Урачыстае ўшанаванне лаўрэатаў ХХ Рэспубліканскага конкурсу навуковых прац студэнтаў адбылося 5 чэрвеня ў БДУ.
У святочнай атмасферы маладых таленавітых даследчыкаў павіншавалі міністр адукацыі Беларусі Сяргей Маскевіч, рэктар БДУ акадэмік Сяргей Абламейка, прадстаўнікі НАН Беларусі, Дзяржаўнага камітэта па навуцы і тэхналогіях нашай краіны і Вышэйшай атэстацыйнай камісіі Беларусі. 
Удзельнікамі цырымоніі сталі 80 студэнтаў і магістрантаў. Ім былі ўручаны дыпломы Міністэрства адукацыі Рэспублікі Беларусь з прысваеннем звання «Лаўрэат XX Рэспубліканскага конкурсу навуковых прац студэнтаў» і прэміі. Сярод намінантаў сем выхаванцаў БДУ: магістранты гістарычнага факультэта Алег Казак, факультэта радыёфізікі і камп’ютарных тэхналогій Станіслаў Канстанцінаў і Максім Махавікоў, філалагічнага факультэта Алена Ларыёнава, фізічнага факультэта Надзея Пляшко, хімічнага факультэта Алег Шахно, а таксама пяцікурснік ФРКТ Уладзімір Пілько. 
Акрамя таго, усе лаўрэаты былі рэкамендаваны для заахвочвання спецыяльным фондам Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў і ўключэння ў банк даных адоранай моладзі.
Усяго на конкурс сёлета было даслана 3817 праектаў, пры гэтым 253 былі выкананы студэнтамі БДУ. Адзначым таксама, што лаўрэатамі конкурсу прызнаны аўтары 70 прац, 985 даследаванням прысвоена першая катэгорыя, 1130 – другая і 784 – трэцяя.
БДУ невыпадкова абраны пляцоўкай для правядзення ўрачыстай цырымоніі ўшаноўвання пераможцаў. На працягу 20 гадоў вядучая ВНУ Беларусі сумесна з Міністэрствам адукацыі нашай краіны выступае арганізатарам інтэлектуальнага спаборніцтва. БДУ з’яўляецца рэспубліканскім метадычным і інфармацыйна-аналітычным цэнтрам НДРС і ў 2013–2014 годзе забяспечваў арганізацыю і правядзенне дадзенага мерапрыемства. За апошнія 10 гадоў спецыялісты БДУ выканалі вялікую працу па ўдасканаленні ўмоў конкурсу. У прыватнасці, распрацаваны спецыяльны навучальна-метадычны дапаможнік, укаранёны інтэрактыўны сайт спаборніцтва, выдадзены 9 з 10 зборнікаў навуковых артыкулаў лаўрэатаў конкурсу і аўтараў прац першай катэгорыі.
Фотарэпартаж з урачыстага ўшанавання лаўрэатаў ХХ Рэспубліканскага конкурсу навуковых прац студэнтаў глядзіце тут: http://www.bsu.by/main.aspx?guid=381835
Відэасюжэт пра ушанаванне лаўрэатаў
