Другая міжнародная канферэнцыя «Еўрапейскі саюз і Рэспубліка Беларусь: перспектывы ўзаемадзеяння», прайшла 2 чэрвеня пад эгідай Цэнтра даследаванняў Жана Манэ БДУ.
Дзяніс Сідарэнка
Першая канферэнцыя прайшла ў 2014 годзе. Сёлета мерапрыемства адкрылі рэктар акадэмік Сяргей Абламейка, кіраўнік аддзела палітыкі, прэсы і інфармацыі Прадстаўніцтва Еўрапейскага саюза ў Беларусі Джым Казенс і кіраўнік упраўлення агульнаеўрапейскага ўзаемадзеяння Міністэрства замежных спраў нашай краiны Дзяніс Сідарэнка. Апошні, у прыватнасці, адзначыў, што з-за пагрозы тэрарызму, наркатрафіку, гандлю людзьмі Беларусь мае патрэбу ў шчыльным супрацоўніцтве з усімі суседзямі, у тым ліку і з Еўрапейскім саюзам. Але важна разумець безгрунтоўнасць падыходу да нашай краіны «або вы з намі, або супраць нас». «Мы хочам прайсці гэты шлях пабудовы адносін з двума вялікімі суседзямі, знайшоўшы такі баланс узаемадзеяння, які стане прыкладам для іншых краін рэгіёна, пакажа магчымасць паспяховага пазіцыянавання», – адзначыў дыпламат.
Уладзімір Астапенка
«Папярэдняя канферэнцыя, – распавёў нам кіраўнік Цэнтра даследаванняў Жана Манэ БДУ Уладзімір Астапенка, – праводзілася ў зусім іншых палітычных умовах. Тады пра актыўныя дзеянні з Еўрапейскім саюзам мы нават не размаўлялі. У лютым былі знятыя санкцыі, і пачалася нармалізацыя дыялогу. Таму канферэнцыя асабліва дарэчная, каб праглядзець усе аспекты ўзаемаадносін з Еўрапейскім саюзам і зрабіць практычныя рэкамендацыі. Думаю, што гэта не апошняя канферэнцыя, бо акадэмічная цікавасць да гэтай тэмы не згасае».
Эксперты ў галіне еўрапейскай інтэграцыі з Беларусі, Казахстана, Расіі, а таксама Вялікабрытаніі, Бельгіі і Польшчы абмеркавалі пытанні знешняй палітыкі, сацыяльна-эканамічнага развіцця, прававога рэгулявання, развіцця супрацоўніцтва ў гуманітарнай сферы.
На канферэнцыю былі запрошаныя прадстаўнікі беларускіх і замежных ВНУ. Ад БДУ на пленарным пасяджэнні выступіў загадчык кафедры канстытуцыйнага права юрыдычнага факультэта Рыгор Васілевіч.
Стывен Блокманс
Ён распавёў пра гісторыю і сучаснасць Беларусі як сацыяльнай дзяржавы і параўнаў асноўны закон нашай краіны з iрландскай i iспанскай канстытуцыямi. Прадставіць вопыт узаемаадносін Казахстана і ЕС з Астаны прыляцела дырэктар Інстытута прававых даследаванняў Казахскага дзяржаўнага юрыдычнага ўніверсітэта Сара Ідрышава. Адлігу паміж Еўрапейскім саюзам і Беларуссю канстатаваў прафесар Стывен Блокманс з Цэнтра даследаванняў еўрапейскай палітыкі (Бельгія). Скончыў шэраг пленарных дакладаў суддзя Суда ЕАЭС Дзяніс Колас. Дыялог працягнулі на ФМА ў межах чатырох секцый: «Знешняя палітыка ЕС», «Сацыяльна-эканамічная палітыка ЕС», «Прававое рэгуляванне ў ЕС», «Супрацоўніцтва ў гуманітарнай сферы ў ЕС». Будзе апублікаваны зборнік тэзісаў.
Канферэнцыя ладзіцца па праекце імя Жана Манэ, якi быў галоўным iдэолагам еўрапейская iнтэграцыi. З 2001 г. праект распаўсюдзіўся па ўсім свеце і зараз ахапіў 68 краін на пяці кантынентах. Яго мэта – падтрымаць вывучэнне еўрапейскага права і еўрапейскай інтэграцыі праз вылучэнне грантаў даследчыкам і выкладчыкам ВНУ.
Віталь АРЭШКА
