Сумленне і аферы: як прайшоў фінал праекта БДУ “Публіка і Я” [+cлайды]

5 Dec, 2018.

Шосты сезон праекта механіка-матэматычнага факультэта "Публіка і Я" завяршыўся 27 лістапада. Дзевяць удзельнікаў трымалі іспыт, выступаючы перад вялікай аўдыторыяй. 8 хвілін для таго, каб раскрыць сваё прамоўніцкае майстэрства і зацікавіць тэмай. Хто ж стаў каралём мікрафона?

Публіка і Я" – гэта праект, створаны студэнтамі для студэнтаў. На ім можна атрымаць базавыя веды для таго, каб стаць спікерам і папрактыкавацца ў выступленнях. Рэгістрацыя датэрмінова завяршылася – ахвотнікаў набралася за тры дні! У праграме шэсць блокаў і пяць хатніх заданняў, за якія ўдзельнікі атрымлівалі адзнакі. Але вырашальным было апошняе выпрабаванне – фінальнае выступленне перад аўдыторыяй, дзе ўдзельнікі паказалі ўсё, чаму яны навучыліся за два месяцы.

За гэты час удзельнікі прайшлі інтэнсіўнае навучанне. На асновах публічных выступленняў з Дзмітрыем Навумавым студэнты даведаліся, як складаць выступленне. З Паўлам Жуком прапрацавалі страх перад аўдыторыяй і навучыліся яго пераадольваць. Валянцін Болтач распавёў пра тое, як правільна прэзентаваць сябе і як напоўніць ідэяй сваё выступленне. Экспертам па невербаліцы стаў Ілья Сівец, а пра маніпуляцыі і чорную рыторыку распавёў Кірыл Дзяшкевіч.

Праверкай атрыманых ведаў стала фінальнае выступленне. Першае месца – за Даніілам Заломавым, студэнтам факультэта прыкладной матэматыкі і інфарматыкі. Яго выступленне – той прыклад, калі слабасць ператвараецца ў сілу. У хлопца парушана ўспрыманне чырвонага колеру, і ў сваім выступленні "Жыццё вачыма дальтоніка" ён распавёў, як бачыць свет. Упэўненасць, пазітыў і адвагу хлопца ацанілі не толькі журы, але і публіка. "Маленькая гісторыя пра вялікую трагедыю" – так драматычна пачаў студэнт. Удасканальваць свае навыкі аратара Данііл будзе з кнігай Крыса Андэрсана “TED talks. Словы змяняюць свет", якую яму падарылі арганізатары. Кожнаму прызавому месцу дастала і па фірмоваму кубку.

Другое месца дасталася студэнтцы механіка-матэматычнага факультэта Паліне Бялькевіч. Дзяўчына распавядала пра аферы Фрэнка Абігнейла, якога завуць найвялікшым ашуканцам XX стагоддзя. Дарэчы, Паліна і сама праварочвала аферы, праўда, бяскрыўдныя: у 5 класе за вафелькі праходзіла за аднакласніцу ўзроўні ў гульні Angry Birds. За цікавую тэму і шчырасць дзяўчына атрымала кнігу Джуліяна Трэжэра "Выступленне ў стылі TED. Кажу. Слухаю. Чую".

Трэцяе месца заняла Юлія Віцязь з механіка-матэматычнага факультэта з футурыстычнай тэмай "Якім будзе транспарт будучыні". Будучыня апынулася вельмі блізкай – Юлія распавяла пра ўжо існыя праекты Ілона Маска, напрыклад, Hyperloop – вакуумную трубу, дзе цягнікі рухаюцца з хуткасцю крыху меншай, чым хуткасць святла. Ці задумку злучыць усе сістэмы метро на планеце, каб дабрацца ад Лондана да Масквы на звычайным гарадскім транспарце. Студэнтка атрымала кнігу Радзіслава Гандапаса "Камасутра для аратара. Дзесяць частак пра тое, як атрымліваць і даваць задавальненне, выступаючы публічна".

Член журы Раман Зубачоў, намеснік старшыні ССЯА, адзначыў разнастайнасць аратараў: "Розныя тыпажы, розныя людзі, за якімі цікава назіраць".

Дарэчы, "Публіка і Я" сыходзіць на заслужаныя вакацыі, бо за плячыма шэсць сезонаў без перапынку! І вернецца з ужо новымі сіламі і ідэямі. Чакаем!

Надзея МАРХЕЛЬ
Фота Дар'і Ярашук
print

Вам таксама можа спадабацца: