Першы крок да дыстанцыйнага навучання. Мехмат БДУ віртуалізуе школьны курс матэматыкі

18 Apr, 2018.

Механіка-матэматычны факультэт БДУ і аддзел адукацыі спорту і турызму Мінскага райвыканкама рэалізуюць сумесны адукацыйны праект «Дыстанцыйная падтрымка школьнага курса матэматыкі як рэсурс павышэння якасці матэматычнай адукацыі навучэнцаў».

На працягу года даведацца, як вырашаць задачы ў віртуальнай прасторы, змаглі вучні 7–11 класаў з 22 школ Мінскага раёна.

 

– Наша дыстанцыйная школа накіравана на тое, каб павялічыць якасць матэматычнай адукацыі ў краіне. Школьныя падручнікі, на жаль, пішуцца не так часта, а іх змест не заўсёды зразумелы вучням. Нашы ж навучальныя матэ­рыялы, якія мы распрацоўваем у дадатак да школьнага курса, но­сяць інавацыйны характар. Гэты курс матывуе развівацца, павышае ўзровень ведаў, – адзначае куратар праекта, начальнік аддзела вэб-праектаў і стратэгічных камунікацый медыяцэнтра БДУ Юрый Пазняк. – Акрамя таго, падобнае ўкараненне ў адукацыйны працэс дыстанцыйных тэхналогій дазваляе вучню самастойна прапрацаваць матэрыял і нагнаць  прапушчанае, калі ён з нейкіх прычын прапусціў заняткі ў школе. Тэарэтычныя матэрыялы ў курсах нашага праекта цалкам пакрыва­юць школьную праграму, а зама­цаваць веды можна, прарашаўшы задачы, да якіх прапануецца пад­рабязнае тлумачэнне.

Праект уражвае маштабнасцю: у распрацоўцы рэсурсу прынялі  ўдзел каля 400 чалавек. У ролі стваральнікаў-метадыстаў высту­пілі выкладчыкі мехмата Таццяна Рабцэвіч і Таццяна Пятрушына, якія збіралі і кампілявалі навучальны матэрыял; кансультаваў на ўсіх этапах распрацоўкі і рэдагаваў матэрыял прафесар доктар фізіка-матэматычных навук Уладзімір Амелькін. Працуе школа і дзякуючы студэнтам мехмата: яны адмініструюць праект. Свой унёсак у развіццё рэсурсу зрабілі школьныя настаўнікі, якія, перш чым адправіць на яго займацца вучняў, самі вырашалі заданні, знаёміліся з   матэрыялам і давалі распрацоў­ш­чыкам каштоўныя рэкамендацыі  па выпраўленні памылак і паляп­шэнні курсаў.

– Нам вельмі важнае мерка­ванне настаўнікаў, якія непасрэд­-на працуюць са школьнікамі, таму што адна справа пры распрацоўцы навучальных матэрыялаў уяўляць нейкага тэарэтычнага вучня, і зусім іншая – атрымліваць зваротную  су­вязь ад педагогаў-практыкаў, як вучань успрымае і разумее гэты матэрыял, – падкрэслівае старшы выкладчык кафедры агульнай матэматыкі і інфарматыкі мехмата Тац­цяна Рабцэвіч.

Дыстанцыйная школа, як дзе­ляц­ца настаўнікі, дапамагае развіваць здольнасці адораных наву­чэнцаў, якім яны не заўсёды могуць надаць належную ўвагу на ўроку ў класе, дзе не ўсе паспяхова засвойваюць праграму, а ў працы з астатнімі – дапамагае, дзякуючы тэхналогіям, зацікавіць матэматыкай.

– Вялікую цікавасць у вучняў выклікае добрая візуалізацыя геа­метрычнага матэрыялу, з якім  можна пагуляць. Бо інтэрактыўныя малюнкі можна, як той казаў, «пакруціць», напрыклад, раскласці вугал, павялічыць яго ці паменшыць, – дзеліцца ўражаннямі настаўнік матэматыкі ДУА «Міханавіцкая ся­рэдняя школа» Людміла Рэц.

У планах у распрацоўшчыкаў дыстанцыйнай школы ўводзіць і іншыя элементы гейміфікацыі, здольныя ўцягнуць школьнікаў у навучальны працэс, – тэсты, крыжаванкі, рэйтынгавая шкала. А ў новым навучальным годзе паглыбляць свае веды ў матэматыцы з дапамогай віртуальных тэхналогій зможа яшчэ больш вучняў – на рэсурсе з’явяцца курсы для 5 і 6 класаў.

Валерыя БАНДАРЧЫК

print

Вам таксама можа спадабацца: