Год моладзі пачаўся яркай падзеяй, якая задае тон на ўвесь 2015 год.
29–31 студзеня на базе Беларускай дзяржаўнай сельскагаспадарчай акадэміі ў Горках Магілёўскай вобласці прайшоў Рэспубліканскі студэнцкі форум «Моладзь – надзея і будучыня Беларусі», у якім прынялі ўдзел 34 ВНУ.
У трохдзённую праграму форуму былі ўключаны такія мерапрыемствы, як выстава моладзевых праектаў, сустрэча лідараў студэнцкага актыву ў фармаце адкрытага дыялогу «Моладзь Беларусі: традыцыі і будучыня» з міністрам адукацыі Рэспублікі Беларусь Міхаілам Жураўковым, намеснікам міністра адукацыі Віктарам Якжыкам, фінал рэспубліканскага спартыўнага спаборніцтва па чэрлідынгу «Формула будучыні: моладзь+здароўе».
Упраўленне выхаваўчай работы з моладдзю БДУ прыняло актыўны ўдзел у форуме: у экспазіцыі выставы былі прадстаўлены, напрыклад, такія грамадзянска-патрыятычныя праекты, як «Святло Вялікай Перамогі» і «У гонар Вялiкай Перамогi». Акрамя таго, дэманстраваліся і інавацыйныя праекты цэнтра моладзевых інавацый і прадпрымальніцтва «Start-up БДУ». Лідары моладзевых арганізацый Яўген Харук (старшыня генеральнага камітэта студэнцкай асамблеі БДУ), Павел Лабацэвіч (старшыня савета па якасці адукацыі), Павел Бунос (старшыня ГА «Студэнцкі саюз БДУ») і Вераніка Луд (старшыня каардынацыйнага савета студэнцкіх саветаў інтэрнатаў БДУ) выступілі з асноўнымі палажэннямі і тэхналогіяй рэалізацыі рэспубліканскага праекта «Адукацыя вачыма моладзі» на сустрэчы з міністрам адукацыі Міхаілам Жураўковым.
Яркай дэманстрацыяй актыўнага развіцця моладзевага спартыўнага руху было правядзенне ў рамках форуму фіналу рэспубліканскага спартыўнага спаборніцтва па чэрлідынгу. Сёння чэрлідынг ужо не прывязаны да пэўных спартыўных падзей, ён – самадастатковая спартыўная адзінка, са сваёй асацыяцыяй, чэмпіянатамі і развітым танцавальным складнікам, які ператварае выступ чэрлідараў у сапраўднае маляўнічае шоу. Прыгажосць, пластыка, цікавая пастаноўка танца і музычнае суправаджэнне каманды Белдзяржуніверсітэта пацешылі не толькі гледачоў, але і прафесійнае журы. У выніку каманда DanStart пад кіраўніцтвам Дар’і Стрыгінай заняла першае месца ў фінале рэспубліканскага спаборніцтва ў намінацыі «Freestyle team» (спартыўна-танцавальны чэрлідынг з пампонамі).
Насычаная дзелавая праграма форуму, рэалізаваная ўпершыню ў фармаце адкрытага дыялогу, дазволіла студэнцкім лідарам БДУ абмеркаваць асноўныя кірункі развіцця моладзевых грамадскіх арганізацый як з кіраўнікамі Міністэрства адукацыі, з рэктарам Горацкай акадэміі, так і са сваімі аднагодкамі. Тры дні форуму аб’ядналі каля 1000 студэнтаў для плённага абмеркавання студэнцкага жыцця, планаў на будучыню і вырашэння праблем.
Атмасфера, настроі, дыскусіі форуму яшчэ раз даказалі, што маладосць з яе высакародным запалам ёсць адна з найвялікшых сіл прагрэсу!
Наталля РАМАНАВА, намеснік начальніка УВРМ
