#Нясумны юбілей: ФФСН сваволіць па святах [+cлайды]

4 Mar, 2019.

Як адзначыць двайны юбілей? Святкаваць цэлы тыдзень! З 18 па 22 лютага факультэт філасофіі і сацыяльных навук адзначаў сваё 30-годдзе і 140-годдзе псіхалагічнай навукі. У гонар гэтага студэнты і выкладчыкі факультэта арганізавалі крэатыўныя #Нясумны фэст псіхалогіі і квэст-семінар Cherchez la femme.

Творчых ідэй факультэту філасофіі і сацыяльных навук не пазычаць! Вырашыўшы адзначыць двайны юбілей з карысцю і задавальненнем ад пазнання, студэнты кафедры псіхалогіі арганізавалі ўнікальны фэст псіхалогіі #Нясумны. Іх падтрымалі супрацоўнікі кафедры і Псіхалагічнай службы БДУ, а куратарам стала дацэнт і намесніка дэкана па навуковай рабоце Галіна Фафанава.

Ідэю фэсту ацанілі імгненна – рэгістрацыя завяршылася праз некалькі дзён пасля анонсу. Аднак ахвотнікаў было так шмат, што арганізатары абвясцілі вольнае наведванне ўсіх семінараў. Шэсць дзён #Нясумнага – гэта 27 трэнінгаў і майстар-класаў ад студэнтаў, магістрантаў, аспірантаў факультэта. Пяць з іх правялі студэнты-чацвёртакурснікі. Кампетэнтныя маладыя людзі распавялі пра тое, як правільна ставіць мэты і расстаўляць прыярытэты, малявалі няісную жывёлу, каб лепш пазнаць сябе, як эфектыўна падрыхтавацца да іспыту, пазбавіцца ад пракрастынацыі і трывогі. Гэта не толькі рэалізацыя навучальнага метаду "роўны навучае роўнага", але і трэніроўка прафесійных навыкаў для студэнтаў-лектараў.

Выкладчыкі правялі цікавыя семінары, дзе распавялі, як навучыцца адрозніваць сапраўднага псіхолага ад "дэментара", ці можна вылечыць "ансарказмію", як узяць жыццё пад кантроль і стаць больш эфектыўным. Многае – у фармаце антынавуковай канферэнцыі, калі інфармацыя падаецца папулярна і з гумарам. У такой форме аналіз звышнатуральных здольнасцяў з пункту гледжання навуковай псіхалогіі прадставіў Аляксандр Лазоўскі. "Я рабіў яго пяць дзён запар і зусім забыўся пра сваю дзяўчыну", – прызнаўся малады выкладчык. Чаго не зробіш дзеля навукі! Як выявілася, "цуды" цалкам паддаюцца навуковаму тлумачэнню, а экстрасэнсы вельмі добра разумеюць законы псіхікі і выкарыстоўваюць іх у сваёй "працы".

У рамках фэсту 20 лютага прайшла сустрэча навуковага гуртка "Пляцоўка дыялогаў", прысвечаная яго дню нараджэння. Таксама на сустрэчы ўдзельнікі абмеркавалі перспектывы дысертацыйнага даследавання выпускніка кафедры псіхалогіі Ільі Лемеца.

Завяршыўся фэст 22 лютага займальным квэстам-семінарам Cherchez la femme, прысвечаным выбітным жанчынам-псіхолагам.  Яго арганізавалі студэнты і выкладчыкі кафедры псіхалогіі ФФСН БДУ пры падтрымцы ГА "Саюз жанчын БДУ" і Псіхалагічнай службы БДУ. У квэсце-семінары прынялі ўдзел 11 каманд студэнтаў ФФСН, а таксама факультэта журналістыкі, Інстытута псіхалогіі і Інстытута інклюзіўнай адукацыі БДПУ імя М. Танка, Баранавіцкага дзяржаўнага ўніверсітэта і Гродзенскага дзяржаўнага ўніверсітэта імя Янкі Купалы.

"Цікава, што квэст праходзіць перад Днём абаронцаў Айчыны, аднак прысвечаны тэме жанчын у псіхалогіі. Заслугі мужчын-псіхолагаў шырока вядомыя, у той час як іх калегі-жанчыны не карыстаюцца такой папулярнасцю", – пракаментавала такі выбар Галіна Фафанава.

Першая частка прайшла як семінар: кожная каманда падрыхтавала даклад па працах і дзейнасці жанчын-псіхолагаў. У ёй пераможцамі ў першай секцыі стала каманда "Інклюзіў" (Інстытут інклюзіўнай адукацыі БДПУ імя М. Танка), другой секцыі – каманда GrlPwr (Інстытут псіхалогіі БДПУ імя М. Танка).

Падчас квэста аўдыторыі факультэта ператварыліся ў пікеты з назвамі ў духу таемных супольнасцяў: "Бясконцасць Блюмы", "Пачуй мяне", "Мазгавы шторм"... Сапраўды, пасвечаныя ў псіхалогію зразумеюць, пра што гаворка: Блюма Зейгарнік, Ганна Фрэйд, Мелані Кляйн, Маргарэт Мід – жанчыны, якія зрабілі значны ўнёсак у навуку.

Крэатыўныя арганізатары Cherchez la femme праверылі веды каманд і далі магчымасць навучыцца і даведацца пра сябе шмат новага. Бо пры выкананні заданняў важныя былі не толькі веды, але і эрудыцыя, кемлівасць, уменне слухаць, артыстызм і творчыя схільнасці. А як інакш вырашыць заданне, калі псіхалагічныя тэрміны трэба паказаць карцінкай ці адгадаць па мемах з катамі? Танцавальныя здольнасці спатрэбіліся на пікеце "Танцы з Мід", дзе няпростыя тэрміны трэба было паказаць танцам, а ў "Па слядах вялікіх" – гуляць у "Твістар" за кожны няправільны адказ.

Пераможцам квэста-семінара стала каманда "Пілі гарбату з Мелані Кляйн" (ФФСН, БДУ); другое месца заняла каманда "Інклюзіў" (Інстытут інклюзіўнай адукацыі БДПУ імя М. Танка); трэцяе месца – у каманды "Сход" (факультэт журналістыкі БДУ). Каманды-пераможцы атрымалі спецыяльныя прызы ад BSU Store, ГА "Саюз жанчын БДУ", Псіхалагічнай службы БДУ, Hero Park і кніжнай інтэрнэт-крамы biblio.by.

Арганізатары паабяцалі, што мерапрыемствы падобнага фармату будуць праводзіцца студэнтамі і выкладчыкамі кафедры псіхалогіі рэгулярна і будуць прысвечаны і іншым знамянальным падзеям і выбітным псіхолагам.

Надзея МАРХЕЛЬ
Фота з сацыяльных сетак
print

Вам таксама можа спадабацца: