Пяць сумесных праектаў навукоўцаў БДУ і навуковых, адукацыйных арганізацый і прадпрыемстваў Сацыялістычнай Рэспублікі В’етнам атрымалі гранты Беларуска-в’етнамскага інавацыйна-адукацыйнага і навукова-тэхналагічнага цэнтра (БВІАНТЦ).
Фінансаванне атрымаюць:
— праект фізічнага факультэта і Інстытута фізікі і электронікі ВАНТ (г. Ханой) «Тапалогія структурных дэфектаў у графене» (навуковы кіраўнік – прафесар Мікалай Паклонскі);
— праект ФПМІ і Універсітэта Бінь Зыонг (г. Хашымін) «Распрацоўка алгарытмаў і камп’ютарных тэхналогій для рашэння задач у галіне медыцынскай інфарматыкі» (навуковы кіраўнік – прафесар Віктар Краснапрошын);
— праект факультэта даўніверсітэцкай адукацыі і Універсітэта Бінь Зыонг (г. Хашымін) «Укараненне навучальна-метадычнага комплексу па рускай мове для в’етнамскіх студэнтаў у навучальны працэс Універсітэта Бінь Зыонг» (навуковы кіраўнік – дэкан ФДА Вячаслаў Малафееў);
— праект біялагічнага факультэта і Інстытута сельскагаспадарчай генетыкі (г. Ханой) «Даследаванне заканамернасцяў фарміравання сістэмнай устойлівасці да стрэсавых фактараў асяроддзя ў раслін пад уздзеяннем элісітараў рызасферных бактэрый» (навуковы кіраўнік – кандыдат біялагічных навук Ірына Фяклістава);
— праект біялагічнага факультэта і Інстытута хіміі прыродных злучэнняў ВАНТ (г. Ханой) «Атрыманне комплексаў эфірных алеяў і іншых біялагічна актыўных злучэнняў з цыкладэкстрынам» (навуковы кіраўнік – кандыдат біялагічных навук Уладзімір Курчанка).
Нагадаем, конкурс на атрыманне грантаў быў абвешчаны ў БДУ ў пачатку кастрычніка цяперашняга года. Да разгляду прымаліся сумесныя або ўзгодненыя з в’етнамскай арганізацыяй праекты па прыярытэтных кірунках навукова-тэхнічнай дзейнасці і фундаментальных даследаванняў; а таксама працы, нацэленыя ў 2014 г. на пашырэнне і паглыбленне навуковых ведаў, якія адрозніваюцца навізной і маюць навуковую і практычную значнасць.
Двухбаковае партнёрства БДУ з В’етнамам з году ў год умацоўваецца і развіваецца. Актывізацыя супрацоўніцтва дазволіла ўжо ў 2012 г. у паўтара раза павялічыць агульную колькасць в’етнамскіх студэнтаў. Сёння іх у БДУ навучаецца звыш 50. Акрамя таго, год таму было падпісана пагадненне паміж нашай ВНУ, Інстытутам біяарганічнай хіміі НАН Беларусі, Цэнтральным батанічным садам нашай краіны і Інстытутам хіміі прыродных злучэнняў В’етнамскай акадэміі навук і тэхналогій (ВАНТ) аб стварэнні НДЛ «Біятэхналогіі прыродных і сінтэтычных біялагічна актыўных рэчываў». Таксама чатыры доўгатэрміновыя навукова-тэхнічныя праекты БДУ атрымалі падтрымку в’етнамскіх партнёраў у рамках дзейнасці БВІАНТЦ. А адзін з гэтых праектаў – «Атрыманне на аснове бактэрый роду Pseudomonas прадуцэнта антыбіётыкаў феназінавага шэрагу і іх выкарыстанне ў медыцыне» – распрацоўвала кіраўнік НДЛ малекулярнай генетыкі і біятэхналогіі біялагічнага факультэта БДУ Ірына Фяклістава. Таксама яна кіравала сумеснымі даследаваннямі ў Ханоі на базе Інстытута сельскагаспадарчай генетыкі. Атрыманыя лекавыя прэпараты плануецца шырока выкарыстоўваць у медыцыне абедзвюх краін.
Жанна ВАСАНСКАЯ
