“Вакол свету за адну ноч”. Бібліятэку БДУ ператварылі ў мацерыкі, гарады і краіны [+cлайды]

2 мая, 2018.

"Бібліяноч–2018" прайшла 20 красавіка ў Мінску! У гэты раз звыклы фармат мерапрыемства трохі змяніўся і… Чатыры паверхі галоўнага корпуса і дзясяткі зон актывацый наведалі каля тысячы чалавек! Як гэта было, распавядзе газета "Універсітэт".

Чытальныя залы, абанементы, фае і нават цокальны паверх ператварыліся ў мацерыкі, гарады і краіны. Тэма гэтай "Бібліяночы" ў Фундаментальнай бібліятэцы – вандраванні па свеце і нават вакол свету! "БДУ – гэта шматнацыянальны калектыў, у нас вучацца студэнты з розных краін. Гэту інтэрнацыянальнасць мы вырашылі падкрэсліць у тэме гэтай Бібліяночы", – тлумачыць дырэктар Фундаментальнай бібліятэкі Уладзімір Кулажанка.

Кожны "падарожнік" мог адправіцца ў вольнае плаванне па лакацыях ці, атрымаўшы "пасажырскую мытную дэкларацыю", прайсці індывідуальны маршрут, збіраючы артэфакты, праходзячы транзітныя зоны і адказваючы на спецыяльныя пытанні.

Фае трэцяга паверха напоўніла атмасфера далёкіх краін: тут студэнты з савета зямляцтваў БДУ распавядалі пра свае краіны і культуры. У клуба кітайскай культуры "Цанцзэ" на майстар-класе можна было папрактыкавацца ў каліграфіі і вырабе аб'ёмных іерогліфаў.

У зоне "Вандраванні ў несвядомае" – даведацца пра схаваныя псіхалагічныя працэсы з дапамогай метафарычных картаў. А па шляху здзейсніць "Падарожжа ў часе" і дакрануцца да старадаўніх картаў і фаліянтаў, а таксама праверыць сваю эрудыцыю. На пляцоўцы "Жывая бібліятэка" інструктар па горным турызме Сяргей Велікан распавёў,  што такое горны паход і  як стаць яго ўдзельнікам.

"На працягу многіх гадоў мы праводзілі гэта мерапрыемства на дзень студэнта ў лістападзе, у 2016 годзе далучыліся да міжнароднай сацыякультурнай акцыі "Бібліяноч". За ўсе гады гэта самая маштабная "Бібліяноч", і не толькі па плошчах, але і наведнікаў у тры разы больш! Шмат сем'яў з дзецьмі і пажылых пар. Мы рады, што кожны знайшоў сабе занятак даспадобы", – пракаментавала Алена Садоўская, загадчыца сектара бібліятэчнага маркетынгу.

Інфармацыйны цэнтр па атамнай энергіі Мінска прапанаваў гасцям "Бібліяночы" наведаць атамную станцыю ў віртуальнай і дапоўненай рэальнасці, прайсці "атамны спрынт" і расшыфраваць атамныя рэбусы. "Сваю гульню" прадставілі актывісты з "Фотавеламарафону БДУ". Цэлую чытальную залу адвялі пад game-zone, побач – аквагрим ад творчай студыі MiM-BSU і здаровыя пачастункі ў імправізаваным трэвэел-кафэ "ALOHA!".

Аматары вострых адчуванняў адпраўляліся на экскурсіі ў кнігасховішча, у якім жыве Чорны Бібліятэкар і яго памочнікі. Студэнты Інстытута журналістыкі праводзілі квэст "Таямніцы Чорнага Бібліятэкара". Вось што распавёў яго стваральнік Максім Бічахчан: "Разам са сваёй сяброўкай Палінай Даўгіленка зрабілі квэст. "Звычайнае" кнігасховішча ператварылася ў містычнае падзямелле. Работнікі Фундаментальнай вельмі добра падрыхтавалі дэкарацыі і падчас квэсту палохалі ўдзельнікаў. А ў мяне ўсяліўся гуманіст Францыск Скарына. Сярод удзельнікаў былі як студэнты, так і навучэнцы школ і гімназій. Усім вельмі спадабаўся наш квэст, і самае галоўнае, што ў наступным годзе арганізатары "Бібліяночы" ізноў гатовыя з намі супрацоўнічаць".

З упэўненасцю можна сказаць, што адзін вечар падняў імідж і бібліятэкі, і ўніверсітэта!

Яшчэ больш фота і відэа глядзіце на старонке ў групе VK.

Надзея МАРХЕЛЬ

print

Вам таксама можа спадабацца: