Быць добрым – гэта так проста! Дапаможам Чахоўшчынскай школе-інтэрнату (+слайды)

11 Apr, 2018.

Валанцёры філфака БДУ арганізавалі першы дабрачынны stand-up-вечар БДУ 2 красавіка. Бралі ўдзел комікі, якіх часта можна ўбачыць на “адкрытых мікрафонах” Мінска. Уваход ажыццяўляўся па падарунках, якія перададуць ДУА "Чахоўшчынская дапаможная школа-інтэрнат", дзе пражывае больш за 50 дзяцей ва ўзросце ад 6 да 16 гадоў.

Са смеху і выдатнага настрою пачаўся працоўны тыдзень. Арганізатары мерапрыемства – добраахвотніцкая арганізацыя "С.Н.В." філфака БДУ ("Сообщество нормальных волшебников") яшчэ раз адзначыла, як цудоўна дапамагаць таму, каму патрэбная падтрымка. Канцылярыя і прадметы асабістай гігіены – вось чым напоўнілі вялікую скрынку для выхаванцаў школы-інтэрната, прыйшоўшы на філфак, студэнты і госці ўніверсітэта.

Комікам удалося зарадзіць пазітывам гледачоў на будучую вясну. Калі за акном надвор'е не цешыць, хочацца незвычайных падзей, каб развесці пахмурныя дні. Атрымліваецца, што яшчэ ў гэты вечар адзначылі дзень смеху, які прайшоў не так даўно. Адны з найлепшых комікаў сталіцы прыйшлі падтрымаць дабрачынную ініцыятыву студэнтаў: Тарас Нікіцін, Іван Шумейка, Павел Радзевіч, Вікторыя Пачкайла, Ягор Свірскі, Аляксандр Калінкін, Максім Маісееў. Менавіта яны часта весяляць людзей на іншых пляцоўках Мінска. Жартавалі на разнастайныя тэмы: пра вучобу ў медыцынскай ВНУ і працу ў аптэцы, пра студэнцтва і далейшае жыццё, вялікія і маленькія гарады, шкодныя звычкі і пра тое, як цяжка даводзіцца дзяўчатам і аўтамабілістам. І шмат-шмат іншага.

Самы юны стэндапер (яму 16 гадоў) Ягор Свірскі, пачаў з таго, што для яго хвалююча выступаць на гэтай сцэне, таму што калі яму атрымаецца добра аджартаваць, то ў яго з'явяцца шанцы паступіць ва ўніверсітэт на бюджэт. Заканчваў вечар Максім Маісееў словамі пра тое, што ўсіх нас сабрала сур'ёзная місія – дапамагчы дзецям дапаможнай школы-інтэрната, а сумеснымі высілкамі лёгка можна падарыць камусьці шчасце.

Як падзяліліся арганізатары вечара, валанцёрства прыносіць ім мноства цёплых момантаў, прыемных усмешак і асабістых перамог.

Хрісціна Катовіч, факультэт сацыякультурных камунікацый, 2 курс:

- У чым бачу каштоўнасць нашай працы? Я цяжка ўспрымаю абыякавасць людзей, хочацца, каб такіх было менш. Хоць, магчыма, чалавек проста не ведае, што камусьці патрэбная яго дапамога. Якраз наша арганізацыя дапаможа апавясціць іншых пра тых, хто мае патрэбу ў падтрымцы. У нас сабралася вялікая каманда валанцёраў – кожны зрабіў свой унёсак у агульную справу. Дзеці раней ставілі пастаноўкі, праводзілі акцыі, я падумала, што моладзі сёння будзе цікава? Вось і з'явілася ідэя правесці такі stand-up-вечар. Знайсці комікаў дапамог знаёмы, а стэндаперы з радасцю адгукнуліся на запрашэнне. Зараз хочацца правесці такі ж вечар і на сваім факультэце.

Аляксандра Таранчанка, кіраўнік добраахвотніцкай арганізацыі, філалагічны факультэт, 4 курс:

- Галоўная прычына таго, што мы сабраліся тут гэтым вечарам – гэта скласці падарункі для дзяцей са школы-інтэрната. Іх мы наведваем досыць часта, не так даўно (17 сакавіка) паказвалі дзецям спектакль, разам з імі малявалі і гулялі. І гэта выдатна – правесці дзень з дзецьмі! Яны ведаюць, калі мы прыедзем, чакаюць нас, крычаць: "Нашы любімыя валанцёры!" – і не хочуць адпускаць. Я валанцёр вось ужо больш за 5 гадоў, нават калі яшчэ не была студэнткай філфака БДУ, ездзіла ў інтэрнаты з іншымі супокамі. За гэты час сабралася скарбонка кранальных гісторый і момантаў, якія саграваюць сэрца і натхняюць.

Падзяка ад дзяцей – вось дзеля чаго варта займацца валанцёрствам. Адзначым, што ўсе ахвотнікі дапамагчы яшчэ могуць унесці свой уклад у агульную добрую справу да 13 красавіка ўключна! Падарункі ў Чахоўшчынскую дапаможную школу-інтэрнат павязуць на наступных выхадных. Кантакты і дадатковая інфармацыя ёсць у групе "Укантакце" або тэлефануйце на нумар: +37525 797-70-43; +37529 542-24-97 (Аляксандра Таранчанка).

Алена ЛЯЎШЭНЯ

print

Вам таксама можа спадабацца: