Фота Андрэя Стасевіча, БелТА.
Падчас свойго візіту ў БДУ Аляксандр Лукашэнка сустрэўся са студэнтамі і выкладчыкамі. Задаць пытанне, а таксама віртуальна прысутнічаць на сустрэчы змаглі і студэнты ў рэгіёнах – была прадугледжана прамая відэатрансляцыя ў аўдыторыях універсітэтаў у абласных цэнтрах.
Кіраўніка дзяржавы праінфармавалі пра актуальную дзейнасць і перспектывы развіцця ўніверсітэта. Рэктар БДУ Андрэй Кароль распавёў аб прадстаўленасці ВНУ ў 12 глабальных і 7 прадметных сусветных рэйтынгах, уключаючы «вялікую тройку» QS (317), THE (1001+) і Шанхайскі прадметны рэйтынг па фізіцы (201–300). Таксама было адзначана, што Электронная бібліятэка БДУ мае статус першай у Еўропе і з’яўляецца трэцяй сярод электронных бібліятэк свету ў рэйтынгу ВНУ Transparent Ranking of Repositories.
Рэктар адзначыў высокі ўзровень адукацыі ва ўніверсітэце і звярнуў увагу, што ВНУ нароўні з захаваннем 100-гадовых традыцый укараняе сучасныя метады ў адукацыйны працэс. БДУ рэалізуе праграму трансфармацыі адукацыі, стварае практыка-арыентаванае адукацыйнае асяроддзе, выкарыстоўвае інавацыйныя тэхналогіі навучання. Размова ішла таксама пра выкарыстанне ў адукацыйным працэсе новых інфармацыйна-камунікацыйных сродкаў, арганізацыю дыстанцыйных заняткаў, эфектыўнасць якіх, як паказвае практыка, вельмі высокая. Добрым памочнікам для студэнтаў стаў Адукацыйны партал, дзе засяроджана каля сямі тысяч электронных пляцовак, якімі актыўна карыстаюцца студэнты, створаны асабістыя кабінеты студэнта, выкладчыка, працуе аўтаматызаваная сістэма рэйтынгу ўніверсітэта, ёсць электронныя расклад заняткаў і журналы куратараў. Дарэчы, сайт працуе ў чатырох моўных версіях – беларускай, рускай, англійскай і кітайскай.
Андрэй Кароль адзначыў, што студэнтам цяпер важна не толькі даваць веды, аксіёмы, але і навучыць іх канструктыўна думаць, самім ствараць прадукт па сваёй спецыяльнасці, параўноўваючы сваю працу з эталоннымі патрабаваннямі.
Пра папулярнасць ВНУ сведчыць і тое, што ў БДУ імкнуцца вучыцца замежнікі. У апошні час ва ўніверсітэце вучыцца шмат кітайскіх студэнтаў – каля 1800 чалавек, што паказвае на развіццё беларуска-кітайскага адукацыйнага супрацоўніцтва ў адпаведнасці з дамоўленасцямі на найвышэйшым узроўні.
БДУ таксама актыўна супрацоўнічае з замежнымі калегамі: дзейнічае 566 пагадненняў з прадстаўнікамі 59 краін. Паказальны і той факт, што ўніверсітэт уключаны ў склад 13 міжнародных асацыяцый і сетак, удзельнічае ў 37 міжнародных адукацыйных праектах.
Рэктар ВНУ паказаў прэзідэнту сучасны электронны пропуск, які выкарыстоўваецца студэнтамі для праходу ў тым ліку ў бібліятэку, сталовую.
Кіраўнік дзяржавы таксама наведаў музей землязнаўства факультэта геаграфіі і геаінфарматыкі БДУ, дзе азнаёміўся з экспазіцыямі беларускіх, а таксама прывезеных з розных куткоў свету мінералаў.
Па матэрыялах БелТА
