РЭКТАР БДУ акадэмік Сяргей Абламейка ўзнагароджаны медалём Ваенна-касмічных сіл Расійскай Федэрацыі «За выбітны ўнёсак у развіццё касманаўтыкі. Дзевяноста год з дня нараджэння А. А. Максімава». Пасведчанне падпісана камандуючым ваенна-касмічнымі сіламі Расіі генерал-палкоўнікам Уладзімірам Івановым і дырэктарам НДІ касмічных сістэм імя А. А. Максімава Міхаілам Макаравым.
* * *
НА СУСТРЭЧЫ 26 лістапада рэктара БДУ акадэміка Сяргея Абламейкі з кіраўніком Федэральнага касмічнага агенцтва (Раскосмас) Алегам Астапенкам была вызначана стратэгія двухбаковага навукова-тэхнічнага супрацоўніцтва ў касмічнай сферы. Былі абмеркаваны пытанні, якія тычацца сумесных даследаванняў і выкарыстання навуковых дасягненняў комплексу БДУ для інавацыйнага развіцця касмічнай прамысловасці дзвюх краін.
Галоўным вынікам стала дамоўленасць аб уваходжанні БДУ ў Расійскі касмічны навукова-адукацыйны інавацыйны кансорцыум. Прынята таксама рашэнне аб фарміраванні сумеснай расійска-беларускай працоўнай групы, якая будзе займацца распрацоўкай і запускам універсітэцкага спадарожніка. А неўзабаве супрацоўнікі Цэнтра аэракасмічнай адукацыі БДУ будуць прымаць і апрацоўваць даныя, атрыманыя з расійскага метэаспадарожніка «Метэор-М».
* * *
МЕМАРАНДУМ аб паразуменні падпісалі рэктар БДУ акадэмік Сяргей Абламейка і рэктар Рэгенцкага ўніверсітэта (Лондан, Вялікабрытанія) прафесар Олдвін Купер.
Рэгенцкі ўніверсітэт (Regent’s University London) – найбуйнейшая прыватная ВНУ Злучанага Каралеўства і адна з самых прэстыжных у Лондане па падрыхтоўцы спецыялістаў у галіне бізнесу, кіравання, мастацтва і гуманітарных навук. Зараз тут каля 5 тыс. студэнтаў з 80 краін.
