Адбылася 42-я справаздачна-выбарная канферэнцыя пярвічнай прафсаюзнай арганізацыі студэнтаў БДУ.
Удзел у ёй прынялі 147 дэлегатаў, высунутых прафсаюзнымі бюро сваіх факультэтаў. У склад прэзідыума канферэнцыі ўвайшоў рэктар БДУ Сяргей Абламейка, намеснік старшыні Мінскага гарадскога аб’яднання арганізацый прафсаюзаў Аляксандр Шчаковіч, намеснік старшыні ЦК Беларускага прафсаюза работнікаў адукацыі і навукі Раман Дапіра.
Галоўным пытаннем на парадку дня было абранне старшыні пярвічнай прафсаюзнай арганізацыі студэнтаў БДУ і яго намесніка. Былі таксама пытанні пра рэвізійную камісію, пра абранне прафсаюзнага камітэта, пра абранне дэлегатаў на VIII З’езд Беларускага прафесійнага саюза работнікаў адукацыі і навукі, пра абранне дэлегатаў IV справаздачна-выбарнай канферэнцыі Мінскага гарадскога аб’яднання арганізацый прафсаюзаў.
Удзельнікаў канферэнцыі вітаў рэктар. Дэлегаты заслухалі справаздачу старшыні ППАС Ніны Радзевіч пра працу прафсаюзнага камітэта пярвічнай прафсаюзнай арганізацыі студэнтаў БДУ з 27.11.2009 па 27.11.2014, даклад старшыні рэвізійнай камісіі Дар’і Рудкоўскай, даклад пра працу прававой камісіі старшыні Кацярыны Змушкі, даклад пра працу жыллёва-бытавой камісіі старшыні Віталя Вабішчэвіча.
Напрыканцы дакладаў дэлегаты прыступілі да галасавання. Падчас абмеркавання на пост старшыні ППАС былі высунуты наступныя кандыдатуры: вядучы спецыяліст Вольга Локцева, спецыяліст Дар’я Спяцанава, спецыяліст Юлія Сергіеня. Большасцю галасоў на пост старшыні ППАС была абрана Вольга Віктараўна Локцева. Большасцю галасоў на пост намесніка старшыні ППАС была абрана Дар’я Спяцанава. Завяршылася канферэнцыя ўзнагароджаннем за актыўную працу некаторых членаў прафсаюзнага камітэта і віншаваннем новаабраных кіраўнікоў.
Пярвічная прафсаюзная арганізацыя студэнтаў БДУ самая масавая арганізацыя ў БДУ. Супрацоўнікі арганізацыі і прафсаюзны актыў студэнтаў займаюцца праблемамі сацыяльнага забеспячэння студэнтаў розных катэгорый, курыруюць пытанне засялення ў інтэрнаты, арганізацыйна-масавай і спартыўнай працай. Наш лозунг: будзь разам з намі!
Ганна ЖУРКО, старшыня прафбюро ФФСН
