаходжуся ўсё яшчэ ў кампусе ўніверсітэта, а не ў горадзе, таму што кампус быў вельмі вялікі».
Дзякуючы выразнай арганізацыі і суладнай працы ўсіх удзельнікаў, зімовая школа атрымала станоўчы водгук з боку кітайскіх гасцей, якія выказалі спадзяванне на далейшае правя­дзенне падобных сустрэч.


Лю Сулін, прадстаўнік групы кітайскіх студэнтаў: «На маю думку, БДУ – гэта вельмі моцны ўніверсітэт не толькі ў Беларусі, але і ў свеце. Нашы студэнты сюды прыехалі з вялікай радасцю. Тут пазнаёміліся з выдатнымі выкладчыкамі, таленавітымі студэнтамі, пагутарылі з сябрамі. У нашых студэнтаў вялікая цікавасць да Беларусі. Яны вучацца ў Сумесным інстытуце і хацелі б па-сапраўднаму зразумець, што такое БДУ: яго гісторыя, навука, перспектывы. І вось ім выпаў такі шанец атрымаць гэтыя веды і ўражанні. Хачу выказаць асаблівую падзяку за выдатную арганізацыю і займальную праграму зімовай школы».


Сінь Чжохэн, студэнт 2 курса Сумеснага інстытута:
«Я ўпершыню ў Беларусі. Зразумеў, што гэта цудоўная краіна з выдатнымі людзьмі. У зімовай школе я даведаўся шмат новага пра краіну і ўніверсітэт, а таксама пазнаёміўся з беларускімі сябрамі. Мяне асабліва ўразілі заняткі па англійскай мове. Выкладчык шмат у чым мне дапамог разабрацца. Акрамя гэ­тага мне спадабаліся заняткі па ядзернай фізіцы. Вядома, я б хацеў вярнуцца ў Беларусь ізноў».


Бі Ванью, студэнтка 2 курса Сумеснага інстытута:
«Я ўпершыню не толькі ў Беларусі, але і за мяжой. Першае, што мяне ўразіла, гэта людзі – та­кія гасцінныя і добрыя, гатовыя заўсёды прыйсці на дапамогу. Мне спадабаліся заняткі ў зімовай школе, якія я наведвала разам з беларускімі студэнтамі. Для мяне былі карысныя заняткі па фізіцы, па якой я якраз спецыялізуюся. Асабліва мне спадаба­лася тое, што выкладчыкі натхня­юць студэнтаў і заахвочваюць, каб тыя задавалі пытанні».
Сумесная адукацыйная ўста­нова функцыянуе ў кітайскім горадзе Далянь. Тут выкладанне 30 % курсаў забяспечваюць выкладчыкі фізічнага і механіка-матэматычнага факультэтаў БДУ. Навучанне ажыццяўляецца ў ДПУ на англій­скай мове.


Аляксей Толсцік, кіраўнік Сумеснага інстытута з боку БДУ: «Зімовая школа праходзіць у рам­ках нашага Сумеснага інстытута, які быў створаны ў 2017 г. Далянскім політэхнічным універсітэтам і БДУ. Цяпер у гэтым інстытуце навучаецца 80 студэнтаў на 1 курсе, 79 – на другім. Па заканчэнні Сумеснага інстытута студэнты атрымаюць два дыпломы – Далянскага полі­тэхнічнага ўніверсітэта і Беларус­кага дзяржаўнага ўніверсітэта.
Мэта зімовай школы – пашы­рэнне сферы дзейнасці Сумеснага інстытута, азнаямленне студэнтаў з сучаснымі праблемамі фізікі, матэматыкі, механікі, усталяванне кантактаў кітайскіх студэнтаў са студэнтамі і выкладчыкамі БДУ. Правядзенне зімовай школы дало магчымасць павысіць прэстыж нашага ўніверсітэта і, адпаведна, прыцягнуць студэнтаў Сумеснага інстытута для паступлення да нас у магістратуру, а далей і ў аспі­рантуру. Спадзяюся, зімовыя і летнія школы Сумеснага інстытута стануць рэгулярнымі, што будзе спрыяць цеснаму збліжэнню нашых устаноў адукацыі і наладж­ванню сяброўскіх кантактаў».

Алена ЛЯЎШЭНЯ
Фота Васіля Кузьмічкіна
Яшчэ больш фота у лічбавым фотаархіве БДУ
print

Вам таксама можа спадабацца: