СТАРШЫНЁЙ Саюза жанчын БДУ абрана прафесар філалагічнага факультэта Ірына Кaзакова. Намеснікамі прызначаны: па агульных пытаннях Ала Буціна (нам. дырэктара ФБ), па міжнародных сувязях – Ірына Алюніна (старшы выкладчык гістарычнага факультэта).
Справаздачна-выбарная канферэнцыя саюза адбылася ўлетку бягучага года. Да гэтага арганізацыю ўзначальвала дацэнт ФФСН Святлана Савіна, якая стала ганаровым старшынёй. Саюз жанчын БДУ – гэта некамерцыйная арганізацыя, створаная ў 1999 г. Яе дзейнасць накіравана на сацыяльную падтрымку, абарону правоў і інтарэсаў жанчын, якія працуюць ці навучаюцца ў БДУ. Членамі саюза з’яўляюцца каля 500 супрацоўніц і студэнтак.
ДАМОВА пра супрацоўніцтва падпісана паміж БДУ і Пекінскім універсітэтам тэхналогій і бізнесу (КНР). Гэты дакумент прадугледжвае абмен студэнтамі, магістрантамі, аспірантамі і дактарантамі для навучання, стажыроўкі і навучальнай практыкі; выкладчыкамі для чытання лекцый, абмену досведам і інфармацыяй па навучальна-метадычнай працы, навучальных планах і праграмах; арганізацыю сумесных даследаванняў, канферэнцый, а таксама іншыя формы супрацоўніцтва.
ЧАТЫРЫ міжнародныя праекты ў рамках конкурсу адукацыйнай праграмы Еўрапейскага саюза Erasmus+ «Стварэнне патэнцыялу ў сферы вышэйшай адукацыі» выйграў БДУ. Іх рэалізацыя плануецца ў партнёрстве з ВНУ ЕС на працягу 2015–2017 гг. Адзначым, большасць новых праектаў уяўляе сабой тэматычны працяг ініцыятыў па праграме Tempus, якія рэалізуюцца ў БДУ.
У наш час БДУ бярэ ўдзел у рэалізацыі 21 адукацыйнага праекта ЕС, уключаючы 4 праекты Erasmus+ «Стварэнне патэнцыялу ў сферы вышэйшай адукацыі», 9 праектаў Tempus, 6 праектаў Erasmus Mundus і 2 праекты Jean Monnet.
СПЕЦЫЯЛІЗАВАНАЯ двухдзённая канферэнцыя па прававых стандартах і сістэме дамоў і канвенцый, распрацаваных у рамках Савета Еўропы, адкрылася 15 верасня ў БДУ. У форуме прынялі ўдзел прадстаўнікі дзяржаўных органаў, акадэмічнага асяроддзя і няўрадавых арганізацый, а таксама эксперты Савета Еўропы. Былі разгледжаны наступныя канвенцыі: пра стварэнне сістэмы рэгістрацый завяшчанняў; пра абарону прыватных асоб у дачыненні да аўтаматызаванай апрацоўкі дадзеных асабістага характару; па правах чалавека і біямедыцыне; супраць гандлю чалавечымі органамі; па прадухіленні і барацьбе з гвалтам у дачыненні да жанчын і з гвалтам у сям’і; рамачная канвенцыя пра абарону нацыянальных меншасцяў і інш.
Паводле інфармацыі прэс-службы БДУ
