Да старту гатовыя! 1700 студэнтаў БДУ – валанцёры II Еўрапейскіх гульняў [+cлайды]

25 Mar, 2019.

Да галоўнай падзеі 2019 года – II Еўрапейскіх гульняў – менш за 100 дзён. Беларускі дзяржаўны ўніверсітэт не толькі іх афіцыйны партнёр, але і адзін з універсітэтаў, чыіх студэнтаў будзе больш за ўсё ў якасці валанцёраў: з 8000 добраахвотнікаў, якія будуць задзейнічаны ў Гульнях, 1700 – студэнты БДУ. Як праводзіцца праца з валанцёрамі, якія факультэты самыя актыўныя і што атрымлівае студэнт, распавёў Рыгор ПАСРЭДНІК, намеснік дырэктара па выхаваўчай рабоце студэнцкага гарадка і кіраўнік цэнтра падрыхтоўкі валанцёраў II Еўрапейскіх гульняў у БДУ.

Гульні і БДУ
«II Еўрапейскія гульні – важнае іміджавае мерапрыемства. Паляпшаецца інвестыцыйны клімат, раскры­ваецца турыстычны патэнцыял Беларусі. Для БДУ вялікі гонар быць партнёрам Гульняў і прадстаўляць краіну на гэтым буйным мерапрыемстве. Маштаб па колькасці відаў спорту і колькасці ўдзельнікаў параўнальны з Зімовымі Алімпійскімі гульнямі ў карэйскім Пхёнчхане 2018 года», – каментуе Рыгор.
Фонд «Дырэкцыя II Еўрапейскіх гульняў 2019 года» і Беларускі дзяржаўны ўніверсітэт улетку мінулага года падпісалі дамову пра супрацоўніцтва, якое прадугледжвае партнёрскія адносіны, накіраваныя на захаванне і прымнажэнне аду­кацыйнай і гуманітарнай спадчы­ны, прасоўванне будучага мульты­спартыўнага форуму і распаўсюджанне інфармацыі пра яго ў спартыўных арганізацыях Рэспублікі Беларусь і ўсяго свету.
Пытаннямі валанцёрства ў БДУ займаецца цэнтр падрыхтоўкі валанцёраў II Еўрапейскіх гульняў БДУ. Галоўная яго задача – арга­нізаваць удзел валанцёраў з ліку студэнтаў універсітэта ў Гульнях у чэрвені гэтага года, а таксама суправаджаць студэнтаў на ўсім ­шляху: з моманту іх рэгістрацыі ў сістэме на сайце minsk2019.by, на ўсіх этапах навучання, да завяр­шэння спаборніцтваў. «У цэнтр уваходзяць намеснікі дэканаў, лідары моладзевых арганізацый, прадстаўнікі ўпраўлення выхаваўчай ­работы з моладдзю, студгарадка», – тлумачыць Рыгор Пасрэднік. Куры­руе падрыхтоўку да Гульняў пра­рэктар па выхаваўчай рабоце і сацыяльных пытаннях Іван Янушэвіч.
У студэнтаў ёсць пытанні пра ­валанцёрства, на самыя частыя з ­іх адказаў кіраўнік цэнтра Рыгор Пасрэднік.
Як становяцца валанцёрамі?
– Напачатку неабходна зарэгістравацца на сайце minsk2019.by, завесці там асабісты кабінет (у далейшым асабісты кабінет стане для валанцёраў галоўным сродкам зносін падчас Гульняў – там будуць размяшчацца навучальныя матэрыялы, прызначацца пазіцыі ­
і працоўныя змены, асабісты кабінет з моманту рэгістрацыі трэба правяраць штодня, каб не прапусціць важную інфармацыю), прайсці сумоўе на англійскай мове, выканаць тэставыя заданні, прайсці агульныя, функцыяналь­ныя і аб’ектавыя трэнінгі. Нягле­дзячы на няпросты шлях да валанцёрства, на дадзены момант звыш 1700 студэнтаў выявілі жаданне стаць валанцёрамі. Першапачаткова заявак было больш, але частка людзей, чый узровень замежнай мовы, узровень асабістай матывацыі быў недастатковы для ­ўдзелу ў Гульнях, адсеяліся на раннім этапе. Выдатныя веды англійскай мовы (афіцыйнай мовы міжнароднага турніру), веды іншых еўрапейскіх моў, наяўнасць добраахвотніцкага досведу павышаюць рэйтынг будучага валанцёра, што ў далейшым адаб’ецца на прапанаваных пазіцыях і функцыянальных кірунках.

Ці абавязкова ведаць англійскую мову?
– Веданне англійскай мовы вітаецца. На большасць ключавых пазі­цый, дзе прадугледжваецца ўзаемадзеянне з замежнымі грама­дзянамі (афіцыйнымі асобамі дэлегацый, спартсменамі і г. д.), будуць адбірацца валанцёры, якія валодаюць замежнай мовай на добрым узроўні. У той жа час ёсць і такія кірункі добраахвотніцкай працы, дзе веды замежнай мовы на высокім узроўні не патрабуюцца (напрыклад, «сэрвісы для гледачоў» і інш.)

Што такое функцыянальныя кірункі і якія яны бываюць?
– Функцыянальны кірунак – гэта спосаб выявіць сябе ў рамках Гульняў. Функцыянальны кірунак вы­- з­начае спіс задач, якія студэнты будуць выконваць у якасці валанцёраў. Акрэдытацыя, лінгвістычныя паслугі, камунікацыі, допінг-кантроль, узаемадзеянне са СМІ, асіс­тэнты НАК, кіраванне аб’ектамі, транспарт, пратакол і інш. Валанцёры могуць абраць адзін ці некалькі кірункаў з 20. Канчатковая пазіцыя ім будзе прызначана пасля праходжання асноўных тэстаў.

Навучанне валанцёраў
Для валанцёраў праводзяцца спецыяльныя падрыхтоўча-навучаль­ныя трэнінгі. Гэта камандаўтва­ральныя гульні, функцыянальныя трэнінгі па спецыялізацыях і аб’ектавыя, яны пачнуцца пасля размеркавання валанцёраў па пазіцыях. На аб’ектавых трэнінгах валанцёры, якія прымацаваны да якога-небудзь спартыўнага аб’­екта, напрыклад, да «Мінск-Арэны», вывучаюць яго ўздоўж і папярок, каб выдатна арыентавацца падчас мерапрыемстваў. Серыя агульных трэнінгаў прайшла на базе ўні­версітэта ў лютым для студэнтаў БДУ і іншых ВНУ Мінска.

Чаму студэнты становяцца валанцёрамі?
Перш за ўсё гэта ўнутраная матывацыя, жаданне далучыцца да выдатнай маштабнай падзеі між­народнага ўзроўню, завесці новыя знаёмствы, атрымаць каласальны арганізацыйны досвед, выдатную моўную і камунікатыўную практыку (што асабліва актуальна для студэнтаў факультэта міжнарод­-ных адносін, Інстытута бізнесу, ­факультэта сацыякультурных каму­нікацый – ад студэнтаў гэтых фа­культэтаў і паступіла больш за ўсё заявак). Акрэдытацыя ў якасці валанцёра дазваляе падчас гульняў карыстацца грамадскім транспартам бясплатна, будзе арганізавана бясплатнае харчаванне падчас змен, прапанаваны набор спецы­яльнай экіпіроўкі: вятроўка, шорты, пола, куртка, красоўкі. Акрамя гэтага ўніверсітэт, ідучы насустрач студэнтам, якія выявілі жаданне стаць валанцёрамі, дазволіць здаваць сесіі і праходзіць практыкі па індывідуальным графіку.
Валанцёрства – гэта яшчэ і велізарны прафесійны досвед, які дапаможа пры працаўладкаванні. ­Выпускнікі БДУ, якія былі валанцёрамі на Чэмпіянаце свету па хакеі ў 2014 г., сёння супрацоўнікі фонду «Дырэкцыя ІІ Еўрапейскіх гульняў 2019 г.». Валанцёрства – гэ­та таксама магчымасць падарож­нічаць. Падчас падрыхтоўкі валанцёры ўдзельнічаюць у так званых тэставых мерапрыемствах. Такімі былі, напрыклад, адкрыты чэмпіянат Еўропы па біятлоне, міжнародны турнір па самба на прызы Прэзідэнта Рэспублікі Беларусь. Акрамя таго, улетку мінулага года некаторыя нашы студэнты бралі ўдзел у якасці валанцёраў у Чэмпіянаце свету па футболе. «Мэта заключалася ў тым, каб валанцёры атрымалі досвед на такім маштабным мерапрыемстве, а праз год змаглі ім падзяліцца і плённа працаваць на II Еўрапейскіх гульнях, – тлумачыць Багдан Пятрашка, студэнт 4 курса ФМА. – Мне прапанавалі 3 гарады: Маскву, Казань, Санкт-Пецярбург. Нядоўга думаючы, я абраў Санкт-Пецярбург, бо ­ў Маскве я быў, а пра Пецярбург марыў. Дырэкцыя II Еўрапейскіх ­гульняў забяспечвала пражыванне, харчаванне, праезд, таксама прадстаўнікі дырэкцыі прыязджалі да нас, глядзелі, як працуюць валанцёры, ці карысны гэта досвед. Я ўжо чакаю ўсіх на II Еўрапейскія ­гульні, думаю, куды звадзіць, што паказаць у Мінску».

 «Bright Fest BSU. Па дарозе да ІІ Еўрапейскіх гульняў!»
11 мая БДУ сумесна з фондам «Дырэкцыя ІІ Еўрапейскіх гульняў 2019 года» арганізуе фэст актыўнага ладу жыцця і творчасці «Bright Fest BSU. Па дарозе да ІІ Еўрапейскіх гульняў!», які пройдзе на ста­лічным стадыёне «Дынама». На галоўнай сцэне фэсту выступяць гурты «J:МОРС», «Ляпіс-98». Пазней абвесцяць яшчэ двух зорных хэдлайнераў. На дзвюх сцэнах пройдуць выступленні творчых калектываў і салістаў БДУ, моладзевых калектываў, кавер-бэндаў і артыстаў эстра­­ды Беларусі. Студэнцкі мола­дзевы фэст прысвечаны падрых­тоўцы да Гульняў, валанцёрству, ­актыўнаму ладу жыцця, спорту і творчасці.
На фэсце будзе арганізавана праца інтэрактыўных пляцовак ­моладзевых арганізацый універсітэта, прадстаўлены моладзевыя субкультуры, творчыя моладзевыя праекты, арганізаваны спартыўныя і творчыя змаганні, песенныя і танцавальныя батлы, зоны актыўнага адпачынку і рэлаксацыі, конкурсы, фотазоны і шматлікае іншае. Запланаваны сустрэчы з беларускімі зоркамі спорту.
Удзел у фэсце для валанцёраў Гульняў бясплатны, для студэнтаў-неваланцёраў будзе зніжка.

Надзея МАРХЕЛЬ

 

print

Вам таксама можа спадабацца: