Начальнік аддзела УМС Аляксандр Рытаў распавёў пра трэнды ў навучанні бізнесменаў

22 Nov, 2019.

БДУ прыняў удзел у міжнародным праекце «Інтэграцыя беларускай бізнес­адукацыі ў рэгіёне Балтыйскага мора, у межах якога даследавалі прафесійную дзейнасць выпускнікоў, а таксама выявілі, што і як неабходна палепшыць у падрыхтоўцы такіх спецыялістаў.

Мэтай міжнароднага праекта стала вывучэнне запатрабаванняў бізнес­адукацыі ў Беларусі, каб распрацаваць перадавыя мадэлі адукацыйных праграм у галіне бізнесу і прадпрымальніцтва. Кансорцыум складаўся з БДУ, UNECON, Латвійскага ўніверсітэта, Берлінскай школы эканомікі і права і Універсітэта Турку. Праект рэалізаваны сумесна з Саветам дзяржаў Балтыйскага мора (Швецыя), які спрыяе супрацоўніцтву краін у сферы адукацыі, культуры, эканамічнага развіцця, грамадзянскай бяспекі.

Аляксандр РЫТАЎ

Пра этапы рэалізацыі і галоўныя вынікі праекта распавёў начальнік аддзела міжнародных праграм і праектаў УМС Аляксандр РЫТАЎ: «На БДУ была ўскладзена даследчая місія і апрабацыя вынікаў. Мы аналізавалі стан бізнес­навучання ў Беларусі. Паводле даведніка ўстаноў вышэйшай адукацыі, у краіне гэты кірунак адукацыі адносіцца да катэгорыі Е і пералічваецца разам з камунікацыямі і дзяржкіраваннем. Дадзеная група дае амаль 40 % ад усёй колькасці навучэнцаў, каля 30 % ад агульнага ліку – будучыя эканамісты­менеджары. З іх на I ступені ў дзяржаўных ВНУ да 50 % слухачоў навучаюцца на завочнай форме, на II ступені да – 70 %. А ў прыватных ВНУ такія прапорцыі яшчэ вышэйшыя. Гэта гаворыць пра тое, што слухачы бізнес­акадэміі або перавучваюцца, або ўжо працуюць у сферы. З майго пункта гледжання, калі мы думаем пра развіццё бізнес­адукацыі, трэба разумець, што праграмы павінны быць для такой аўдыторыі кароткімі, дыстанцыйнымі і практыка­арыентаванымі».

Як паказаў аналіз, наймацнейшым у плане падрыхтоўкі стаў Інстытут бізнесу БДУ. За ім ідуць БДЭУ, БНТУ. З прыватных – Гандлёва­эканамічны ўніверсітэт спажыўкааперацыі, МІПСА. Ёсць другая катэгорыя – розныя прыватныя арганізацыі, якія займаюцца адукацыйнай дзейнасцю. Але далёка не кожная з іх мае ліцэнзію на ажыццяўленне дадатковай адукацыі. Шмат з іх з’яўляюцца проста кансультатыўнымі кампаніямі, якія пад замежнай франшызай часта прапануюць нятанныя праграмы. Таму часам выданыя дыпломы нелегітымныя, але бізнесу патрэбныя кампетэнцыі, з­за чаго такія структуры, якія больш нагадваюць фармат курсаў, карыстаюцца попытам.

«Міністэрства фінансаў, Асацыяцыя бізнес­адукацыі робіць розныя падлікі аб’ёмаў фінансаў. Экспертная ацэнка і наш уласны аналіз гавораць, што каля 30 мільёнаў руб. знаходзіцца ў асяроддзі бізнес­адукацыі. Больш за 70 % навучэнцаў у сферы плацяць за навучанне. Гэта запатрабаваны сектар, які павялічваецца з году ў год», – тлумачыць начальнік аддзела УМС і дадае, што справа не
ў колькасці, а ў якасці. Трэба выпускаць не вялікую колькасць спецыялістаў, а рыхтаваць больш дасведчаных выпускнікоў.

Другая частка справаздачы была прысвечана аналізу працоўнай і прафесійнай дзейнасці выпускнікоў беларускіх ВНУ. Аналіз грунтаваўся на даследаванні прадпрымальніцкага патэнцыялу студэнтаў у рамках рэалізацыі эксперыментальнага праекта «Універсітэт 3.0» (РІВШ), на дадзеных праекта «Эразмус+» FOSTERC (БДУ).

Наколькі навучэнцы гатовыя займацца бізнесам, якіх уменняў ім бракуе? Было праведзена параўнанне адказаў выпускнікоў групы бізнес­адукацыі і ўсіх астатніх катэгорый. Метадалогію рыхтавалі калегі з Цэнтра сацыялагічных і палітычных даследаванняў БДУ. Апыталі анлайн каля 5,5 тыс. рэспандэнтаў. Ім было прапанавана ацаніць сфарміраванасць звыш 20 кампетэнцый. Яны адказвалі, наколькі ў іх склаліся навыкі падчас навучання, ацэньвалі, наколькі яны важныя ў працоўнай дзейнасці. Розніца паміж ацэнкамі гаворыць пра ступень развіцця кампетэнцый. Адзначаецца, што 100 % сфарміраванасці навыку не сустрэлася.

«Параўнанне паказала, што ў выпускнікоў бізнес­праграм лепш развітыя арганізацыйная, інавацыйная, камунікацыйная кампетэнцыі. Таксама яны валодаюць замежнымі мовамі лепш, чым уся група рэспандэнтаў. На дзіва, у цэлым усім выпускнікам малаважныя веды замежнай мовы, таму што большасць застаецца працаваць у нацыянальных межах. Выпускнікі бізнес­праграм прызналіся, што ў іх кіраўнічая кампетэнцыя недастаткова развітая. Некаторыя разумеюць, што не могуць кіраваць, выразна даносіць заданні падначаленым. Мы ўбачылі ў гэтым задачу – развіць уменне кіраваць і працаваць у камандзе. І лепш з такім заданнем справіцца мадэль актыўнага навучання. Трэба вызначыць, якія адукацыйныя кампаненты могуць выкарыстоўвацца, каб скараціць разрыў паміж сфарміраванымі і неабходнымі кампетэнцыямі», – мяркуе Аляксандр Уладзіміравіч.

Летняя школа BEST – business education sprint

Значным мерапрыемствам праекта стала арганізацыя ў БДУ міжнароднай летняй школы BEST – business education sprint. У яе працы прынялі ўдзел 30 выкладчыкаў з 14 універсітэтаў Беларусі, Расіі, Германіі, Фінляндыі, Латвіі. Ад БДУ навучанне ў школе прайшлі 7 выкладчыкаў эканамічнага факультэта і факультэта міжнародных адносін.

Летняя школа BEST – business education sprint

Фармат навучання: design­sprint у варыянце Google Ventures (ідэі з бізнесу прасочваюцца ў навучанне). Метадалогія навучання – дызайн­мысленне, якое ўключае такія ступені: даследаванне, распрацоўка, прататыпіраванне, тэсціраванне, адаптацыя. За пяць дзён 5 груп прапрацоўвалі 5 этапаў. Кожны дзень быў падзелены на кароткія інтэрактыўныя раздзелы навучання і на рэальныя інавацыйныя дзеянні. Вынікам інтэнсіўнай калектыўнай працы сталі 5 праграм бізнес­навучання ў галіне кіравання IT­інфраструктурай, event­менеджменту і інш.

Летняя школа BEST – business education sprint

«Усе азадачаны зменай зместу навучання. Думаецца, мы па­іншаму сканструюем навучальны план, дададзім туды новыя дысцыпліны. Але мне здаецца, дысцыпліны ў нас добрыя. Варта задумацца пра змену спосабу падачы матэрыялу. Пераход да актыўных метадаў выкладання – гэта эфектыўны агульнаеўрапейскі трэнд», – лічыць Аляксандр Рытаў.

Міжнародны праект дапамог стварыць умовы для распаўсюджання перадавых падыходаў у сферы навучання прадпрымальнікаў. Таксама тут з’явіўся дадатковы эфект – сфарміравалася сетка нацыянальных экспертаў у галіне бізнес­адукацыі.

Алена ЛЯЎШЭНЯ

print

Вам таксама можа спадабацца: