Рэктар БДУ Андрэй Кароль наведаў ФФСН, Інстытут журналістыкі, біялагічны і юрыдычны факультэты, дзе абмеркаваў з кіраўніцтвам і загадчыкамі кафедраў стан і перспектывы падраздзяленняў.
12 кастрычніка на факультэце філасофіі і сацыяльных навук адбылася сустрэча з кіраўніцтвам факультэта і кафедрамі, а таксама з членамі савета і прафесарска-выкладчыцкім складам ФФСН.
«Наведванне структурнага падраздзялення абумоўлена некалькімі мэтамі. Адна з іх дыягнастычная, уключае магчымасць блізкага знаёмства з супрацоўнікамі, другая – выпрацоўка сумесных кіраўнічых рашэнняў і прапаноў па выяўленых праблемах», – адзначыў рэктар БДУ Андрэй Кароль.
Формай сустрэчы быў заяўлены дыялог, закліканы знайсці новыя механізмы ў кіраванні ВНУ і рашэнні агучаных у прагнозна-аналітычнай інфармацыі праблем.
Рэктар падкрэсліў: «Дыялог не ёсць апытальна-зваротная дзейнасць. Хацелася б канструктыўнай гутаркі, абмеркавання прадметных пытанняў, магчымасці пачуць кожнага загадчыка і самога дэкана. Праўда знаходзіцца не ў галаве аднаго чалавека, а падчас іх сумеснага абмеркавання і ўзаемадзеяння».
Асноўны блок закранутых пытанняў на ФФСН тычыўся фундаментальных праблем развіцця факультэта праз прызму філасофскіх і сацыялагічных ведаў, матывацыі выкладчыкаў да навуковай дзейнасці, механізмаў рэйтынгавання і павышэння заработнай платы, якасці дыстанцыйных формаў падрыхтоўкі спецыялістаў.
«Павелічэнне зарплаты залежыць не толькі ад рашэння кіраўніцтва ВНУ. Павінны быць унутраныя рэсурсы самога факультэта і яго структур. Сёння загадчык кафедры не толькі выкладчык, але і менеджар, які будуе сваю працу і на прыцягненні замоўцаў кадраў, паслуг, абітурыентаў. Гэта цягне за сабой пэўныя дадатковыя фінансавыя крыніцы. Хуткім часам у БДУ будзе ўкаранёная рэйтынгавая сістэма аплаты працы выкладчыкаў, дзе будзе выразная градацыя выплат, у залежнасці ад асабістых прафесійных паказчыкаў навучальнай і навуковай дзейнасці кожнага», – растлумачыў Андрэй Кароль.
Закрануты былі тэмы, якія тычацца дынамікі абарон дысертацый, адкрыцця новых спецыяльнасцяў, магістарскіх праграм на англійскай мове, механізмаў набору студэнтаў, сеткавых формаў інтэграцый спецыяльнасцяў, спрашчэння працэдуры ўзгаднення дакументацыі ўнутры ўніверсітэта і за яго межамі, укаранення новых методык выкладання, манетызацыі адукацыйных паслуг. Шэрагу агульнаўніверсітэцкіх структур былі дадзены даручэнні ў месячны тэрмін прадставіць праекты інтэграцыі спецыяльнасцяў, сеткавых формаў магістратуры з іншымі ВНУ, спрашчэння працэдуры ўзаемаадносін УМА з РІВШ.
Адмысловай тэмай стала праблема далейшага развіцця БДУ, вызначэння яго стратэгічнай місіі і рэальных паказчыкаў яе рэалізацыі. Рэктар заклікаў усіх хуткім часам прыняць актыўны ўдзел у абмеркаванні гэтага пытання і ўнесці свае прапановы.
Рэктар Андрэй Кароль назваў гэту сустрэчу «эмацыйна цёплай, інтэлігентнай і змястоўнай».
«Пэўныя праблемы ўжо ўзяты на кантроль, вызначаныя лакальныя задачы. Удзячны ўсім за тое, што выйшлі на ўзровень унутрыўніверсітэцкай інтэграцыі зместу навучання. Пэўныя прапановы разгледзім у працоўным парадку», – рэзюмаваў Андрэй Кароль. З пажаданняў рэктар адзначыў запатрабаванасць і неабходнасць больш цеснага ўзаемадзеяння выкладчыкаў і студэнтаў. У выступленнях калегаў дадзеная тэма была па-за зонай увагі. «Пытанне выхавання, патрыятызму студэнта з’яўляецца інтэгральнай прыладай нашай агульнай універсітэцкай справы», – адзначыў кіраўнік БДУ.
20 кастрычніка рэктар БДУ Андрэй Кароль наведаў Інстытут журналістыкі. На сустрэчы з кіраўніцтвам факультэта і кафедраў, членамі савета і прафесарска-выкладчыцкім складам рэктару была прадстаўлена прагнозна-аналітычная запіска ад кожнага загадчыка кафедры і дырэктара Інстытута журналістыкі, а таксама актуальная выніковая інфармацыя пра дзейнасць інстытута і яго кафедраў, прадстаўленая ключавымі ўпраўленнямі. Цэнтрам абмеркавання і дыскусіі сталі актуальныя праблемы і пытанні, якія тычацца сучаснай падрыхтоўкі журналіста. У прыватнасці, была падкрэслена неабходнасць павышэння якасці навучання студэнта, патрыятычнага выхавання моладзі.
Рэктар падкрэсліў: «Гэта асабліва важна інстытуту, бо ён выпускае будучых журналістаў, вядучых ТБ-каналаў, радыё. Да гэтых прафесій заўсёды будзе пільная ўвага і адмысловы попыт». Было адзначана, што наспела неабходнасць перагляду прафесійных кампетэнцый журналіста, змены ў змесце навучальных праграм падрыхтоўкі з улікам арыентацыі на сеткавыя формы інтэграцый спецыяльнасцяў.
Асаблівая ўвага кіраўніцтва БДУ была накіравана на актывізацыю дзейнасці кафедраў па працы з магістрантамі і аспірантамі, удасканаленне сістэмы ўзаемадзеяння з замоўцамі кадраў, манетызацыю адукацыйных паслуг, павышэнне заработнай платы. Асвятляліся пытанні развіцця спецыяльнасцяў, пазбягання ўнутранага дублявання, развіцця экспарту паслуг і абарон дысертацый. Для рашэння гэтых праблем рэктар даў даручэнні першаму прарэктару, прарэктарам і начальнікам упраўленняў аказаць інстытуту максімальнае спрыянне. Акрамя таго, кіраўніцтву інстытута на працягу месяца даручана распрацаваць выразны план далейшага развіцця Інстытута журналістыкі з прапісанымі стратэгічнымі мэтамі, механізмамі іх рашэння, выніковым прадуктам дзейнасці, з указаннем тэрмінаў выканання і фінансавых запатрабаванняў.
«Гэта неабходна зрабіць у сціслыя тэрміны, каб з самага пачатку 2018 года працаваць па новым механізме, які прадугледжвае ўвядзенне сістэмы дыферэнцыяванай аплаты працы ў тым ліку». Пры гэтым рэктар падкрэсліў: «Тут я ўбачыў высокі патэнцыял, які можа эфектыўна спрыяць матэрыяльнаму і якаснаму развіццю інстытута».
Андрэй Кароль падзякаваў усім удзельнікам сустрэчы за пазітыўна эмацыйную і змястоўную дыскусію і выказаў спадзяванне, што дыялог быў неабходным і карысным.
