Больш магчымасцяў! БДУ ўводзіць абноўленыя студэнцкія білеты [+відэа]

30 Aug, 2018.

Выгада для студэнтаў і аптымізацыя выдаткаў для ўніверсітэта –БДУ сумесна з партнёрамі распрацаваў унікальны для краіны прадукт: шматфункцыянальную інтэлектуальную ідэнтыфікацыйную картку, у якой сумешчаны студэнцкі білет і аплатны сродак.

«Разумныя» карты стануць падарункам ад кіраўніцтва ўніверсітэта ўсім першакурснікам. Найлепшыя абітурыенты атрымаюць іх ужо 1 верасня на свяце «Віват, студэнт!».

– Асабіста ў мяне ў ка­шальку вельмі шмат розных пластыкавых карт: банкаў­ская, пасведчанне, скідачныя, насіць іх усе з сабой  даволі нязручна. Мы ва ўні­версітэце ідзём па шляху  лічбавізацыі, актыўна ўкараняем новыя тэхналогіі, і адным з крокаў стаў сумесны  з «Белінвестбанкам» выпуск карты студэнта, у якой сумешчаны функцыянал сту­дэнцкага білета і банкаўскай карты, – распавядае Віктар КОЧЫН, начальнік Цэнтра інфармацыйных тэхналогій БДУ. – Гэта ўнікальная для нашай краіны распрацоўка, навукова-даследчыя і вопытна-канструктарскія працы вяліся на працягу 2016–2017 гадоў. У выніку мы распрацавалі і ўкаранілі тэхналогіі, якія дазваляюць на адным чыпе забяспечыць інтэграцыю банкаўскага і нашага ўніверсітэцкага функцыяналу. Таксама супрацоўнікамі ЦІТ было распрацавана сур’ёзнае праграмнае забеспячэнне па аўта­матызацыі перадачы дадзеных банку. Акрамя   таго, што адна карта, якая выконвае адразу некалькі функцый, зручная для карыстальнікаў, яна яшчэ і выгадная для ўніверсітэта. Справа ў тым, што выдача студэнцкіх білетаў – вельмі фінансава выдатковая, а цяпер усе працэсы па вырабе абноўленых карт выконвае банк, што дазваляе нам значна зэканоміць.

Новы студэнцкі білет рэалізаваны на базе бескантактавай банкаўскай аплатнай карткі MasterCard. Звычайна такія карты выпуска­юцца тэрмінам на тры гады, аднак спецыяльна для пра­екта банк працягнуў тэрмін дзеяння да чатырох гадоў –  на ўвесь перыяд навучання студэнта ў бакалаўрыяце, каб не было неабходнасці перавыпускаць карту на працягу вучобы. Таксама ў новай студэнцкай карце выкарыстоўваецца чып новага пакалення, што забяспечыць высокую абарону персанальных дадзеных і практычна выключыць маг­чымасць падробкі.

Карта студэнта – гэта перш за ўсё дакумент ідэнтыфікацыі. Ён дазволіць прайсці ў карпусы і інтэрнаты ўніверсітэта, для гэтага картку неабходна прыкласці да турнікета ці прад’явіць  супрацоўніку службы аховы   і бяспекі, будзе выступаць у якасці чытацкага білета ў бібліятэцы БДУ, а ўказаны на ім лагін (для ўсіх студэнтаў пры залічэнні ствараюць уліковыя запісы) можна выкарыстоўваць для аўта­рызацыі пры карыстанні інтэрнэтам на тэрыторыі ўні­версітэта.

– У далейшым мы, вядома, будзем імкнуцца разві­ваць функцыянал дадзеных студэнцкіх білетаў, – адзначае Віктар Паўлавіч. – У прыватнасці, плануем папрацаваць над ільготным харчаваннем, калі студэнты змогуць атрымліваць скідкі  ў сталовых нашага ўніверсітэта. Таксама перамовы пра скідкі па карце студэнта вядзём і з рознымі аргані­зацыямі.

Начальнік ЦІТ не хавае: ёсць спадзяванне, што навучэнцы да абноўленых студэнцкіх білетаў будуць ставіцца сур’ёзней, не забываць і не губляць, бо зараз гэта яшчэ і аплатны сродак. Адзначым, што новыя карты атрымаюць усе студэнты дзённай формы навучання,  а значыць, зараз уласны банкаўскі рахунак будзе і ў платнікаў. Студэнцкім білетам, напрыклад, можна бу­дзе заплаціць за вучобу праз інтэрнэт-банкінг, перавесці грошы з карты на карту, што асабліва зручна, калі студэнту дапамагаюць бацькі.

У выпадку, калі студэнт адлічаны ці скончыў наву­чанне, то функцыянал, які адносіцца да розных сістэм універсітэта, ЦІТ проста дэактывуе, а вось карыстац­-ца карткай у якасці аплатнага сродку можна будзе працягваць аж да канца тэрміну яе дзеяння. У першы наву­чальны тыдзень студэнцкія білеты новага ўзору атры­маюць усе першакурснікі дзённай формы навучання. Пытанне пра тое, ці замя­няць студэнцкія білеты на шматфункцыянальныя карты студэнтам іншых курсаў, цяпер абмяркоўваецца. Адна з працоўных прапаноў – вырабляць замену па жаданні студэнта, аднак трэба ра­зумець, што гэта будзе платная паслуга.

Дарэчы
БДУ задае тэндэнцыі: у 2003 г. студэнты нашага ўніверсітэта першымі змянілі папяровыя дакументы на смарт-карты. А ў 2011 г. Міністэрства  адукацыі зацвердзіла студэнцкі білет у выгля­дзе электроннай карты ў якасці адзінага ўзору, які паступова ўвялі ўсе УВА краіны.

Валерыя БАНДАРЧЫК
Фота Таццяны Багамазавай
Відэа:

print

Вам таксама можа спадабацца: