1–2 сакавіка ў БДУ прайшоў II міжнародны адкрыты студэнцкі турнір па парламенцкіх дэбатах «МОСТ БДУ–2014». 24 каманды дэбатараў з ВНУ Беларусі, Расіі і Украіны абмяркоўвалі, каму ў XXI стагоддзі патрэбныя правы чалавека.
Дэбаты – гульня адначасова вельмі простая і вельмі складаная. У кожным раўндзе ўдзельнічаюць чатыры каманды: дзве на баку ўрада і дзве на баку апазіцыі. За 15 хвілін да раўнда аб’яўляецца рэзалюцыя, напрыклад: «Гэтая палата лічыць, што касмапалітызм лепшы, чым любая нацыянальная ідэя».
Каманды ўрада і апаненты павінны вылучыць аргументы за ці супраць рэзалюцыі адпаведна. Пры гэтым аргументы павінны быць выразнымі і зразумелым, прамовы структураваным, дэбатары павінны прыводзіць актуальныя прыклады і аналогіі з сусветнага вопыту. У канцы раўнда дасведчаны дэбатар – суддзя – выносіць рашэнне, хто заняў першае, другое, трэцяе і чацвёртае месцы. Усе гульцы атрымліваюць камандныя (за перамогу ці паразу) і асабістыя (за рыторыку, колькасць і якасць выкладзеных аргументаў) балы. Усяго падчас турніру дэбатары паўдзельнічалі ў пяці адборачных раўндах, а самыя лепшыя – у паўфінале і фінале.
А цяпер пра пераможцаў турніру. 
Тытул найлепшага спікера падзялілі два таленавітыя дэбатары – Аляксей Нагавіцын (студэнт факультэта сусветнай палітыкі МДУ імя М. В. Ламаносава) і Ілья Андросаў (выпускнік МДТУ імя М. Э. Баўмана). А камандай-пераможцай стала Minty chicken у складзе Юліі Гульцяевай (Расійскі эканамічны ўніверсітэт імя Г. В. Пляханава) і Сяргея Базыліка (Маскоўскі фізіка-тэхнічны інстытут). Найлепшым суддзёй прызнана Ксенія Цыганок, выпускніца Інстытута журналістыкі БДУ.
Але перамога – гэта не самае важнае, што можна атрымаць на турніры. Дэбаты – гэта выдатная магчымасць абмеркаваць тэмы, якія цябе хвалююць, але якія дзіўна або складана абмяркоўваць дома на кухні («Гэтая палата адменіць любыя абмежаванні на публічную галізну», напрыклад), або тэмы, якія трывожаць сусветную супольнасць і па якіх карысна сфарміраваць меркаванне любому цывілізаванаму чалавеку («Гэтая палата забароніць адмаўленне халакосту», або «Гэтая палата будзе вучыць дзяцей у школах падвяргаць сумневу любыя аўтарытэты»).
Ці часта вы задумваецеся пра тое, чаму нельга (або можна?) адмаўляць факт спробы знішчэння цэлага народа ці навошта патрэбныя аўтарытэты? Дэбаты – гэта шанец навучыцца думаць крытычна і выказваць свой пункт гледжання выразна, структуравана і ўпэўнена. Гэта шанец навучыцца слухаць суразмоўцу і спрачацца з ім цывілізавана. І набыццё такіх навыкаў (а яшчэ новых сяброў і знаёмых па ўсёй СНД, куды ж без гэтага) для ўдзельнікаў турніру нашмат важнейшае за перамогу ці паразу.
Арганізатар мерапрыемства – клуб дэбатаў гістарычнага факультэта БДУ.
Арцём ГУЦУЛЮК
P.S. Паназіраць за турнірам «МОСТ БДУ–2014» можна на сайце газеты “Універсітэт” у раздзеле http://www.gazeta.bsu.by/video/
