Кафедра гісторыі Беларусі новага і найноўшага часу, якая адзначыла 20-гадовы юбілей, багатая на яркія падзеі, славутыя імёны людзей, якімі могуць ганарыцца студэнты.
Менавіта ў чэрвені 1994 г. ва ўмовах станаўлення суверэннай беларускай дзяржаўнасці і пашырэння курса айчыннай гісторыі ў БДУ былі створаны дзве новыя кафедры: гісторыі Беларусі старажытнага часу і сярэдніх вякоў (загадчык – дацэнт П. А. Лойка, цяпер – дацэнт Ю. Л. Казакоў) і гісторыі Беларусі новага і найноўшага часу. Спачатку ёй загадваў прафесар П. І. Брыгадзін, а з 1999 г. дацэнт А. Г. Каханоўскі.
Цяперашні калектыў кафедры ў складзе болей за 20 выкладчыкаў і 3 лабарантаў працягвае найлепшыя традыцыі сваіх настаўнікаў і папярэднікаў. Яны былі закладзены яшчэ першым рэктарам, вядомым гісторыкам-славістам У. І. Пічэтам. У 1922 г. у складзе педагагічнага факультэта вылучылася сацыяльна-гістарычнае аддзяленне, дзе абавязковым прадметам быў вызначаны курс гісторыі Беларусі, які выкладаў прафесар У. І. Ігнатоўскі. Ён, займаючы высокія дзяржаўныя пасады (камісар асветы ў 1920–1926 гг., прэзідэнт Беларускай акадэміі навук у 1928–1931 гг.), істотна паўплываў на фарміраванне нацыянальнай і культурнай палітыкі, увасобленай у беларусізацыі.
Як бачым, курсы па айчыннай гісторыі выкладаліся ў БДУ з першых дзён, але адмысловая кафедра гісторыі БССР утварылася толькі ў 1958 г. дзякуючы намаганням Л. С. Абецэдарскага.
Усё жыццё Лаўрэнція Сымонавіча з 1937 г. (за выняткам гадоў Вялікай Айчыннай вайны, калі ён служыў у арміі) было цесна звязана з БДУ. Пасля заканчэння гістфака і аспірантуры ён працаваў старшым выкладчыкам кафедры гісторыі СССР, загадчыкам гэтай кафедры, а з верасня 1958 г. – загадчыкам кафедры гісторыі БССР. Хутка таленавіты навукоўца і педагог стаў доктарам гістарычных навук, прафесарам, членам-карэспандэнтам Акадэміі педагагічных навук СССР (1968). Узначалены ім калектыў кафедры быў цесна звязаны з агульнаадукацыйнай школай, аказваў дзейсную дапамогу ў павышэнні кваліфікацыі настаўнікам. З удзелам Л. С. Абецэдарскага і яго паплечнікаў у свет выйшлі асноўныя савецкія выданні па гісторыі Беларусі, а таксама вучэбныя дапаможнікі па гісторыі БССР для сярэдняй школы (якія вытрымалі 13 выданняў!)
Дзякуючы дзейнасці Л. С. Абецэдарскага, П. І. Брыгадзіна, А. Г. Каханоўскага, кафедра гісторыі Беларусі новага і найноўшага часу стала адной з самых прэстыжных кафедраў нашага ўніверсітэта. Пра гэта сведчыць павелічэнне колькасці студэнтаў, якія жадаюць слухаць курсы такіх аўтарытэтных выкладчыкаў, як акадэмік М. П. Касцюк, прафесары М. І. Зялінскі, І. Ф. Раманоўскі, У. К. Коршук, дацэнты Л. М. Кулеш, Л. А. Осіпава, В. А. Цяплова, В. С. Макарэвіч, Г. І. Маскевіч, А. В. Бурачонак. Расце лік аспірантаў: у бягучым навуч. г. імі сталі 5 выпускнікоў (летась – 4).
Толькі за паўгода кандыдацкія дысертацыі абаранілі Аліна Верамейчык і Віктар Хаданёнак, а доктарскія даследаванні Андрэя Лукашэвіча і Аляксандра Каханоўскага рэкамендаваны да абароны. У 2013 г. зроблена 92 публікацыі, у тым ліку 8 падручнікаў, 3 манаграфіі і 1 зборнік дакументаў. Разам з тым прэстыж кафедры трымаецца і на плённай працы студэнтаў, магістрантаў, аспірантаў.
Новых здзяйсненняў вам, калегі!
Дацэнт Альберт КОТАЎ
