Мы адкрыем новую галактыку! Капуснік БДУ зноў фантаніраваў ідэямі студэнтаў [+cлайды і відэа]

4 Dec, 2018.

Пра яго кажуць, яго чакаюць, ад яго атрымліваюць асалоду. А пошук за пару дзён да мерапрыемства лішняй пары квіткоў – штосьці накшталт спаборніцтва; часам нават настае і стадыя запалу.

22 лістапада на сцэне Ліцэя БДУ прайшоў "капуснік" – конкурс творчасці і таленту для першакурснікаў нашага ўніверсітэта. Усяго гэта мерапрыемства сабрала каля тысячы студэнтаў і запрошаных гасцей, а яшчэ некалькі сотняў далучылася да мерапрыемства анлайн дзякуючы прамой трансляцыі ў Instagram. Вялікая колькасць падарункаў, файных жартаў, бясконцая плынь энергіі, хлопцы і дзяўчаты з бэйджами, шмат зон актывацый і яшчэ больш дэкарацый –менавіта гэта ўсё зрабіла “капуснік” такім запамінальным. А ад таго, што частка запрошаных гасцей – выпускнікі БДУ, становіцца яшчэ больш прыемна, таму што гэта ўжо традыцыйнае мерапрыемства, якое перадаецца з пакалення ў пакаленне.

Сёлета яркай фішкай для адкрыцця “Капусніку БДУ” стала відэа, якое запомнілася ўсім прысутным надоўга: прынамсі, да наступнага года, дзе, мы ўпэўнены, студэнцкі саюз БДУ здзівіць нас ізноў.

У камандзе арганізатараў "Капусніку БДУ" кожны год адбываюцца папаўненні: у многіх за плячыма не адзін год досведу арганізацыі мерапрыемстваў. У гэты раз атрымалася пагутарыць з новаспечаным членам студэнцкага саюза БДУ Рэвекай Ахраменка, студэнткай другога курса факультэта журналістыкі.

- Гэта твой першы "капуснік"?

- Не, гэта мой другі "Капуснік БДУ". У першы раз я была ўдзельніцай, прадстаўляла журфак разам са сваёй камандай. Ну а сёлета я здымаю гісторыі для “Інстаграма” студсаюза.

- Што сёлета прыцягнула і запомнілася больш за ўсё?

- Кліп ад студсаюза ў самым пачатку “капусты”. Дэкарацыі мехмата.

- Якія адчуванні, калі не трэба рэпетаваць рэплікі да выступлення, а можна быць у зале і назіраць збоку?

- Ты разумееш, што “капуста” не абмяжоўваецца толькі тваім выступленнем, што ёсць мноства іншых сфер, ад якіх залежыць мерапрыемства. Ну і прыемна бачыць і ўсведамляць, што ў студсаюзе ты робіш такое свята для першакурснікаў.

- Калі мехмат сёлета прыляцеў з космасу, то як ты лічыш, куды далей? Ёсць здагадкі, што будзе ў наступным годзе?

- Мы адкрыем новую галактыку! Ну не ведаю. Складанае пытанне, таму што кожны год першакурснікі ўсе больш таленавітыя, арыгінальныя і звар'яцелыя – у добрым плане. Хочацца, вядома, ужо адысці ад звыклага фармату "капусты", зрабіць штосьці новае, таму што трохі надакучыла шмат гадоў запар бачыць прыкладна адно і тое. Але пакуль што я не магу прапанаваць прыдатнай альтэрнатывы, таму мае прэтэнзіі неабгрунтаваныя. Вельмі спадзяюся, што ў наступным годзе мы зробім штосьці іншае і выдатнае, каб задаць тон наступным "капустам".

Мы вельмі спадзяёмся, што так і здарыцца, і, сапраўды, наступны год будзе яшчэ ярчэйшы і запомніцца вялікай колькасцю пазітыву і крэатыву. Хоць здаецца, што ўжо даўно дасягнулі дасканаласці, але для студсаюза БДУ гэта толькі чарговая прыступка на шляху да новых вяршыняў. А пакуль вернемся ў рэчаіснасць і пагаворым з куратарам каманды-пераможцы.

-Ты сам захацеў быць куратарам, ці табе прапанавалі?

- Прапанаваў старшыня студэнцкага саюза механіка-матэматычнага факультэта Саша Карайчанцаў.

- І што адчуваеш, калі “капуста” прайшла і перамога за ММФ?

- Ну-у-у… Па-першае, я выспаўся. Па-другое, гонар за свой факультэт. ММФ 4 гады запар займае прызавыя месцы. І мы першы факультэт, які заняў першае месца тройчы. Гэта вельмі файна! Я рады! Неяк так.

- Сёлета ММФ скарыў космас. Што мехмат скорыць у наступным годзе?

- У наступным годзе і ўбачым. Час пакажа.

На жаль, мы не змаглі даведацца, да чаго рыхтавацца ў наступным годзе, аднак студэнты абяцалі: "Сапраўды будзе нешта грандыёзнае!" Затое нам удалося пагутарыць з удзельнікамі каманды ММФ і даведацца іх невялікія сакрэцікі.

- Чаму вы вырашылі ўдзельнічаць у “Капусніку БДУ”?

- Новы досвед, людзі, хацелася паўдзельнічаць у чымсьці такім маштабным у нейкім плане, – падзялілася з намі Кацярына Кошкіна.

- Прызнайцеся, ішлі па перамогу?

- Толькі па яе, была велізарная падтрымка з боку старшакурснікаў, і гэта падагравала маю матывацыю, – распавёў Арсеній Баско.

- Чаму вырашылі скарыць космас?

- Вырашылі, што хочам файныя дэкарацыі, і прыйшла думка пра космас, і далей адштурхоўваліся ад гэтага, – адказала Кацярына Кошкіна.

- На мехмаце можна і не толькі космас скарыць, – дапоўніў Арсеній Баско.

- Ці не ўзнікла жаданне ў наступным годзе стаць куратарам?

- Хутчэй за ўсё так і зраблю, калі будзе магчымасць, – узрадаваўся Арсеній Баско.

- Чаму вырашылі скарыць космас?

- Я думаю, ніхто не чакаў ад нас космасу сёлета, і гэта сыграла на нашу карысць. Дык хай інтрыга будзе і ў наступным годзе, – завяршыў аповед пра планы ММФ Арсеній Баско.

Атрымліваецца, што сёлета студэнты заявілі пра сябе, і яны відавочна не маюць намер спыняцца на дасягнутым.  А гэта ўскладняе (ці спрашчае – як паглядзець) працу для суддзяў. Сёлета было шмат цікавых і яркіх выступленняў. Цікава, наколькі складана было падзяліць месцы па справядлівасці? На гэта пытанне нам дапамог знайсці адказ Ілья Лемец, дырэктар крамы "Крама БДУ":

- Сёлета, на дзіва, у судзейскай калегіі не ўзнікла пытанняў, каму аддаць першае месца, а вось што да астатніх намінацый, то там меркаванні разышліся. Абраць было няпроста, але, нягледзячы на гэта, мы прыйшлі да агульнага рашэння.

Ну што ж, мабыць, лёс суддзяў такі, але добра, калі ёсць канкурэнцыя. Суддзям ёсць пра што паспрачацца, а камандам цікавей змагацца за прызавыя месцы і суперскія прызы ад спонсараў.

Мы ж будзем з нецярпеннем чакаць наступнага года, каб убачыць, да якой каманды пяройдзе кубак рэктара БДУ за найлепшы нумар на "капусніку".

Пераможцы "Капусніку БДУ–2018":

Найлепшая група падтрымкі – факультэт міжнародных адносін;

Найлепшая мужчынская роля – Захар Саўчук, гістарычны факультэт;

Найлепшая жаночая роля – Ганна Чакун, факультэт журналістыкі;

Найлепшы жарт – "Нам падабаецца вучыцца ў БД(П)У" ад хімічнага факультэта;

Найлепшае мастацкае афармленне нумара – механіка-матэматычны факультэт;

Найлепшае фота – эканамічны факультэт;

Найлепшае відэа – гістарычны факультэт;

3 месца – эканамічны факультэт;

2 месца – факультэт міжнародных адносін;

1 месца – механіка-матэматычны факультэт.

Дыяна АРХІПЕНКА
Фота Васіля Кузьмічкіна
Яшчэ больш фота у лічбавым фотаархіве БДУ
Відэа:

print

Вам таксама можа спадабацца: