Выбух эмоцый. Магутная энергетыка! BSU Dance Festival падарыў незабыўныя ўражанні [+cлайды і відэа]

13 Dec, 2018.

Адкрыты моладзевы танцавальны фэст BSU Dance Festival запаліў сэрцы і падарыў незабыўныя эмоцыі ўжо другі год запар! Як і ў першы раз, фінал фэсту прайшоў у клубе RE:PUBLIC, які па традыцыі з'яўляецца пляцоўкай для жывых концэртоў, кінапаказаў, вечарынак "у духу новага часу", бязмежных эмоцый і гучных падзей. Арганізатарамі падзеі выступіла ўпраўленне па справах культуры Беларускага дзяржаўнага ўніверсітэта, творчы саюз Беларускага дзяржаўнага ўніверсітэта і адміністрацыя Маскоўскага раёна г. Мінска.

Фэст праходзіў у рамках акцыі "Творчая моладзь супраць СНІДу" і Сусветнага дня прафілактыкі СНІДу ў Рэспубліцы Беларусь. Дэвіз "Ведай свой статус" паставіў мэтай прафілактыку распаўсюджання СНІДу ў моладзевым асяроддзі, рэалізацыю творчага патэнцыялу маладых танцораў, фарміраванне іх актыўнай жыццёвай пазіцыі і здаровага ладу жыцця. Важнымі складнікамі таксама сталі пашырэнне кантактаў паміж прафесійнымі танцорамі і аматарамі, стварэнне добразычлівай атмасферы паміж танцавальнымі калектывамі розных жанравых скіраванасцяў.

Мяне ўжо другі раз запрашаюць на гэты фэст, і я вельмі рада, што такія мерапрыемствы праходзяць, – кажа Алена Гурман, адзін з членаў журы фэсту, псіхолаг аддзела прафілактыкі СНІДу Рэспубліканскага цэнтра гігіены, эпідэміялогіі і грамадскага здароўя. – Гэта падтрымлівае першасную прафілактыку на патрэбным узроўні. Хай танцамі, але яны паказваюць зацікаўленасць маладых людзей у гэтай тэме.

Фэст адкрылі адборачныя туры, якія прайшлі на сцэне Ліцэя БДУ. 20 і 21 лістапада яны сабралі як танцавальныя калектывы, так і сольных выканаўцаў, ахвотнікаў паказаць сябе ў танцавальным майстэрстве. З іх толькі 10 калектываў і 8 салістаў атрымалі магчымасць выступіць у фінале 29 лістапада і падужацца за прыз гледачовых сімпатый і прызавыя месцы. Па выніках адборачных тураў фіналістамі сярод сольных выканаўцаў сталі Ганна Вайтова (МДЭІ імя А. Д. Сахарава БДУ), Кацярына Баннікава (хімфак БДУ), Алег Кісялёў (мехмат БДУ), Вераніка Сакалоўская (ФРКТ БДУ), Паліна Саук (ФСК БДУ), Дыяна Стрынатовіч (МДЭІ імя А. Д. Сахарава БДУ), а таксама Алена Даманская (БДМУ) і Марыя Апанасовіч (БНТУ). Фіналістамі сярод танцавальных калектываў сталі школа-студыя танцаў Step UP (з удзелам эканамфака БДУ), танцавальны дуэт LEGAC (ФФСН БДУ), танцавальнае трыа Passion (юрфак БДУ) і калектыў Girl Power (журфак БДУ), а таксама калектывы БДПУ імя М. Танка, БДАТУ, БНТУ, БДМУ і Акадэміі кіравання пры Прэзідэнце РБ.

Гран-пры сярод танцавальных калектываў, 3-е месца сярод танцавальных калектываў па меркаванні журы, а таксама перамогу ў намінацыі "Найлепшая пастановачная праца фэсту" ўзяў танцавальны праект "Арт - Юніці" БДПУ імя М. Танка, які існуе ўжо дзясяты год. На фэсце ён выступіў другі раз, і другі раз гледачы прызналі яго найлепшым:

Мы прыйшлі не леташнім складам, сёння выступала шмат пачаткоўцаў, якія прайшлі жорсткі адбор, – жартуе Кацярына Боршч, якая займаецца ў калектыве ўжо другі год. – Амаль усе ўдзельнікі нашай каманды раней займаліся эстраднымі і народнымі танцамі, але цяпер мы танчым галоўным чынам у "стрытавых" кірунках.

З сольных выканаўцаў гледачы аддалі свае сімпатыі студэнтцы МДЭІ імя А. Д. Сахарава Беларускага дзяржаўнага ўніверсітэта Ганне Вайтовай:

Выбух эмоцый. Незабыўныя ўражанні. Запаленыя вочы гледачоў. Магутная энергетыка сыходзіць ад кожнага ўдзельніка. Дзякуй BSU Dance Festival за гэта! А вядучыя... Яны так здолелі падтрымаць і дадаць упэўненасці! Вы самыя найлепшыя і самыя шчырыя! Гучныя апладысменты і выбуховыя крыкі гледачоў, якія яны падарылі ў той вечар, іх падтрымка даюць матывацыю для далейшага росту і самаўдасканалення ў такім выдатным відзе мастацтва, як танец. Няма нічога больш каштоўнага і важнага для чалавека на сцэне, чым сімпатыя, ухваленне і прызнанне гледачоў.

Таксама пераможцамі фэсту сталі:

- Школа-студыя танцаў Step Up (з удзелам студэнтаў эканамфака БДУ) – 2-е месца сярод танцавальных калектываў;

- Стрынатовіч Дыяна (МДЭІ імя А. Д. Сахарава БДУ) – 2-е месца сярод сольных выканаўцаў;

- Сакалоўская Вераніка (ФРКТ БДУ) – 3-е месца сярод сольных выканаўцаў;

- Студыя ArtPlatforma (Інстытут бізнесу БДУ, БДЭУ, БНТУ, СШ № 151 г. Мінска) – "Найлепшая танцавальная група".

Танцавальны фэст у другі раз запомніўся яркімі і цудоўнымі нумарамі, таленавітымі ўдзельнікамі і магутнай энергіяй. Усе гледачы, танцоры і арганізатары з нецярпеннем будуць чакаць новага фэсту, які пройдзе ў наступным годзе.

А пакуль вы чакаеце наступнага фэсту, упраўленне па справах культуры БДУ запрашае вас і на іншыя свае мерапрыемствы, сярод якіх вы абавязкова знойдзеце сабе штосьці даспадобы. Больш інфармацыі вы знойдзеце ў групе ўпраўлення “Укантакце” "Культурныя людзі БДУ" або на афіцыйным сайце ўпраўлення.

Алеся САМСАНОВІЧ і Соф'я ЦЫКУНОВА
Фота Васіля Кузьмічкіна
Яшчэ больш фота у лічбавым фотаархіве БДУ
Відэа Таццяны Багамазавай глядзіце тут
 
print

Вам таксама можа спадабацца: