Рэканструкцыя стадыёна «Дынама» – адна з самых маштабных будоўляў Мінска. На ёй працуе зводны міжнародны атрад Беларусі, Расіі і Украіны. У гэтым годзе ад атрада на аб’екце працуюць 35 чалавек: 21 беларус, 8 хлопцаў з Украіны і 6 з Расіі. Мы даведаліся ў хлопцаў, якімі працамі яны займаюцца і як праводзяць вольны час.
— Хлопцы займаюцца ў асноўным падсобнай працай: пераносяць арматуру, падаюць інструменты, заліваюць бетон, – распавядае Лойка Антон, камісар будаўнічага зводнага студэнцкага атрада.
— Як праводзіўся адбор людзей?
— Выбіралі самых лепшых, самых актыўных хлопцаў. Тых, хто сапраўды хоча і гатовы дапамагчы нашай краіне ў гэтым праекце.
Пра тое, як трапілі ў атрад, пра адносіны ўнутры калектыву і пра ўражанні ад Беларусі мы даведаліся ў Аляксандра і Дзяніса, прадстаўнікоў Расіі і Украіны.
— Пра атрад я даведаўся ад таварышаў па Камуністычнай партыі Расійскай Федэрацыі, яны і арганізавалі нашу паездку сюды, – дзеліцца Аляксандр.
— Якія адносіны з рабятамі з іншых краін? Чым займаецеся ў вольны час?
— Добрыя, з кімсьці быў знаёмы з мінулагодняй паездкі, з кімсьці пазнаёміўся цяпер. Я першы сакратар камсамола Данецкай вобласці, камсамольцы – хлопцы таварыскія, таму праблем не ўзнікае. А ў непрацоўны час знаёмімся з Мінскам. Былі і на парадзе на Дзень незалежнасці, і на выступе прэзідэнта, наведалі розныя музеі, схадзілі ў аквапарк, – распавядае Дзяніс.
— Якія ўражанні ад Беларусі?
— Каласальныя ўражанні. Беларусь і Расія вельмі падобныя паміж сабой. Але ёсць і адрозненні. Як мне падалося, людзі тут інтэлігентней, ды і няма прыкметнага расслаення насельніцтва па сацыяльным становішчы, усе роўныя, – кажа Аляксандр.
Рэканструкцыя стадыёна «Дынама» праводзіцца дзеля таго, каб стадыён мог адпавядаць чацвёртай, то ёсць вышэйшай, катэгорыі УЕФА. Ўвесці ў эксплуатацыю аб’ект плануецца ў 2018 годзе.
Аліна ЛЕМЕШ, Дзіяна ДАРОНIНА
