Прэзентацыя кнігі пра сямейныя дынастыі «Лёсам звязаныя з БДУ» адбылася ў габеленавай зале рэктарата.
Кніга распавядае пра 14 прафесарска-выкладчыцкіх дынастый, прадстаўнікі якіх працавалі і працягваюць прафесійныя традыцыі ў БДУ. Сярод іх вядомыя навукоўцы, рэктары, прарэктары, дэканы, загадчыкі кафедраў, выкладчыкі. Кожны з іх зрабіў значны ўнёсак у развіццё і станаўленне ўніверсітэта.
Адкрывае выданне першы рэктар БДУ Уладзімір Пічэта. Менавіта ён стаў заснавальнікам не толькі вядучай ВНУ Беларусі, але і ўсёй універсітэцкай супольнасці.
Алег Лукашоў
Некаторыя сем’і ў сваім радаводзе налічваюць чатыры пакаленні. Напрыклад, дзясяты рэктар БДУ Канстанцін Лукашоў у 1952 годзе ўзначаліў БДУ. Сёння яго сямейным прадаўжальнікам стаў унук – дацэнт кафедры інжынернай геалогіі і геафізікі геаграфічнага факультэта БДУ Алег Лукашоў.
Фёдар Сеўчанка
Шмат прапрацаваў у БДУ і пляменнік яшчэ аднаго рэктара – Фёдар Сеўчанка, які займаў пасаду намесніка дырэктара па гаспадарчай частцы НДІ прыкладных фізічных праблем, што носіць імя яго знакамітага сваяка Антона Сеўчанкі.
Дзмітрый Свірыдаў
Таксама цяперашні дэкан хімічнага факультэта Дзмітрый Свірыдаў працягвае справу свайго бацькі – акадэміка Вадзіма Свірыдава, былога дырэктара НДІ ФХП.
Сяргей Умрэйка
Акрамя іх на ўрачыстым мерапрыемстве прысутнічалі прадстаўнікі вядомых універсітэцкіх сем’яў: Сяргей Умрэйка – навуковы супрацоўнік ННДЦ маніторынгу азонасферы БДУ, Уладзімір Навумовіч – дацэнт філалагічнага факультэта, Аляксандр Радына – дацэнт механіка-матэматычнага факультэта, Ірына Папова (дынастыя Чыгір) – супрацоўнік юрыдычнага факультэта, Вольга Ігнаценка – старшы выкладчык ФФСН, Аляксандр Бокі – выпускнік ФМА (дынастыя Царук), Святлана Лапіна – загадчык кафедры АКП РБ і кіраўнік інавацыйнай пляцоўкі ў БДУ, Аляксей Чалядзінскі – доктар фіз.-мат. навук, а таксама рэктар Сяргей Абламейка – родапачынальнік уласнай дынастыі (яго дачка Марыя з’яўляецца дацэнтам кафедры дзяржаўнага кіравання юрыдычнага факультэта).
Аляксандр Радына з рэктарам БДУ Сяргеем Абламейкам
Выданне не мае аналагаў ні ў адной ВНУ краіны. Сабраныя тут біяграфіі пададзены ў фармаце рэалістычных гісторый з вытрымкамі з дзённікаў, інтэрв’ю і ўспамінаў. Часткі дапоўнены нагляднымі фотаматэрыяламі.
Аляксей Чалядзінскі, Ірына Папова, Вольга Ігнаценка і Святлана Лапіна
Па словах начальніка Псіхалагічнай службы БДУ Руслана Папка, дадзеная прэзентацыя падвяла вынік тыдня сям’і, які адбыўся ў Беларускім дзяржаўным універсітэце і ў рамках якога прайшло каля 20 мерапрыемстваў з удзелам болей як 1000 супрацоўнікаў і студэнтаў БДУ і Акадэміі кіравання пры Прэзідэнце РБ. Арганізатары выказалі спадзяванне, што ўшаноўванне ўніверсітэцкіх дынастый стане яшчэ адной добрай традыцыяй, і паабяцалі працягнуць працу па сістэматызацыі інфармацыі пра сем’і выкладчыкаў БДУ.
Яраслаў РАМАНОЎСКІ
