Канферэнцыя пад такой назвай прайшла 27 красавіка на фізфаку па ініцыятыве кафедры англійскай мовы прыродазнаўчых факультэтаў.
Мерапрыемства ладзілася з мэтай развіцця навукова-пазнавальнай актыўнасці студэнтаў, для ўдасканалення навыкаў публічнага выступлення і вуснай камунікацыі на англійскай мове, а таксама раскрыцця творчага патэнцыялу, крытычнага мыслення.
Па словах арганізатара і навуковага кіраўніка канферэнцыі Галіны Пусянковай, ідэя правядзення канферэнцыі ўзнікла пасля абмеркавання Нобелеўскай прэміі па фізіцы 2017 года. «З-за таго, што студэнты праявілі вялікую цікавасць да дадзенага пытання, я прапанавала дэталёва вывучыць гісторыю прысуджэння ўсіх Нобелеўскіх прэмій у галіне фізікі, пачынаючы з 1901 года, і студэнты тут жа падтрымалі гэтую ідэю з велізарным энтузіязмам, – распавяла Галіна Аляксееўна. – У працэсе падрыхтоўкі стала відавочна, што праект набывае значна большы маштаб, таму вырашылі правесці канферэнцыю. У выніку да яе далучыліся не толькі студэнты фізічнага факультэта, але і механіка-матэматычнага і ФРКТ. Колькасць удзельнікаў перасягнула 100 чалавек».
Падрыхтоўка вялася ў вельмі зладжанай камандзе (тэхнічны дырэктар, 10 спікераў, вядучыя, адказныя за кава-брэйк, за сустрэчу гасцей канферэнцыі, фатографы і г. д.). Вельмі сур’ёзная праца, звязаная з адборам, прэзентацыяй і падачай матэрыялу была праведзена са спікерамі. Акрамя гэтага, былі распрацаваны макет, праграма, анкеты. Студэнты былі настолькі натхнёныя самой ідэяй, што паказалі проста выдатны вынік. Пра гэта сведчаць і дадзеныя апытання. Усе госці і ўдзельнікі канферэнцыі засталіся задаволеныя ўсімі этапамі. Адно з асноўных пажаданняў – правядзенне такіх мерапрыемстваў у далейшым. І гэта, бадай, самая вялікая ўзнагарода для арганізатараў. Усе ўдзельнікі канферэнцыі былі ўзнагароджаны сертыфікатамі БДУ і каштоўнымі падарункамі ад спонсараў.
Антон Нікіфараў, тэхнічны дырэктар, студэнт 2 курса: «Я адказваў за самую значную частку працы – прэзентацыю. Задача складалася ў тым, каб апрацаваць тэкставы матэрыял усіх спікераў і прывесці яго ў адпаведнасць з канцэпцыяй прэзентацыі, пры гэтым прытрымліваючыся вызначаных патрабаванняў напаўнення кантэнту. Дзякуючы выразнаму плану і інструкцыі, каманда спрацавала проста выдатна. Прэзентацыя атрымалася не толькі змястоўнай, але і эфектнай».
Валерыя Клопава, спікер, студэнтка 2 курса: «Я адразу праявіла цікавасць да канферэнцыі. Бо гэта такі шанец! Практыка вуснай англійскай і публічнага выступлення. Акрамя таго, мая праца заключалася ў рэкламе канферэнцыі. Я лічу, што наша каманда спрацавала выдатна! Упэўнена, мне не раз прыйдзецца гэта рабіць у далейшым. Наш навуковы кіраўнік Галіна Аляксееўна Пусянкова закладвала падмурак усёй працы. Таксама яна займалася пошукамі спонсараў. Я рада, што ў яе ўсё атрымалася, і дзякуючы ёй наша канферэнцыя прайшла вельмі добра. Яна ўсёй душой перажывала за кожнага, і мы стараліся не падмануць яе чаканняў».
Юлія Кароль, спікер, студэнтка 2 курса: «Атрыманне новых ведаў, адчуванняў і вопыту. Гэта ж вельмі цікава! Я даведалася шмат цікавых фактаў пра саму прэмію. Вядома, я хвалявалася за сваё выступленне. Але ўсе справіліся на выдатна. Мне здаецца, у падобных мерапрыемствах павінен прысутнічаць дух суперніцтва. Гэта своеасаблівы стымул. Хочацца быць лепшым, чым іншыя выступоўцы. Немалаважную ролю адыграла пытанне анкеты: «Адзначце траіх спікераў, якія вам спадабаліся больш за ўсiх». Гэта вельмі матывавала! Асаблівая падзяка нашаму навуковаму кіраўніку Галіне Аляксееўне, якая змагла запаліць у нас агонь і правільна матываваць да працы! Я з задавальненнем прыму ўдзел у падобным мерапрыемстве ў далейшым не толькі ў якасці спікера, але і арганізатара!»
Кацярына Яромiна, спікер, вядучая, студэнтка 3 курса: «Пачалося ўсё з таго, што маю ўпартую працу на парах англійскай мовы адзначыла сапраўдны прафесіянал сваёй справы – Галіна Аляксееўна Пусянкова. Менавіта ад яе і паступіла прапанова паўдзельнічаць у конкурсе перакладчыкаў у МІПСА. Я з радасцю прыняла ўдзел і ў канферэнцыі. Вопыт удзелу ў конкурсах зрабіў мяне значна больш упэўненай у сабе, так што я была поўная энтузіязму. І, вядома, проста нельга было прапусціць такую магчымасць падняць свой узровень гутарковай англiйскай, канчаткова пераадолець страх публічных выступленняў.
Асабліва мяне парадавала камандная праца. Усё прайшло нават лепш, чым мы чакалі. Усе ўдзельнікі трымаліся вельмі годна і сапраўды змаглі данесці нешта новае да кожнага слухача (а іх было нямала, сабралі амаль усю паточную (!!!) аўдыторыю). Прыемным сюрпрызам было тое, што ў канцы нас чакала сапраўдная цырымонія ўзнагароджання! Дзякуй велізарнае за гэта Галіне Аляксееўне. Асабліва парадавалі падарункі ад спонсараў у выглядзе партатыўных зарадак і купонаў на піцэрыю».
Марына Чвек, студэнтка 3 курса: «Змястоўная праграма, дакладная арганізацыя, добразычлівая атмасфера, актуальная тэма. Даведалася шмат новага і карыснага для сябе. Выступленні на канферэнцыі сталі добрай трэніроўкай для ўсіх тых, хто збіраецца ў будучыні наведваць якія-небудзь міжнародныя мерапрыемствы. Выдатна складзена праграма, прадумана ўсё да дробязяў – і прафесійная, і нефармальная частка! Нечакала, што канферэнцыя будзе настолькі цікавай.»
Вікторыя Чысцякова, старшы выкладчык англійскай мовы: «Матэрыялы канферэнцыі несумненна цікавыя для студэнтаў. Канферэнцыя заслугоўвае станоўчай адзнакі за высокі ўзровень арганізацыі і актыўную працу ўсіх яе ўдзельнікаў. Аўдыторыя была забяспечана найноўшымі электроннымі сродкамі для дэманстрацыі дакладаў удзельнікаў. Студэнты былі добра падрыхтаваны. Канферэнцыя сведчыць аб непасрэдных навукова-арыентаваных інтарэсах студэнтаў фізічнага факультэта, яна садзейнічае павышэнню матывацыі да вывучэння англійскай мовы».
Іван Жалнярэвiч, старшы выкладчык кафедры агульнай фізікі: «Досыць часта, збіраючыся на падобныя канферэнцыі, я назапашваў кафеін і запалкі для вачэй, але ў гэты раз усё было не так празаічна. Першае, што мяне парадавала – тое, што студэнты сапраўды папрацавалі з літаратурай і знайшлі цікавыя і малавядомыя факты пра вялікіх людзей – уладальнікаў Нобелеўскай прэміі па фізіцы. Другое – і не менш важнае для студэнтаў, якія плануюць займацца навукай – гэта форма прадстаў-лення і мова. У большасці выпадкаў спi- керы выкарыстоўвалі прамую і зразумелую неспрактыкаванаму слухачу (асабліва мне) англiйскую мову, не спрабуючы ўзмацніць значнасць сваёй працы складанымі фразамі і канструкцыямі. Акрамя таго, нашы студэнты з вялікай увагай паставіліся да свайго знешняга выгляду – такіх строгіх, і ў той жа час прыгожых людзей я сустракаў толькі на іспытах. Асобнае дзякуй арганізатарам: тэхнічная і спонсарская частка (уключаючы каву-брэйк) на самым высокім узроўні. Спадзяюся, што дадзенае мерапрыемства стане першым у шэрагу штогадовых канферэнцый у нечакана цікавым і пазнавальным фармаце «англійская мова + фізіка». І дзякуй за запрашэнне!»
Відавочна, што канферэнцыя знайшла станоўчы водгук як ва ўдзельнікаў, так і гасцей і падмацавала ўзаемасувязь паміж ведамі англiйскай мовы і прафесійнай падрыхтоўкай будучага спецыяліста.
Павел ПЯТРЫШЧАЎ
